केरला आईपुग्यो मनसुन, नेपालमा औसत मितिभन्दा चाँडै भित्रिन सक्ने संकेत

काठमाण्डाै, १० जेठ ।

यस वर्षको मनसुन प्रणाली औसत समयभन्दा झन्डै १० दिनअघि नै भारतको केरला पुगिसकेको छ। बङ्गालको खाडीको अधिकांश भाग, श्रीलङ्का र भारतको केरला राज्यमा मनसुन विकसित भइसकेको जलवायु विज्ञ डा. धर्मराज उप्रेतीले जानकारी दिनुभयो।

उहाँका अनुसार केरला हुँदै नेपालको कोशी प्रदेशमा मनसुन आइपुग्न करिब एक हप्ता लाग्ने अनुमान छ। नेपालमा मनसुन प्रवेश गर्ने औसत मिति जुन १३ अर्थात् जेठ ३० गते हो। तर यदि बीचमा कुनै अवरोध आएन भने यस वर्ष औसत मितिभन्दा करिब १० दिन अगाडि नै नेपालमा मनसुन भित्रिन सक्ने सम्भावना देखिएको छ।

यसैबीच, जल तथा मौसम विज्ञान विभागले यस वर्ष औसतभन्दा बढी वर्षा हुने प्रक्षेपण गरिसकेको छ। मनसुनमा बढी वर्षा र तापक्रम हुने प्रक्षेपणपछि कृषकहरूमा राम्रो उत्पादनको आशा बढेको छ। 

नोरा फतेही पहिलोपटक नेपालमा, बौद्धमा धमाकेदार प्रस्तुति दिने तयारी

काठमाडौं/ जेठ ३ 

चर्चित बलिउड नृत्याङ्गना तथा अभिनेत्री नोरा फतेही पहिलोपटक नेपाल आएकी छिन्। दुबईबाट शनिबार बिहान त्रिभुवन अन्तर्राष्ट्रिय विमानस्थल आइपुगेकी उनलाई आयोजक टोलीले भव्य स्वागत गरेको थियो।

नोरा आज बेलुका बौद्धस्थित कार्यक्रमस्थलमा आयोजना हुने भव्य लाइभ इभेन्ट ‘नोरा फतेही लाइभ इन नेपाल’ मा प्रस्तुति दिनेछिन्। उनले हालै चर्चामा रहेको गीत ‘स्नेक’ मा दमदार नृत्य प्रस्तुत गर्नेछिन्।

विमानस्थलको भीआईपी कक्षमा सञ्चारकर्मीहरूसँग कुरा गर्दै नोराले पहिलोपटक नेपाल आउन पाउँदा निकै उत्साहित भएको बताइन्। उनले नेपाली दर्शकप्रतिको आभार व्यक्त गर्दै, "नेपाली फ्यानहरूले मेरो गीतमा बनाएका भिडियोहरू निकै आकर्षक हुन्छन्, जुन म सामाजिक सञ्जालमा ह्यासट्याग र मेन्सनमार्फत हेर्छु," भनिन्।

उक्त सांगीतिक कार्यक्रम सामाजिक संस्था ‘ह्युमन रेस्पेक्ट नेपाल’ को सहयोगार्थ आयोजना गरिएको हो, जसले शिक्षाबाट वञ्चित बालबालिकाको क्षेत्रमा काम गर्दै आएको छ।

कार्यक्रममा नेपाली कलाकारहरूको पनि विशेष प्रस्तुति रहनेछ। चर्चित गायक दुर्गेश थापा, नृत्याङ्गना तेरिया फौजा मगर, नृत्य निर्देशक समर्पण लामा, साथै ‘भ्वाइस अफ नेपाल सिजन ६’ का उत्कृष्ट ५ प्रतिस्पर्धीहरू प्रोसेस पाण्डे, रोशन राई, अर्पणा आचार्य, प्रमेश राई, र इन्द्रकला राईले दर्शकलाई मनोरञ्जन दिनेछन्।

कार्यक्रमका लागि नोरा फतेहीसँगै उनको २३ सदस्यीय टिम शुक्रबार नै काठमाडौं आइसकेको आयोजक वल्र्डवाइड फिल्मस् नेटवर्क प्रा.लि. का अध्यक्ष देव मगरले जानकारी दिए। टिकट खल्ती र आइएमई पेमार्फत बिक्री भैरहेको छ।

नोरा आइतबार बिहान काठमाडौंका प्रमुख पर्यटकीय तथा सांस्कृतिक स्थलहरूको भ्रमण गर्नेछिन् र अपरान्हमा पुनः दुबई फर्किने कार्यक्रम रहेको इभेन्ट म्यानेजर मनीष कार्कीले जानकारी गराए।

नेपाल र नेपाली दर्शकका लागि यो साँझ विशेष र अविस्मरणीय बन्ने निश्चित देखिन्छ!

माओवादी केन्द्रद्वारा ‘मध्यपहाडी लोकमार्ग जनजागरण अभियान’ सुरु

बैतडी/जेठ २ 

नेकपा माओवादी केन्द्रले शुक्रबारदेखि ‘जनतासँग माओवादी मध्यपहाडी लोकमार्ग जनजागरण अभियान’ औपचारिक रूपमा सुरु गरेको छ। यसअघि तराई–मधेशमा केन्द्रित जनसंपर्क अभियान चलाएको माओवादी केन्द्रले अब देशको मध्यपहाडी भेगलाई अभियानको केन्द्रबिन्दु बनाउँदै नयाँ चरणको यात्रा थालेको हो।

अभियानको शुभारम्भ पार्टी अध्यक्ष पुष्पकमल दाहाल ‘प्रचण्ड’ले सुदूरपश्चिमको बैतडी जिल्लास्थित पाटन नगरपालिकामा स्मारक उद्घाटन गरी गरेका हुन्। उक्त स्मारक पाटन नगरपालिकाले निर्माण गरेको हो।

उद्घाटन कार्यक्रममा अध्यक्ष प्रचण्डले पार्टीका सुदूरपश्चिम प्रदेश अध्यक्ष हरि चौधरीलाई कम्युनिस्ट पार्टी र नेपालको झण्डा हस्तान्तरण गरी अभियानको औपचारिक सुरुवात गरेका थिए।

कार्यक्रमको अवसरमा आयोजित सभालाई सम्बोधन गर्दै अध्यक्ष प्रचण्डले मध्यपहाडी लोकमार्ग विकाससँगै जनतामा चेतना अभिवृद्धि गर्नु आवश्यक रहेको उल्लेख गरे। उनले पार्टीले थालेको अभियान जनताको सहभागितामार्फत सफल बनाउने विश्वास पनि व्यक्त गरे।

माओवादी केन्द्रले यो अभियानलाई जनतासँग प्रत्यक्ष संवाद, समस्याको पहिचान र संगठन सुदृढीकरणको अवसरको रूपमा लिएको जनाएको छ।

शहीद दशरथ चन्द स्वास्थ्य विज्ञान विश्वविद्यालय विधेयक प्रस्तुत गर्न सांसद तारालामा तामाङको आग्रह

काठमाडौं, बैशाख २४ – प्रतिनिधि सभाको आजको बैठकको शून्य समयमा बोल्दै सांसद तारालामा तामाङले शहीद दशरथ चन्द स्वास्थ्य विज्ञान विश्वविद्यालय विधेयक, २०८० लाई सदनमा यथाशीघ्र प्रस्तुत गर्न माग गर्नुभएको छ।

सांसद तामाङका अनुसार उक्त विधेयक राष्ट्रिय सभाबाट पारित भई शिक्षा, स्वास्थ्य तथा सूचना प्रविधि समितिको प्रतिवेदनसहित संसद सचिवालयमा पेश भइसकेको छ। हिउँदे अधिवेशनको अन्तिम दिन र चालु अधिवेशनको बैशाख १५ गतेको सम्भावित कार्यसूचीअनुसार शिक्षा, विज्ञान तथा प्रविधि मन्त्री रघुजी पन्तले विधेयक प्रस्तुत गर्ने तयारी भइसकेको भए पनि विद्यालय शिक्षक–कर्मचारीसँगको वार्ताका कारण प्रस्तुत हुन नसकेको उल्लेख गर्नुभयो।

"सुदूरपश्चिमवासीको भावना र चासोलाई ध्यानमा राख्दै उक्त विधेयकलाई यही अधिवेशनमा छलफलका लागि टेबुल गरिनुपर्छ," सांसद तामाङले भन्नुभयो।

त्यसैगरी, उहाँले कञ्चनपुर जिल्लाको दुई फरक घटनाप्रति पनि गम्भीर ध्यानाकर्षण गराउनु भयो। बैशाख ९ गते बेल्डाडी गाउँपालिका–३, कमरीका हरिकिशन रानाको बेलौरी नगरपालिका–१० स्थित सडक छेउमा मोटरसाइकलसहित जलाइएको अवस्थामा हत्या भएको घटना र बैशाख १७ गते लालझाडी गाउँपालिका–४, जाईं मोटरघाटमा भएको शंकास्पद मृत्युको विषयमा सांसद तामाङले गहिरो अनुसन्धानको माग गर्नुभएको छ।

"यी दुबै घटनाको सत्य तथ्य सार्वजनिक गर्न नेपाल सरकारले निष्पक्ष र सूक्ष्म अनुसन्धान गर्नुपर्छ," उहाँको जोड थियो।

शौचालयमा लडेर घाइते भए प्रचण्ड, टाउकोमा टाँका

काठमाडौं/२४ बैशाख ।

माओवादी केन्द्रका अध्यक्ष पुष्पकमल दाहाल ‘प्रचण्ड’ शौचालयमा लडेर घाइते भएका छन्। खुमलटारस्थित निवासमा गएराति बाथरुम प्रयोग गर्ने क्रममा लड्दा उनको टाउको र निधारमा चोट लागेको हो।

घटनापछि उनलाई उपचारका लागि ललितपुरको मेडिसिटी अस्पताल लगिएको थियो। अस्पताल स्रोतका अनुसार घाउमा टाँका लगाइएको छ। हाल उनको अवस्था सामान्य रहेको बताइएको छ।

चट्याङ लाग्दा महिलाको मृत्यु, श्रीमान् घाइते

कञ्चनपुर, २१ वैशाख ।

 कञ्चनपुरको शुक्लाफाँटा नगरपालिका–१२ तिल्कीमा चट्याङ लागेर  एक महिलाको ज्यान गएको छ भने उनका श्रीमान् घाइते भएका छन्।

जिल्ला प्रहरी कार्यालय कञ्चनपुरका प्रवक्ता प्रहरी नायव उपरीक्षक (डीएसपी) सागर बोहराका अनुसार शनिबार बिहान घर नजिकैको तरकारी बारीबाट तरकारी लिएर फर्किँदै गर्दा २४ वर्षीया लालमती रानामाथि चट्याङ खसेको हो। चट्याङ लागेर उनको घटनास्थलमै मृत्यु भएको प्रहरीले जनाएको छ।

घटनामा घाइते भएकी लालमतीका श्रीमान् २८ वर्षीय रतन सिंह रानालाई उपचारका लागि निसर्ग अस्पताल, धनगढी लगिएको छ। प्रहरीले घटनाको थप अनुसन्धान भइरहेको जानकारी दिएको छ।

बेलौरीमा मिनी कभर्ड हल निर्माण सुरु, सांसद बिष्टद्वारा शिलान्यास

कञ्चनपुर/ बैशाख १९

कञ्चनपुरको बेलौरी नगरपालिका–४ स्थित खुलामञ्चमा निर्माण हुन लागेको मिनी कभर्ड हलको बिहीबार औपचारिक शिलान्यास गरिएको छ। शिलान्यास कार्यक्रम सुदूरपश्चिम प्रदेशसभा सदस्य दिवान सिंह बिष्टको प्रमुख आतिथ्यमा सम्पन्न भयो।

प्रदेश सरकारले चालु आर्थिक वर्ष २०८१/८२ का लागि प्रारम्भिक चरणमा २० लाख रुपैयाँ बजेट विनियोजन गरेको छ। उपभोक्ता समितिका अध्यक्ष राजेन्द्र बहादुर चन्दका अनुसार हाल ६५ बाई ७५ फिट साइजको डीपीसी (DPC) निर्माण कार्य सुरु हुनेछ। विस्तृत परियोजना प्रतिवेदन (DPR) अनुसार यो कभर्ड हलको कुल लागत करीब १ करोड ३७ लाख रुपैयाँ रहनेछ।

सांसद बिष्टले आगामी आर्थिक वर्ष २०८२/८३ मा थप बजेटको व्यवस्था गर्न पहल गर्ने प्रतिबद्धता जनाएका छन्। उनले खेलकुद पूर्वाधारको विकासमार्फत युवामा सकारात्मक ऊर्जा विकास गर्न सकिने विश्वास व्यक्त गरे।

बेलौरी नगरलाई खेलकुदमैत्री शहर बनाउने लक्ष्यसहित सुरु गरिएको यो परियोजनाबाट स्थानीय युवाहरूमा खेलप्रतिको अभिरुचि बढ्ने अपेक्षा गरिएको छ।

बेलौरी ब्याडमिन्टन क्लबका अध्यक्ष अशोक श्रेष्ठले कभर्ड हल निर्माणको पहलमा संलग्न सबैलाई धन्यवाद व्यक्त गर्दै यसले नगरको खेल क्षेत्रमा नयाँ सम्भावना खोल्ने बताए।

निर्माणको नेतृत्व उपभोक्ता समितिले गरिरहेको छ, जसमा अध्यक्ष राजेन्द्र बहादुर चन्द, उपाध्यक्ष वसन्त पुन मगर, सचिव रजनिश भण्डारी, कोषाध्यक्ष भगवती श्रेष्ठ तथा सदस्यहरू शिशिर चापागाई, भगवती जोशी र राधा बिष्ट रहेका छन्।

निर्माण कार्यको प्रभावकारी अनुगमन गर्न वडा अध्यक्ष अर्जुन ढकाल, अशोक श्रेष्ठ र दिनेश कुँवर सम्मिलित समिति गठन गरिएको छ। यस्तै, सहजकर्ताको भूमिकामा महेन्द्र सिंह बुडाल, दिलीप चन्द र हिमाल श्रेष्ठ रहेका छन्।

स्थानीय तह, जनप्रतिनिधि र समुदायको समन्वयमा अगाडि बढेको यो परियोजना सम्पन्न भएपछि बेलौरीमा इनडोर खेलकुद गतिविधि सञ्चालनमा नयाँ युगको सुरुवात हुने विश्वास गरिएको छ।

ओडिसाको केआईआईटीमा फेरी नेपाली छात्रा मृत फेला

काठमाडौं/ १८ बैशाख 

भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) मा अध्ययनरत अर्की नेपाली छात्रा मृत अवस्थामा फेला परेकी छिन्। वीरगञ्जकी प्रिशा शाह बिहीबार साँझ कलेजको छात्रावासमा मृत फेला परेकी हुन्।

भुवनेश्वर-कटक प्रहरी आयुक्त एस. देव दत्ता सिंहका अनुसार उक्त छात्राको शव विश्वविद्यालयकै छात्रावासको कोठामा फेला परेको हो।

भुवनेश्वरस्थित ओटीभीका एक पत्रकारका अनुसार बिहीबार साँझ छात्रावासमै एक विद्यार्थी मृत अवस्थामा फेला परेपछि पुनः कलेजप्रति प्रश्न उठेका छन्।

यसअघि, गत फागुन ४ गते पनि सोही कलेजमा अध्ययनरत २० वर्षीया नेपाली छात्रा प्रकृति लम्साल छात्रावासमा मृत भेटिएकी थिइन्। उनले आफू मानसिक रुपमा दुर्व्यवहार र ब्ल्याकमेलको शिकार भएको भन्दै दुईपटक कलेज प्रशासनमा उजुरी दिएकी थिइन्। तर, गम्भीरताका साथ नलिएको प्रशासनिक उदासीनताले उनलाई आत्महत्या गर्न बाध्य बनाएको बताइएको थियो।

प्रकृतिको घटनापछि न्यायको माग गर्दै नेपाली विद्यार्थीहरूले क्याम्पसमा विरोध प्रदर्शन गरेका थिए। तर, कलेज प्रशासनले त्यसलाई दमन गर्दै सुरक्षा गार्डमार्फत विद्यार्थीमाथि कुटपिट गराएको थियो। साथै, धेरै विद्यार्थीहरूलाई होस्टल छाड्न निर्देशन दिइएको थियो, जसले गर्दा कलेजमा तनावपूर्ण अवस्था सिर्जना भएको थियो ।

रास्वपा पुनर्वासद्वारा मजदुर दिवस तथा दोस्रो वार्षिकोत्सव विशेष कार्यक्रम गरी सम्पन्न

पुनर्वास, वैशाख १८ – राष्ट्रिय स्वतन्त्र पार्टी (रास्वपा) पुनर्वासले आज मे १ अर्थात् विश्व मजदुर दिवस तथा पार्टीको दोस्रो वार्षिकोत्सवको अवसरमा विशेष कार्यक्रमको आयोजना गरेको छ।

पुनर्वासस्थित प्यारातालमा आयोजित कार्यक्रममा प्रशिक्षणात्मक अन्तरक्रिया सहित वृक्षारोपण कार्यक्रम पनि सम्पन्न गरिएको थियो। कार्यक्रमको प्रमुख आकर्षणका रूपमा कल्पवृक्षको बोट रोपिएको थियो, जसलाई दीर्घायु, समर्पण र राष्ट्रसेवाको प्रतीकका रूपमा प्रस्तुत गरिएको थियो।

कार्यक्रममा सहभागी वक्ताहरूले रास्वपाले राष्ट्र र जनताको सेवामा समर्पित भएर युगौँ युगसम्म जीवित रहोस् भन्ने शुभकामना व्यक्त गरे। वृक्षारोपणको माध्यमबाट वातावरणीय सन्देशसँगै पार्टीको दीर्घकालीन प्रतिबद्धता समेत झल्काउने प्रयास गरिएको आयोजकले जानकारी दिएका छन ।