कञ्चनपुर उच्च जोखिममा,४६ जनामा सिकलसेल एनिमिया पाइयो

कञ्चनपुर/ कञ्चनपुर  सिकलसेल एनिमिया तथा थालेसिमिया रोगको जोखिममा रहेको छ।

रानाथारु समुदायमा यो रोगको जोखिम देखिएपछि जिल्ला स्वास्थ्य कार्यालयले निःशुल्क स्वास्थ्य शिविरबाट १ हजार ५५० जनाको रगत परीक्षण गरेको थियो। त्यसमा ४६ जनामा सिकलसेल एनिमिया रोग देखिएको छ।

स्वास्थ्य कार्यालयका सिकलसेल एनिमिया तथा थालेसिमिया रोगसम्बन्धी स्रोत व्यक्ति सिद्धराज भट्टका अनुसार कञ्चनपुरको शुक्लाफाँटा नगरपालिका, बेदकोट नगरपालिका र भीमदत्त नगरपालिकामा परीक्षण गरिएकामध्ये १९९ मा वाहक (ट्रेट) देखा परेको थियो। 

‘बाहक (ट्रेट) देखापरेका १९९ जनाको रगतको अन्तिम जाँच गर्दा ४६ जनामा सिकलसेल एनिमिया भएको पुष्टि भएको छ,’ भट्टले भने, ‘त्यसमध्ये १२ जनामा गम्भीर खालको रोग देखिएको छ।’

उनका अनुसार वाहक देखिएका १९९ मध्ये २२ जना महिला र २४ जना पुरुषमा सिकलसेल एनिमिया रोग देखिएको हो। उनले वाहक (ट्रेट) देखा परेका महिला तथा पुरुषले विवाह गर्दा रगत परीक्षण गरेर मात्रै गर्नुपर्ने बताए।

‘बाहक (ट्रेट) देखा परेका महिला र पुरुषले विवाह गरे उहाँहरुबाट जन्मिने व्यक्ति पनि रोगी जन्मन्छ,’ उनले भने, ‘त्यसैले विवाह गर्नुभन्दा पहिले रगत परीक्षण गरेर मात्रै विवाह गर्नु उपयुक्त हुन्छ।’

हेमोग्लोबिनसँग सम्बन्धित खराबीका कारणले हुने समस्या विश्वमा ५ प्रतिशतभन्दा बढी भएको तथ्यांक छ। तीमध्ये सबैभन्दा बढी देखापरेको समस्या सिकलसेल एनिमिया र थालेसिमिया हो।

नेपालमा पनि खासगरी चौधरी थारु समुदायमा यो रोगको प्रकोप उच्च रहेको स्वास्थ्य कार्यालयले जनाएको छ।

केही समयअघि स्वास्थ्य अनुसन्धान परिषद्सँग त्रिभुवन विश्वविद्यालय ट्रफल अनुसन्धान प्रयोगशालाले गरेको अनुसन्धानमा पश्चिम नेपालका अविवाहित थारु समुदायका महिलाको डीएनए परीक्षण गर्दा १८ प्रतिशत व्यक्तिमा सिकलसेल हेटरोजाइग्स ट्रेट रहेको पाइएको उनले बताए।

नेपालका चौधरी थारु समुदायमा यो रोग एउटा प्रमुख जनस्वास्थ्य समस्याका रुपमा रहेको र समयमै यसको रोकथामका उपाय अवलम्बन गर्न नसकिए अवस्था अझ भयावह हुनसक्ने भएकाले कञ्चनपुरका चौधरी थारु समुदायको बसोबास उच्च रहेका पालिकामा यो रोगको पहिचान तथा निदानका लागि स्वास्थ्य कार्यालयले रगत परीक्षण गरेको जनाएको छ।

‘सिकलसेल एनिमिया र थालेसिमिया व्यक्तिको जिनसम्बन्धी खराबीका कारणले हुन्छ, रोगसँग सम्बन्धित सानो खराबी भएको अवस्थालाई ट्रेट भनिन्छ,‘ भट्टले भने, ‘केटा मान्छेमा ट्रेट छ र उसको विवाह ट्रेट भएको केटी मान्छेसँग भयो भने त्यसबाट जन्मने २५ प्रतिशत बच्चा सिकलसेल रोग भएर जन्मने गर्छन्।’ 

ट्रेट भएको व्यक्तिलाई शारीरिक रुपमा खासै समस्या नदेखिने र समस्या देखिए पनि सामान्य खालको हुने उनले बताए।

सिकलसेल भएमा थकाइ लाग्ने, श्वास फेर्न गाह्रो हुने, छाती, पेट, हातखुट्टाको कुर्कुच्चा दुख्ने, आँखामा समस्या देखा पर्ने, ज्वरो आउने, बान्ता हुने, खोकी लाग्ने लक्षण देखा पर्छन्।

 

२३ औँ सशस्त्र प्रहरी दिवस,उत्कृष्ट काम गर्ने कञ्चनपुरका सशस्त्र प्रहरी पुरस्कृत

लाल बहादुर एस के 

कञ्चनपुर, १० माघ 

२३औँ सशस्त्र प्रहरी दिवसको अवसरमा कञ्चनपुरका उत्कृष्ठ काम गर्ने सशस्त्र प्रहरीलाई पुरस्कृत गरिएको छ । सशस्त्र प्रहरी बल नेपाल नम्बर ३५ गण हेक्वा शैलेश्वरीले उत्कृष्ठ काम गर्ने चौबिस सशस्त्र प्रहरी अधिकृत एव जवानलाई पुरस्कृत गरेको हो । 

मंगलबार सशस्त्र प्रहरीको शैलेश्वरी गणका गणपति सशस्त्र प्रहरी उपरीक्षक प्रेम बहादुर रावलले जिल्लाभरीका विभिन्न यूनिटमा रहेर उत्कृष्ठ काम गर्ने सशस्त्र प्रहरी अधिकृतदेखि जवानसम्म पुरस्कृत गरिएको बताए । 

सशस्त्र प्रहरी बल शैलेश्वरी गणका अनुसार सशस्त्र प्रहरी नायब उपरीक्षक (डिएसपी) ईश्वरी दत्त भट्ट, पुरन प्रशाद न्यौपाने, सुदन आचार्य, दिपक बहादुर कुँवर, भारत बहादुर कुँवरलाई सम्मान गरिएको छ । 

सशस्त्र प्रहरी नायब उपरीक्षक(डिएसपी) सुदन आचार्यलाई शैलेश्वरी गण र बैद्यनाथ बाहनी प्रदेशले समेत सम्मान पुरस्कुत गरेको छ । 

प्रस्तावित सीमा सुरक्षा गुल्म गड्डाचौकीका इन्चार्ज समेत रहेका सशस्त्र प्रहरीका डिएसपी आचार्यलाई सीमा चोरी तस्करी नियन्त्रण गर्दै राजस्व जुहावट नियन्त्रणमा अतुलनिय भूमिका निर्वाह गरेको भन्दै सम्मान गरिएको हो । 

सशस्त्र प्रहरीका डिएसपी आचार्यलाई मुख्यमन्त्री कमल बहादुर शाह र सशस्त्र प्रहरी बल सुप प्रदेशका प्रमुख सशस्त्र प्रहरी नायब महानिरीक्षक(डिआईजी) कुमार न्यौपानेले सम्मान एव पुरस्कार हस्तान्तरण गरेका थिए । 

सशस्त्र प्रहरी बरिष्ठ नायक निरीक्षक टेक बहादुर सिह, सशस्त्र प्रहरी सहायक निरीक्षक नवराज भट्ट, सशस्त्र प्रहरी बरिष्ठ हबल्दार महेश बहादुर सिह, डम्बर बहादुर महरा, दिपक बोहारा, प्रमानन्द नाथ, सशस्त्र प्रहरी हवल्दार नरेन्द्र सिह कार्की, शम्भेर धानुक, लाल ब. ऐर, दल ब. विष्ट, रामसिह विष्ट, जयन्त बहादुर चन्द, महामल सिह घटाल, सशस्त्र प्रहरी सहायक हबल्दार सञ्जु प्रशाद उपाध्याय, शंकर सिह धामी, गोपाल राई, सशस्त्र प्रहरी जवान उर्मिला देउवा, जानु ओली र खजनराम दमाईलाई प्रमाण पत्रका साथै पुरस्कृत गरिएको छ । सशस्त्र प्रहरी शैलेश्वरी गणका गणपति प्रेम बहादुर रावलले कार्य सम्पादनमा थप उत्साहका लागि सम्मान एव पुरस्कृत गरिएको बताए । यसका साथै सशस्त्र प्रहरीका अमर परिवारलाई समेत सम्मान गरिएको छ । यस्तै दिवसको अवसरमा आयोजित विवित खेलकुद प्रतियोगितामा प्रथम हुने सशस्त्र प्रहरी अधिकृत एव जवानलाई समेत पुरस्कृत गरिएको छ । 

शैलेश्वरी गणका गणपति समेत रहेका सशस्त्र प्रहरी उपरीक्षक प्रेम बहादुर रावल, सशस्त्र प्रहरी निरीक्षक रमेश कुमार पाण्डेय ब्याडमिन्टन डबल, सशस्त्र प्रहरी बरिष्ठ हबल्दार राजु सिह कुँवर, सप्रह हेमराज उपाध्याय, सप्रबह राम सिह ऐर टिटी सिङ्गल, सप्रज हरि प्रशाद ओझा २माईल दौड र सप्रज तारा जोशी सयमिटर दौड महिला तर्फ पुरस्कृत गरिएको छ । 

कार्यक्रममा कञ्चनपुरका निमित्त प्रमुख जिल्ला अधिकारी धर्मराज जोशीले सशस्त्र प्रहरीको कामकर्तव्यको प्रसंसा गर्दै भावि दिनमा थप काम गर्न निर्देशन दिएका छन । शुक्लाफाँटा नगरका मेयर रण बहादुर महराले देशको परिस्थिित र सशस्त्र प्रहरीको भूमिका फेरिएकाले आगामी दिनमा थप प्रभावकारी कार्य सम्पादनमा जोडदिएका छन ।

चिसो बढेपछि पुनर्वासका विद्यालयहरु थप दुई दिन विदा

कञ्चनपुर, ८ माघ 

चिसो बढेपछि पुनर्वासका विद्यालयहरु थप दुई दिन विदा हुने भएको छ ।

सोमबार सामुदायिक तथा संस्थागत विद्यालयका प्रधानाध्यापक, शिक्षक, ट्रेड युनियन र संस्थागत विद्यालय प्याब्सनका पदाधिकारीहरुको संयुक्त बैठक बसी सो निर्णय गरेको हो ।

बैठकको निर्णयानुसार मिति २०८०।१०।०९ र १० गते पुनर्वास  नगरपालिका अन्तरगत सञ्चालित सम्पुर्ण विद्यालयहरुले अनिवार्य रुपमा विद्यालय बिदा गर्ने गरी जाडो बिदा थप गरिएको  उल्लेख गरिएको छ ।

सूचनामा अत्यधिक चिसो तथा शीतलहरका कारणले विद्यार्थीको स्वास्थ्यमा प्रतिकुल असर पर्नुका साथै नियमित पठनपाठन कार्य प्रभावित हुने देखिएकाले विदा गरिएको जनाईएको छ ।

यस अघि नै छिमेकी पालिकाहरु बेलौरी र बेलडाँडीले पनि जाडो विदा थप गरीसकेका छ्न ।

ढुंगा प्रहार गरि छोराले गरे बुवाको हत्या

 कैलाली/कैलालीमा ढुंगा प्रहार गरि एक जना छोराले बुवाको हत्या गरेका छन् । जानकी गाउँपालिका वडा नम्बर ३ लाइकपुर बस्ने २५ वर्षीय गणेश चौधरीले बुवा ४५ वर्षीय हिरासिंह चौधरीको हत्या गरेको प्रहरीले बताएका छन।

जिल्ला प्रहरी कार्यालय कैलालीका अनुसार चौधरीले घरायसी विवादको क्रममा ढुङ्गा प्रहार गर्दा हिराको घरकै आँगनमा मृत्यु भएको हो ।

उनलाई पक्राउ गरेर थप अनुसन्धान भइरहेको प्रहरीको भनाई छ ।

पुनर्वासबाट अफिम सहित पक्राउ परेका जोगा सिंह को हुन?

कञ्चनपुर/३० असोज ।

पुनर्वासबाट अफिमसहित  पक्राउ परेका जोगा सिंह भारतीय नागरिक भएको खुलेको छ । भारतको उत्तर प्रदेश गोला घर भएका ५२ वर्षीय जोगा सिंहलाई शनिबार इलाका प्रहरी कार्यालय त्रिभुवनबस्ती मातहतको खड्डा प्रहरी चौकीले पुनर्वास नगरपालिका–९ बिचफाँटाबाट पक्राउ गरेको थियो ।

अफिम जस्तो देखिने कालो पदार्थ  सहित पक्राउ परेको प्रहरीले जनाएको छ।

 प्रहरीले उनलाई हिरासतमै राखी अनुसन्धान गरिरहेको जनाएको छ।

पक्राउ परेका भारतीय नागरिकले आफू सुगरको बिमारी भएका कारण बिचफाँटाबाटै सो पदार्थ खरिद गरेको बयान दिएको प्रहरीको भनाई छ।

‘अफिम भन्ने खुलेको छ। हामी परीक्षणका लागि पनि पठाउँछौ,’ ईलाका प्रहरी कार्यालयका प्रहरी निरीक्षक हेमराज भट्टले भने, ‘अहिले अनुसन्धानमै छौं। अफिम भएको पुष्टि भएमा त्यही अनुसार कारबाही गछौं।’

 

बेलौरीमा निल गाई मृत अवस्थामा फेला पर्‍यो

कञ्चनपुर/बेलौरीमा निल गाई मृत अवस्थामा फेला परेको छ। बेलौरी नगरपालिका-१ मटैयामा आज आइतवार बिहान ८ बजे निल गाई मृत अवस्थामा फेला परेको हो। उक्त भाले निल गाई मृत अवस्थामा फेला परेको कुण्डा सव डिभिजन वन कार्यालय कञ्चनपुरका प्रमुख दिनेश कुमार यादवले बताए।

उक्त मृत निल गाईलाई स्थानीय जनप्रतिनिधि,सुरक्षाकर्मि लगायत स्थानीयको रोहवरमा खाल्डोमा गाडिएको हो। अनुसन्धान जारी राख्दै उक्त मृत निल गाईलाई स्थानीय जनप्रतिनिधि,सुरक्षाकर्मि,स्थानीय लगाएतको रोहवरमा खाल्डो खनेर गाडिएको कुण्डा सब डिभिजन वन कार्यालय कञ्चनपुरका प्रमुख दिनेश कुमार यादवले बताएका छन्।

बझाङ पुन: भुकम्प आयो

 बझाङ/२५ असोज ।

बझाङमा फेरि भूकम्पको धक्का महसुस गरिएको छ। गएराति चैनपुर आसपास केन्द्रबिन्दु भएर ५.२ म्याग्निच्युडको भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ।

मध्ये राति १२ बजेर १२ मिनेटमा भूकम्पको धक्का महसुस गरिएको हो। भूकम्पबाट भएको कुनै क्षतिको विवरण प्राप्त भएको छैन।

बझाङको चैनपुर केन्द्रबिन्दु भएर गत मंगलवार ६.३ म्याग्निट्यूडको भूकम्प गएको थियो। त्यसपछि बझाङमा बारम्बार पराकम्पहरू गइरहेका छन्।

सरकार र राहत शिक्षकबीच पाँच बुँदे सहमति, आन्दोलन फिर्ता

काठमाडौं, १२ असोज । सरकार र आन्दोलनरत राहत तथा बालविकास शिक्षकहरुबीच पाँचबुँदे सहमति भएको छ । सहमतिसँगै शिक्षकहरुको आन्दोलन फिर्ता भएको छ ।

शिक्षामन्त्री अशोककुमार राईकै संलग्नतामा भएको सहमतिमा राहत शिक्षकको सिमित प्रतिस्पर्धासम्बन्धी व्यवस्थालाई एक पटकका लागि आन्तरिकतर्फ शतप्रतिशत कायम गर्ने सहमति भएको छ ।

परीक्षामा उत्तीर्ण भएका शिक्षकहरु स्थायी हुनेछन् भने अनुत्तीर्ण भएका शिक्षकहरुलाई सरकारले आर्थिक प्याकेज दिनेछ ।

संसदमा दर्ता भएको विधेयकमा भने आन्तरिकतर्फ ५० प्रतिशत कायम गर्ने उल्लेख थियो भने ५ असोजमा शिक्षक महासंघसँग भएको ६बुँँदे सहमतिमा ७५ प्रतिशत पुर्‍याउने उल्लेख थियो । त्यसमा असहमत राहत तथा बालविकास शिक्षकहरुले आन्दोलन जारी राखेपछि सरकारले वार्ता थालेको थियो ।

  शुक्रबार भएको सहमति शिक्षक महासंघसँग गरेको सहमतिको पूरक भएको शिक्षामन्त्री राईले बताए ।

प्रस्तावित विधेयकमा छुटफुट भएका विषयलाई संसदीय प्रक्रियामार्फत समावेश गरियोस् भनेर सरकारले सहमति गरेको भन्दै उनले भने, ‘सबै शिक्षक साथीहरु सहमतिमा आउनु भएको छ । सम्झौताहरुलाई संसदमा प्रस्तुत गरेर संसदयि प्रक्रियामार्फत विधेयक पारित गर्दा सामेल गर्ने शिक्षा मन्त्रालयको जिम्मेवारीमा आएको छ ।’

राहत शिक्षक र शिक्षा मन्त्रीविच भोलि औपचारिक वार्ता हुने

काठमाडौ/११ असोज ।

गत असोज ३ गतेदेखि निरन्तर आन्दोलनरत राहत शिक्षक र शिक्षा मन्त्रीबिच भोलि बिहान वार्ता हुने भएको छ । राहत शिक्षकलाई शिक्षा विज्ञान तथा प्रविधि मन्त्री अशोककुमार राईले औपचारिक रुपमा वार्तामा बोलाएपछि आन्दोलनरत राहत शिक्षक वार्तामा जाने भएका हुन् ।

  नेपाल शिक्षक महासंघको नेतृत्वमा घोषित आन्दोलन गत असोज ५ गते सरकारसंग भएको छ बुँदे सम्झौता गर्दै स्थगित भएको भनिए पनि राहत शिक्षकले उक्त सम्झौतामा असहमति जनाउँदै सडक आन्दोलन निरन्तर जारी राखेका छन् ।

सरकारले आफ्नो माग सम्बोधन गरे आन्दोलन स्थगित गरेर कक्षा कोठमा फर्किने तर आफ्ना माग सम्बोधन नहुने भए आन्दोलन जारी राख्ने राहत शिक्षक संघका अध्यक्ष खेम अधिकारीले बताए । ‘हामी वार्तामा पनि जान्छौं आन्दोलन पनि जारी राख्छौं ।’ उनले भने, ‘सरकारले हाम्रो सम्बोधन गर्ने प्रतिवद्धता जनाउने बितिकै सडक छाडेर कक्षाकोठामा छिर्छौं ।’

सरकारले गत भदौ २७ गते संघीय संसद्मा दर्ता गराएको विद्यालय शिक्षा सम्बन्धी विधेयक , २०८० को विरोधमा राहत शिक्षक निरन्तर आन्दोलन गरिरहेका छन ।

राहत शिक्षकहरूका असहमतिहरूलाई वार्ताबाटै निकास निकाल्नु पर्ने भन्दै नेपाल शिक्षक महासङ्घ र शिक्षा मन्त्रालय यसअघि पटकपटक छलफलमा बसेको मन्त्रालयका उच्च अधिकारीहरु बताउँछन् ।

अध्यक्ष अधिकारीका अनुसार आज पनि शिक्षामन्त्री र आन्दोलनरत शिक्षकहरुका विच छलफल भएको थियो । आजको छलफलपछि मन्त्रालयले वार्ताका लागि औपचारिक पत्राचार गरेको अध्यक्ष अधिकारीले बताए ।

राहत शिक्षकको असहमति कायमै, हस्ताक्षर नगरी बाहिरिए

 

काठमाडौं । सरकार र आन्दोलनरत शिक्षकबीच भएको सहमतिमा राहत शिक्षकहरूले असहमति जनाएका छन् ।

राहत शिक्षक केन्द्रिय समितिका अध्यक्ष खेमराज अधिकारीले यो सहमति केही महासंघका प्रतिनिधि र सरकारबीच भएको तर आफूहरुको सहमति नरहेको बताए ।

‘केही महासंघका प्रतिनिधि र सरकारबीच सहमति भयो । हाम्रो सहमति छैन, राहत शिक्षकको विषय सम्बोधन नभएपछि बाहिरिएका हौं । हामी विज्ञप्ति निकाल्छौ,’  अधिकारीले भने ।

२०७५ सालभन्दा अगाडिका ४० हजार शिक्षकहरू विस्थापित नहुने गरि ऐन बन्नु पर्ने माग बैठकमा राखिएको तर सुनुवाइ नभएको उनले बताए ।

   राहत शिक्षक केन्द्रीय महासचीव कुमार बजगाईँले आफूहरूका मागमा चासो नराखेका कारण अब शिक्षक महासंघबाट अलग भएर आन्दोलन जारी राख्ने चेतावनी दिए ।

पुनर्वासका द फंकी डान्स एण्ड जुम्बा स्टुडियोका सञ्चालक तथा रक्तदाता सन्तोष अवस्थी सम्मानित

कञ्चनपुर, २० भाद्र ।

पुनर्वासका द फंकी डान्स एण्ड जुम्बा स्टुडियोका सञ्चालक तथा रक्तदाता सन्तोष अवस्थी सम्मानित भएका छ्न ।

मंगलबार

नेपाल रेडक्रस सोसाइटीको स्थापना दिवसको अवसरमा भएको एक भव्य कार्यक्रममा पुनर्वास २ अमरैया निवासी अवस्थीलाई सम्मान गरिएको हो । कार्यक्रम  सुदुरपश्चिम प्रदेशका मुख्यमन्त्री कमलबहादुर शाहको प्रमुख आतिथ्य र नेपाल रेडक्रस सोसाइटी कैलाली जिल्ला शाखाको आयोजनामा भएको थियो ।  अवस्थीले रक्तदान कार्यक्रम मार्फत मानवीय सेवाको काम गरिरहेको  सम्मान पत्रमा उल्लेख छ ।

अवस्थी नेपाल स्वयंसेवी रक्तदाता समाजका सदस्य हुन । उनी आफैले दर्जनौ चोटि रक्तदान गरीसकेका छ्न भने समाजमा रक्तदान गर्न अरुलाई प्रोत्साहन गर्दै रक्तदान कार्यक्रमको आयोजना गर्दै आएका छन । त्यसैगरी रगतको अभावमा कसैले ज्यान गुमाउन नपरोस् भन्ने पवित्र भावनाका साथ रगत उपलब्ध गराउन हरदम तयार हुने गरेका छ्न ।   पुनर्वास ३ स्थित द फंकी डान्स एण्ड जुम्बा स्टुडियोका सञ्चालक समेत रहेका अवस्थीलाई उनले पुर्‍याएको योगदानको कदर गर्दै सम्मान गरीएको नेरेसो कैलालीले जनाएको छ ।

पुनर्वासको भागेश्वर चिनी मिलको लापरवाहीका कारण सयौ विगाह धानखेती नष्ट

 कञ्चनपुर/पुनर्वासको भागेश्वर चिनी मिलको लापरवाहीका कारण सयौ विगाह धानखेती नष्ट भएको छ । उद्योगको लापरवाहीले पुनर्वास नगरपालिका २, ५, ६ र ७ क्षेत्रका झण्डै दुईसय विगाह जमिनमा लगाईएको धान खेती नष्ट भएको हो ।  सिमरीखोला वारीपारी नजिक रहेको खेतको धानखेती नष्ट भएपछि स्थानीय किसान मर्कामा परेका छन । सबैभन्दा बढि ५ नम्बर वडामा क्षति गरेको स्थानीयले बताएका छन । 

   स्थानीय किसानले उद्योगको लार्पबाहीले गत असारमा लगाए र असोजमा फल्ने धानको जरैदेखि सखाप भएको बताएका छन । दैनिक जिवन चलाउने धानखेतीमै आश्रित किसान साउनमै नष्ट भएपछि विचल्ली भएको छ । 

 चिनी मिलले केमिकलयुक्त फोहोरपानी सिमरी नालामा बगाईदिएपछि धानखेती पूर्ण नष्ट भएको किसानले बताएका छन । पुनर्वास नगरपालिका ५ सिमरीका स्थानीय किसान राजु चौधरीले चिनिमिलले केमिकलयुक्त फोहोरपानी नालामा बगाईदिएपछि धानखेती नष्ट भएको बताए ।

‘चिनिमिलले आफ्नो उद्योगबाट निस्किने फोहोरपानी नालामा बगाईदिन्छ, ‘उनले भने, ‘धान खेतीका साथै मानिसलाई छाला सम्बन्धीत रोग लागिरहेको छ ।’

अर्का स्थानीय रामेश्वर रानाले उद्योगको चरम लापरवाहीले धानखेती सहित अन्य अन्नबाली समेत सखाप भईरहेको बताए । ‘हरेक वर्ष चिनीमिलले उद्योगबाट निस्किएको फोहोरपानी उतिकै छाडिदिन्छ, ‘उनले भने, ‘यसले अन्नबालीदेखि खेतकै उर्वरा शक्तिमा ह्रास ल्याईरहेको छ ।’ अर्की स्थानीय सावित्री चौधरीले उद्योगले फोहोरपानी बेलाबेलामा बगाउँदा धानखेती नष्ट भएको बताईन । ‘यस बारेमा पटक पटक स्थानीय सरकारलाई जानकारी गराउँदा पनि हाम्रो समस्याको कुनै सुनुवाई भएन ।’

पुनर्वास नगरपालिका ७ का वडाध्यक्ष मुलचन्द रानाले उद्योगकै लापर्वाहीले किसान मारमा परेको बताए । ‘पटक पटक गैरकानूनी रुपमा उद्योगको फोहोरपानी नालामा नबगाउन हामीले आग्रह गछौँ, मान्दै मान्दैन‘वडाध्यक्ष रानाले भने, ‘अब पालिकाले कानुनी रुपमै एक्सनमा जानुपर्छ ।’

कृषि ज्ञान केन्द्र कञ्चनपुरका निमित्त प्रमुख हरिदत्त जोशीले झण्डै ५०/६० किसानको २ सय विगाह हाराहारीको जमिनको धानखेती नष्ट भएको बताए । ‘हामीले गत २१साउनमा प्राविधिक टोली सहित अध्ययन पनि गरेका छौँ, ‘उनले भने, ‘त्यहाँबाट धान र माटोको नमुना ल्याए, के कारणले धानखेती नष्ट भएको बारे परीक्षणका लागि ल्याबमा पठाएका छौँ ।’

हरेक बर्ष दोदामा आउने वाढीले धानका ठुलो क्षति नगरेपनि यस बर्ष पनि दोदामा वाढी आएको र त्यहीसंगै उद्योगले नालामा फोहोरपानी बगाएकै कारण धान खेती नष्ट भएको किसानको जनगुनासो अनुरुप कृषि कार्यालयबाट स्थलगत अनुगमन गर्दै कारण पत्ता लगाउने काममा जुटेको बताए । 

भागेश्वर सुगरमिल एण्ड केमिकल्स ईन्डष्ट्रिज प्रालिले केमिकलयुक्त फोहोरपानी नालामा नबगाएको जनाएको छ । भागेश्वर सुगरमिल एण्ड केमिकल्स ईन्डष्ट्रिज प्रालिका मेकानिकल ईन्जिनियर पदमराज पाण्डेले उद्योगले केमिकलयुक्त फोहोरपानी नबगाएको बताए । ‘हाम्रो उद्योगबाट निस्किएको फोहोरपानी यतै व्यवस्थापन हुन्छ, ‘उनले भने, ‘सीमरी खोलामा पुल निर्माण कार्यले लामो समय पानी थुनिएकाले गन्ध आएको र धानखेती नष्ट भएको होला, अहिले मिल बन्द छ, फोहोरपानी आउने कुरै भएन ।’ उद्योग संचालका बेला फोहोरपानी सानै खोलामा जाने उनले स्वीकार गरेका छन । यसरी फोहोरपानी तथा बस्तु पनि वातावरणीय हिसाबले नदीखोला, नालामा बगाउनु वातावरण संरक्षण ऐन विरुद्धको कार्य हुनजान्छ ।

दोदा नदिमा पानीको बहाव बढेसंगै हुलाकी राजमार्ग प्रयोग गर्न सकस

कञ्चनपुर, २३ साउन ।

पुनर्वासमा दोदा नदिमा पानीको बहाव बढेसंगै हुलाकी राजमार्ग प्रयोग गर्न सकस भएको छ । कञ्चनपुरको दक्षिणी क्षेत्रका जनताहरुलाई प्रदेश राजधानी धनगढी पुग्न निकै कठिनाइ भएको छ । गत राति देखि नै पानीको सतह बढन थालेपछि आपतकालीन साइरन बजाएर तटिय क्षेत्र वरपरका बासिन्दाहरुलाई सचेत गराईएको थियोे । 

सोमबार मध्यरातमा पुनर्वास नगरपालिकाका प्रमुख तोयप्रसाद शर्मा र पुनर्वास ५ का वडाध्यक्ष पदम रोकाया बाढि प्रभावित क्षेत्रमा पुगेका थिए ।

बाढी प्रभावित क्षेत्रमा सम्भावित जोखिम न्यूनीकरणका लागि उक्त क्षेत्रको बासिन्दालाई सचेत गराईएको थियोे । त्यसैगरी मंगलबार सुदुरपश्चिम प्रदेस सभा सदस्य माननिय वीरबहादुर थापाले बाढी प्रभावित क्षेत्रको अवलोकन गरेका थिए ।

 अवलोकनका क्रममा सञ्चारकर्मीहरुसंग बोल्दै माननीय थापाले  यस समस्याको दीर्घकालीन समाधानका लागि आफुले प्रयास गरिरहेको बताए ।