कक्षा १२ को नतिजा सार्वजनिक

 काठमाडौं/१९ साउन ।

राष्ट्रिय परीक्षा बोर्डले १२ कक्षाको नतिजा सार्वजनिक गरेको छ। सोमबार साँझ बसेको बोर्ड बैठकपछि नतिजा प्रकाशित गरिएको हो।

नतिजा प्रकाशित गर्नुअघि, बोर्डले आइतबार नतिजाको डेमो (पूर्वावलोकन) प्रदर्शन गरेको थियो। बोर्डको वार्षिक कार्यतालिका अनुसार १५ साउनभित्र नतिजा सार्वजनिक हुने कार्यक्रम थियो। तर, शिक्षकहरूको आन्दोलनका कारण यसमा ढिलाइ भएको हो।

गत २० चैतदेखि सुरु भएको आन्दोलन २९ दिनसम्म चलेको थियो, जसका कारण नतिजा प्रकाशन प्रक्रियामा प्रभाव परेको हो। यसै आन्दोलनको कारण ११ वैशाखका लागि तय भएको परीक्षा पनि ढिलिएर २१ वैशाखदेखि सुरु गरिएको थियो।

यस वर्षको परीक्षामा देशभरबाट ५ लाख ११ हजार ५ सय २५ विद्यार्थी सहभागी भएका थिए।

बोर्डका अनुसार, कक्षा १२ को नतिजा सुधारोन्मुख देखिएको छ।  दुई लाख ८२ हजार ४६५ जना उत्तीर्ण भएका छन् । १३,५०२ जना विद्यार्थीले ३.६१ देखि ४ जिपिएसम्म प्राप्त गरेका छन्। गत वर्षको तुलनामा ९ प्रतिशतले नतिजामा सुधार आएको बोर्डका अध्यक्ष महाश्रम शर्माले जानकारी दिए ।  

कञ्चनपुरका सुनचाँदी व्यवसायीहरूले सांसदको घरै पुगेर ज्ञापनपत्र बुझाए

पुनर्वास, असार २१ 

कञ्चनपुरका सुनचाँदी व्यवसायीहरूले सांसदको घरै पुगेर ज्ञापनपत्र बुझाएका छ्न । शनिबार नेपाल सुनचाँदी कला व्यवसायी संघ जिल्ला शाखा कञ्चनपुरका अध्यक्ष मीन बहादुर सुनार, उपाध्यक्ष उमेश कुमार विश्वकर्मा र सचिव सोम पौडेलसहितको टोलीले कञ्चनपुर क्षेत्र नं. १ का प्रतिनिधि सभा सदस्य तारालामा तामाङमार्फत अर्थमन्त्रीलाई ज्ञापनपत्र बुझाएका हुन्। ज्ञापनपत्र तामाङको पुनर्वास–३ स्थित राम बस्ती निवासमा पुगेर हस्तान्तरण गरिएको हो।

सरकारद्वारा हालै बजेटमार्फत सुनमा २ प्रतिशत विलासिता कर र हिरालगायत रत्न तथा पत्थरमा १३ प्रतिशत मूल्य अभिवृद्धि कर (भ्याट) लगाउने निर्णयको विरोधमा सुनचाँदी व्यवसायीहरूले आन्दोलन चर्काउँदै आएका छन्।

  सुनचाँदी व्यवसायीहरू सरकारको एकतर्फी कर नीतिले आफ्नो व्यवसाय संकटमा पारेको भन्दै आन्दोलनमा उत्रिएका हुन्। उनीहरूका अनुसार सरकारले सल्लाह–सम्पर्कबिना कर लगाउने निर्णय गरेकाले व्यवसायीहरू आन्दोलित बन्नु परेको हो।

नेपाल सुनचाँदी व्यवसायी महासंघ, नेपाल सुनचाँदी रत्न तथा आभूषण व्यवसायी महासंघ र नेपाल हस्तकला महासंघले संयुक्त रूपमा आन्दोलन चर्काइरहेका छन्। देशभरका सुनचाँदी पसलहरू बन्द गरिएका छन् भने पसलमा मागसहितका ब्यानर टाँसी विरोध जनाइएको छ।

व्यवसायीहरूका अनुसार नयाँ कर लागू भएमा सुनचाँदीको मूल्य अत्यधिक महँगिनेछ। नेपाल सुनचाँदी कला व्यवसायी संघ कञ्चनपुरका सचिव सोम पौडेलले भने, “सुनमा २ प्रतिशत कर थपिँदा मात्रै पनि तोलामा करिब ४ हजार रुपैयाँ मूल्य बढ्नेछ। बैंक, थोक व्यापारी र खुद्रा व्यापारी गरी तीन तहमा मूल्य बढेर थप कर भार सिर्जना हुन्छ।”

एम.के. सुनचाँदी गहना उद्योगका सञ्चालक किरण खातीले भने, “कुल कर भार २९ प्रतिशत पुग्ने खतरा छ। ४ प्रतिशतसम्म थोक स्तरमा, १३ प्रतिशत भ्याट र १० प्रतिशत भन्सार कर जोडिँदा ४० देखि ६० हजार रुपैयाँसम्म सुनको मूल्य बढ्न सक्छ।”

नेपाल सुनचाँदी कला व्यवसायी संघ कञ्चनपुरका अध्यक्ष मीन बहादुर सुनारले भने, “पहिले नै सुन महँगो हुँदा ग्राहकहरू किनमेल गर्न सकिरहेका छैनन्, अब थप करले व्यवसाय धराशायी बन्नेछ।”

महासंघले २०८२ असार १७ गते आर्थिक वर्ष २०८२/८३ को बजेट वक्तव्यमार्फत लागू गरिएका अव्यवहारिक कर नीतिहरू खारेज गर्न  माग गर्दै यो ज्ञापनपत्र बुझाएको हो । यसअघिदेखि नै संयुक्त महासंघ यी कर नीतिको विरोधमा निरन्तर सडक आन्दोलनका साथै कूटनीतिक पहल एवं संवादमा रहेको  छ ।

विद्यालय शिक्षा विधेयकमा दलहरू सहमति नजिक, गुठी ऐच्छिक

काठमाडौ/१२ असार ।

कक्षा १ देखि ८ सम्मको आधारभूत शिक्षामा प्रारम्भिक बाल विकासलाई पनि समेट्ने गरी विद्यालय शिक्षा विधेयकमा दलहरू सहमति नजिक पुगेका छन्।

प्रतिनिधिसभाको शिक्षा, स्वास्थ्य तथा सूचना प्रविधि समितिले यस्तो सहमति जुटाएको हो।

यसरी व्याख्या गरिएपछि निजी र सार्वजनिक विद्यालयमा बाल विकास शिक्षा सामान ढंगले अघि बढ्नेछ। निजी लगानी भएका र सार्वजनिक विद्यालयले सामान किसिमको पाठ्यक्रमबाट बाल विकास कक्षा सञ्चालन गर्नुपर्नेछ।

प्रारम्भिक बाल विकासलाई दुई वर्षीय कार्यक्रमका रूपमा सञ्चालन गर्ने सहमति पनि जुटेको छ। सार्वजनिक विद्यालयका हकमा सरकारले स्रोत सुनिश्चित गरेर तोकेको मितिदेखि मात्र यो व्यवस्था लागू हुनेछ।

समितिअन्तर्गत समन्वय तथा परामर्श उपसमितिले अनौपचारिक छलफलमार्फत् सहमतिको प्रयास गर्दै आएको छ। समिति सभापति अम्मरबहादुर थापाले नै यो उपसमितिको नेतृत्व गरेका छन्।

उपसमितिको छलफलमा कम्पनी कानुनअन्तर्गत विद्यालय स्थापना र सञ्चालनको निम्ति बाटो खुला गर्ने सहमति पनि भएको छ।

हाल कम्पनी कानुनअनुसार विद्यालय खोल्न बन्देज छ। शिक्षा ऐनको आठौं संशोधनले शैक्षिक गुठीअन्तर्गत मात्र विद्यालय सञ्चालनको अनमुति दिँदै आएको छ। अब भने कम्पनी कानुनअन्तर्गत पनि विद्यालय सञ्चालन गर्न सकिने प्रावधान नयाँ बन्ने ऐनमा राखिनेछ।

छलफल क्रममा सांसदहरूले कम्पनी कानुनअनुसार स्थापना भएका विद्यालयलाई अनिवार्य शैक्षिक गुठीमा लैजान लबिङ गर्दै आएका थिए। धेरै सांसदले निश्चित अवधि तोकेर गुठीमा लैजाने व्यवस्था गर्न संशोधन दर्ता गराएका थिए। सरकारले भने बाध्यकारी ढंगले गुठीमा नलैजाने, बरू प्रोत्साहन गर्ने बाटो लिएको हो।

निजी लगानीमा स्थापना भएका विद्यालयले सार्वजनिक शैक्षिक गुठीमा जान चाहे जग्गा रजिस्ट्रेसन शुल्क, विद्यालय प्रयोजनका लागि सवारी साधन आयात गर्दा लाग्ने भन्सार महसुल, शैक्षिक तथा प्रयोगशाला सामग्री आयात गर्दा लाग्ने भन्सार महसुल र अन्य छुट दिन सरकारले प्रस्ताव गरेको छ। यसबाट निजी लगानीका विद्यालयलाई सार्वजनिक शैक्षिक गुठीमा जान बाध्यकारी नभएर ऐच्छिक हुनेछ।

केही सांसद भने अझै पनि अनिवार्य गुठीमा लैजानुपर्ने पक्षमा छन्। त्यसो नभएसम्म संविधान र सर्वोच्च अदालतको व्याख्याअनुसार लोककल्याणकारी शिक्षा लागू नहुने उनीहरूको ठहर छ।

निजी लगानीका विद्यालयलाई निजी गुठीमै जान बाटो खुला गर्नुपर्ने पनि केही सांसदको मत छ। तर हालको व्यवस्थाले निजी लगानी र सार्वजनिक गुठीको मात्र परिकल्पना गरेको छ। केही सांसदहरू निजी गुठीको कल्पना नगरिएकोमा असन्तुष्ट छन्।

निजी लगानीका विद्यालयले आफ्नो शैक्षिक स्तर र शुल्क निर्धारणसम्बन्धी राष्ट्रिय मापदण्डको अधिनमा रहेर स्थानीय तहले तोकेको शीर्षक र सीमाभित्र शुल्क लिन पाउने भएका छन्। यस्ता विद्यालयले शैक्षिक सत्र सुरू हुनु दुई महिनाअघि आफूले लिने शुल्क सार्वजनिक गर्नुपर्ने छ।

त्यस्तै, विद्यालय व्यवस्थापन समितिमा प्रधानाध्यापक सदस्य–सचिव हुने र अर्का एक शिक्षक सदस्य हुने गरी व्यवस्था गर्न सहमति जुटेको छ। यस्तो व्यवस्थापन समितिमा चन्दादाता तथा शिक्षाप्रेमी समेत रहने छन्।

केही सांसदले व्यवस्थापन समितिमा चन्दादाता रहने अवस्थामा उसले दिएको चन्दाको विवरण स्थानीय तहलाई दिनुपर्ने प्रावधान राख्न माग गरेका छन्।

ती सांसदले विद्यालय व्यवस्थापन समितिहरूको विवरण पनि स्थानीय तहलाई जानकारी गराउनुपर्ने व्यवस्था राख्न सुझाव दिएका छन्। यसबारे समितिको पूर्ण बैठकमा छलफल गर्ने तयारी छ।

सांसदहरूबीच प्रत्येक जिल्लामा शिक्षा विकास तथा समन्वय इकाई बनाउने विषयमा छलफल भएको छ। हाल रहेका जिल्ला शिक्षा कार्यालयलाई नै रूपान्तरण गरी प्रदेश सरकारको शिक्षासम्बन्धी कामसमेत गर्ने गरी यस्तो इकाई राख्न समितिले प्रस्ताव गरेको छ।

उपसमितिले कक्षा १० को एसइई परीक्षा प्रदेश स्तरमा सञ्चालन गर्ने सहमति जुटाएको छ। यस्तो परीक्षाबारे प्रदेश कानुनले व्यवस्था गर्नेछ।

उपसमितिले शिक्षकहरूका लागि लाइसेन्स परीक्षा (अध्ययन अनुमतिपत्र) लिनुपर्ने व्यवस्था हटाउने तयारी गरेको छ। यस विषयमा सहमति जुटिसकेको छैन। केही सांसदहरू अनुमतिपत्रको व्यवस्था राख्नुपर्ने र नवीकरण गर्दा पनि परीक्षा लिनुपर्ने पक्षमा छन्। केही सांसद भने शिक्षा सेवा आयोग पास गर्ने व्यक्तिले सेवा प्रवेशअघि एक महिना तालिम लिनुपर्ने भएकाले अनुमतिपत्रको व्यवस्था हटाउने पक्षमा छन्। यसबारे समितिबाटै टुंगो लगाउने भनिएको छ।

उपसमितिले विद्यालय व्यवस्थापन संघ हटाउन पनि सिफारिस गरेको छ। यसले शिक्षामा राजनीति गर्न अर्को संघ थपिने भन्दै हटाउन सिफारिस गरिएको हो। केही सांसद भने शिक्षकहरूको महासंघ हुने भएकाले सरोकारवालाका रूपमा व्यवस्थापन समितिहरूको पनि संघ बनाउनुपर्ने पक्षमा उभिएका थिए।

प्रधानाध्यापक चयनका लागि प्रदेश स्तरको डालो बनाउने विषयमा भने उपसमितिले गरेको सिफारिस सरकारले मानेको छ। आधारभूत तहका लागि जिल्लास्तरीय शिक्षक मध्येबाट र माध्यमिक तहका लागि प्रदेशस्तरीय शिक्षक मध्येबाट प्रधानाध्यपक चयन हुने भएका छन्।

समन्वय तथा परामर्श उपसमितिले सहमति जुटाएका विषयमा समितिले बिहीबार छलफल गर्ने भएको छ। शुक्रबारसम्म विधेयक पारित गर्ने तयारी समितिको छ।

पुनर्वासकी युवती धनगढीमा मृत फेला

कैलाली, असार ९

धनगढी उपमहानगरपालिका–२ स्थित बैयाबेहडीमा एक युवती मृत अवस्थामा फेला परेकी छन्।

प्रहरीका अनुसार कञ्चनपुर जिल्लाको पुनर्वास नगरपालिका–११ अमरबस्तीकी ३० वर्षीया रेणु चौधरी सोमबार बिहान धनगढीस्थित आफ्नै कोठामा मृत अवस्थामा फेला परेकी हुन्।

जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) राजकुमार सिंहले उनी धनगढीमा कोठा भाडामा लिएर बस्दै आएको जानकारी दिए। उनका अनुसार रेणु बस्दै आएको कोठाको ढोका बाहिरबाट ताल्चा लागेको अवस्थामा भेटिएको थियो।

घटनाबारे जानकारी पाएलगत्तै प्रहरी घटनास्थलमा पुगेर कोठा सिल गरी आवश्यक अनुसन्धान सुरु गरिएको जनाएको छ। प्रारम्भिक रुपमा मृत्युको कारण स्पष्ट नभएको बताउँदै प्रहरीले विस्तृत अनुसन्धान भइरहेको जानकारी दिएको छ।

विद्युतीय शवदाह गृहमा भ्रष्टाचार : चौध जनाविरुद्ध मुद्दा

काठमाडौं/असार ८ 

 अख्तियार दुरुपयोग अनुसन्धान आयोगले पशुपति क्षेत्र विकास कोषअन्तर्गतको विद्युतीय शवदाह गृहमा देखिएको अनियमिततासम्बन्धी अनुसन्धानपछि कोषका सदस्यसचिव डा. मिलन कुमार थापासहित १४ जना व्यक्तिविरुद्ध विशेष अदालतमा भ्रष्टाचार मुद्दा दायर गरेको छ। साथै, दुईवटा कम्पनीसमेत प्रतिवादी बनाइएको छ।

आयोगका प्रवक्ता राजेन्द्र कुमार पौडेलका अनुसार आइतबार विशेष अदालत, काठमाडौंमा मुद्दा दायर गरिएको हो।

विद्युतीय शवदाह गृहको मेसिन खरिद र जडान प्रक्रिया नियोजित रूपमा मिचिएको, उपकरण खरिदमा मिलेमतो गरिएको, र कोषको सम्पत्तिमा हिनामिना गरी राज्यलाई आर्थिक हानि पुर्‍याइएको आयोगको ठहर छ।

परियोजनामा संलग्न पदाधिकारी तथा कर्मचारीहरूले खरिद प्रक्रियामा लापरवाही र अनियमितता गर्दै भ्रष्टाचार निवारण ऐन उल्लंघन गरेका पाइएपछि मुद्दा दायर गरिएको आयोगले जनाएको छ।

मुद्दामा दोषी ठहरिएमा सम्बन्धित व्यक्तिहरूलाई कैद सजायका साथै जरिवाना समेत हुन सक्ने कानुनी व्यवस्था छ।

नेपाल राष्ट्रिय शिक्षक संगठन पुनर्वासले नगरप्रमुखलाई बुझायो ज्ञापनपत्र

पुनर्वास/ असार ७

शिक्षकको पेशागत सुरक्षा, हक–अधिकार, सेवा सुविधा तथा गुणस्तरीय शिक्षाका लागि आवश्यक पूर्वाधार सुनिश्चित गर्न विभिन्न मागसहित नेपाल राष्ट्रिय शिक्षक संगठन, नगर समिति पुनर्वासले पुनर्वास नगरपालिकाका नगरप्रमुख तोय प्रसाद शर्मालाई  ज्ञापनपत्र बुझाएको छ।

संगठनले गत बुधबार एक कार्यक्रम बीच पुनर्वास नगरपालिकाको कार्यालयमा पुगेर नगरप्रमुखलाई १५ बुँदे मागसहितको ज्ञापनपत्र बुझाएको हो। उक्त ज्ञापनपत्रमा शिक्षकहरूका पेशागत हकहित, सुरक्षित तथा समुचित कार्य वातावरण, समयमै पारिश्रमिक भुक्तानी, शिक्षक विकास, पुरस्कारको व्यवस्था, र आवश्यक भौतिक पूर्वाधारको व्यवस्था गर्न जोड दिइएको छ।

संगठनका कञ्चनपुर जिल्ला उपाध्यक्ष चन्द्रबहादुर थापाले पुनर्वासका नगरप्रमुख शर्माले अनिच्छापूर्वक ज्ञापनपत्र बुझेको बताउनुभयो । साथै  आफूहरूलाई स्टन्टबाजी गर्नको लागि यस्ता क्रियाकलाप गरेको आरोप समेत नगरप्रमुखले लगाएकोमा आफ्नो आपत्ति रहेको बताउनुभयो ।

ज्ञापनपत्रमा उल्लेखित १५ बुँदे मागहरू यसप्रकार छन्:

१. पुर्व जि.वि.स. अनुदान हाल (नगर शिक्षक) बिरेन्द्र सिंह चाट श्री विजय मा.वि. (भिगवस्ती), शोभा दहाल श्री राष्ट्रिय मा.वि. अमरबस्ती, श्री रामपाल राना अलइकार आ.वि., विकासवस्ती, श्री विष्णु बहादुर अधिकारी श्री जिवनज्योति मा.वि. त्रिभुवनबस्तीको त.भ. प्रा.वि तृतिय श्रेणी सरह कायम गरियोस ।

२ नगरपालिका भित्र रहेका नगर अनुदान, निजिस्रोत शिक्षक तथा कर्मचारीहरुको पारिश्रमिक तथा सेवा सुविधा सुनिश्चित गर्न कार्यविधि तयार पारी लागु गरियोस् ।

३. विद्यालय म्यापिङ, मर्जिङ र डाउन साईड एवं दरवन्दि पुर्नवितरण सम्बन्धमा कुनैपनि शिक्षक संघ/संगठनको नाउँमा आग्रह वा पुर्वाग्रह नगरी न्यायोचित ढंगले गरियोस ।

४ शैक्षिक व्यवस्थापनको लागि नगर शिक्षा समितिको तत्काल गठन गरियोस ।

५ प्राविधिकधार संचालित विद्यालयहरुलाई सिपमुलक तालिम, गोष्ठी र कार्यशालाहरुमा सहभागी गराइयोस। 

६. दिवा खाजा व्यवस्थापन सम्बन्धमा संघबाट विनियोजित रकम प्रति विद्यार्थी रु. १५ अतिनै न्यून भएकोले पालिकावाट थप गरि व्यवस्थापन गरियोस् ।

७. नियमित रुपमा विद्यालय निरिक्षण र अनुगमन सम्बन्धित निकायबाट हुने व्यवस्था मिलाईयोस् ।

८. विद्यालयमा खेलकुद कार्यक्रमको लागि बजेट विनियोजन गरियोस् ।

९. विद्यालयमा खानेपानि, शौचालय, विद्युत, सञ्चार व्यवस्थापनका लागि एकमुष्टमा अनुदान दिने व्यवस्था

मिलाईयोस् ।

१०. बाल विकास स.का. लाई पुर्नताजगी तालिम तथा पालिकाबाट दिँदै आएको प्रोत्साहन भत्तामा थप गरियोस् ।

११. शिक्षक कर्मचारीहरुको उत्कृष्ट कार्यको आधारमा पुरस्कृत गर्ने व्यवस्था मिलाईयोस् ।

१२. अभिभावक सचेतना कार्यक्रम राखियोस् ।

१२. सेवा निवृत्त हुनुभएका शिक्षक तथा कर्मचारीहरुलाई शिक्षक दिवसको अवसर पारी सम्मान कार्यक्रम राखियोस् ।

१४. नगर शिक्षण अनुदान नियुक्त भएका शिक्षकहरुलाई त्रैमासिक रुपमा पारिश्रमिक उपलब्ध गराईयोस् । 

१५. सबै प्रकारका शिक्षकहरु (स्थायी, उ.मा.वि. अनुदान, राहत, प्राविधिक धार) लाई उनीहरुको आवश्यकतालाई महशुस गरी नगरपालिकावाट प्रदान गरिने १ ल्याप्टप शिक्षक कार्यक्रम लागु गराइयोस।

सो अवसरमा संगठनका नगर अध्यक्ष नवराज सिंह, सचिव धनबिर तामाङ, पूर्व नगर अध्यक्ष तथा हाल जिल्ला उपाध्यक्ष चन्द्रबहादुर थापा लगायतका शिक्षक प्रतिनिधिहरूको उपस्थिति  थियो।

शिक्षक पार्वती अवस्थीको सर्पदंशबाट निधन

धनगढी, ३० जेठ 

कैलाली जिल्लाको गोदावरी नगरपालिकास्थित शारदा माध्यमिक विद्यालयमा कार्यरत शिक्षक पार्वती अवस्थीको सर्पको टोकाइबाट निधन भएको छ।

जिल्ला प्रहरी कार्यालय कैलालीका अनुसार गोदावरी नगरपालिका–८ स्थित श्रीपुरमा प्रावि तहमा कार्यरत  शिक्षिका अवस्थीलाई बिहीबार अचानक सर्पले टोकेको थियो। सर्पले टोकेपछि तत्कालै उनलाई उपचारका लागि सेती प्रादेशिक अस्पताल, धनगढी लगिएको थियो। तर उपचारको क्रममा उनको ज्यान जोगाउन नसकिएको अस्पताल स्रोतले जनाएको छ।

उनी धनगढी उपमहानगरपालिका–३ बोराडाँडीकी स्थायी बासिन्दा थिइन्। सर्पदंशपछिको समयमा तत्काल उपचार सुरु गरिए पनि विषको असर गम्भीर भएकाले उनको मृत्यु भएको बताइएको छ।

यो घटनाले शिक्षकमाझ शोकको लहर फैलिएको छ भने स्थानीय समाजमा पनि गहिरो दुःखको वातावरण छाएको छ। मृत आत्माप्रति श्रद्धाञ्जली अर्पण गर्दै शारदा माविका शिक्षक तथा विद्यार्थीहरूले समवेदना व्यक्त गरेका छन्।

केरला आईपुग्यो मनसुन, नेपालमा औसत मितिभन्दा चाँडै भित्रिन सक्ने संकेत

काठमाण्डाै, १० जेठ ।

यस वर्षको मनसुन प्रणाली औसत समयभन्दा झन्डै १० दिनअघि नै भारतको केरला पुगिसकेको छ। बङ्गालको खाडीको अधिकांश भाग, श्रीलङ्का र भारतको केरला राज्यमा मनसुन विकसित भइसकेको जलवायु विज्ञ डा. धर्मराज उप्रेतीले जानकारी दिनुभयो।

उहाँका अनुसार केरला हुँदै नेपालको कोशी प्रदेशमा मनसुन आइपुग्न करिब एक हप्ता लाग्ने अनुमान छ। नेपालमा मनसुन प्रवेश गर्ने औसत मिति जुन १३ अर्थात् जेठ ३० गते हो। तर यदि बीचमा कुनै अवरोध आएन भने यस वर्ष औसत मितिभन्दा करिब १० दिन अगाडि नै नेपालमा मनसुन भित्रिन सक्ने सम्भावना देखिएको छ।

यसैबीच, जल तथा मौसम विज्ञान विभागले यस वर्ष औसतभन्दा बढी वर्षा हुने प्रक्षेपण गरिसकेको छ। मनसुनमा बढी वर्षा र तापक्रम हुने प्रक्षेपणपछि कृषकहरूमा राम्रो उत्पादनको आशा बढेको छ। 

नोरा फतेही पहिलोपटक नेपालमा, बौद्धमा धमाकेदार प्रस्तुति दिने तयारी

काठमाडौं/ जेठ ३ 

चर्चित बलिउड नृत्याङ्गना तथा अभिनेत्री नोरा फतेही पहिलोपटक नेपाल आएकी छिन्। दुबईबाट शनिबार बिहान त्रिभुवन अन्तर्राष्ट्रिय विमानस्थल आइपुगेकी उनलाई आयोजक टोलीले भव्य स्वागत गरेको थियो।

नोरा आज बेलुका बौद्धस्थित कार्यक्रमस्थलमा आयोजना हुने भव्य लाइभ इभेन्ट ‘नोरा फतेही लाइभ इन नेपाल’ मा प्रस्तुति दिनेछिन्। उनले हालै चर्चामा रहेको गीत ‘स्नेक’ मा दमदार नृत्य प्रस्तुत गर्नेछिन्।

विमानस्थलको भीआईपी कक्षमा सञ्चारकर्मीहरूसँग कुरा गर्दै नोराले पहिलोपटक नेपाल आउन पाउँदा निकै उत्साहित भएको बताइन्। उनले नेपाली दर्शकप्रतिको आभार व्यक्त गर्दै, "नेपाली फ्यानहरूले मेरो गीतमा बनाएका भिडियोहरू निकै आकर्षक हुन्छन्, जुन म सामाजिक सञ्जालमा ह्यासट्याग र मेन्सनमार्फत हेर्छु," भनिन्।

उक्त सांगीतिक कार्यक्रम सामाजिक संस्था ‘ह्युमन रेस्पेक्ट नेपाल’ को सहयोगार्थ आयोजना गरिएको हो, जसले शिक्षाबाट वञ्चित बालबालिकाको क्षेत्रमा काम गर्दै आएको छ।

कार्यक्रममा नेपाली कलाकारहरूको पनि विशेष प्रस्तुति रहनेछ। चर्चित गायक दुर्गेश थापा, नृत्याङ्गना तेरिया फौजा मगर, नृत्य निर्देशक समर्पण लामा, साथै ‘भ्वाइस अफ नेपाल सिजन ६’ का उत्कृष्ट ५ प्रतिस्पर्धीहरू प्रोसेस पाण्डे, रोशन राई, अर्पणा आचार्य, प्रमेश राई, र इन्द्रकला राईले दर्शकलाई मनोरञ्जन दिनेछन्।

कार्यक्रमका लागि नोरा फतेहीसँगै उनको २३ सदस्यीय टिम शुक्रबार नै काठमाडौं आइसकेको आयोजक वल्र्डवाइड फिल्मस् नेटवर्क प्रा.लि. का अध्यक्ष देव मगरले जानकारी दिए। टिकट खल्ती र आइएमई पेमार्फत बिक्री भैरहेको छ।

नोरा आइतबार बिहान काठमाडौंका प्रमुख पर्यटकीय तथा सांस्कृतिक स्थलहरूको भ्रमण गर्नेछिन् र अपरान्हमा पुनः दुबई फर्किने कार्यक्रम रहेको इभेन्ट म्यानेजर मनीष कार्कीले जानकारी गराए।

नेपाल र नेपाली दर्शकका लागि यो साँझ विशेष र अविस्मरणीय बन्ने निश्चित देखिन्छ!

माओवादी केन्द्रद्वारा ‘मध्यपहाडी लोकमार्ग जनजागरण अभियान’ सुरु

बैतडी/जेठ २ 

नेकपा माओवादी केन्द्रले शुक्रबारदेखि ‘जनतासँग माओवादी मध्यपहाडी लोकमार्ग जनजागरण अभियान’ औपचारिक रूपमा सुरु गरेको छ। यसअघि तराई–मधेशमा केन्द्रित जनसंपर्क अभियान चलाएको माओवादी केन्द्रले अब देशको मध्यपहाडी भेगलाई अभियानको केन्द्रबिन्दु बनाउँदै नयाँ चरणको यात्रा थालेको हो।

अभियानको शुभारम्भ पार्टी अध्यक्ष पुष्पकमल दाहाल ‘प्रचण्ड’ले सुदूरपश्चिमको बैतडी जिल्लास्थित पाटन नगरपालिकामा स्मारक उद्घाटन गरी गरेका हुन्। उक्त स्मारक पाटन नगरपालिकाले निर्माण गरेको हो।

उद्घाटन कार्यक्रममा अध्यक्ष प्रचण्डले पार्टीका सुदूरपश्चिम प्रदेश अध्यक्ष हरि चौधरीलाई कम्युनिस्ट पार्टी र नेपालको झण्डा हस्तान्तरण गरी अभियानको औपचारिक सुरुवात गरेका थिए।

कार्यक्रमको अवसरमा आयोजित सभालाई सम्बोधन गर्दै अध्यक्ष प्रचण्डले मध्यपहाडी लोकमार्ग विकाससँगै जनतामा चेतना अभिवृद्धि गर्नु आवश्यक रहेको उल्लेख गरे। उनले पार्टीले थालेको अभियान जनताको सहभागितामार्फत सफल बनाउने विश्वास पनि व्यक्त गरे।

माओवादी केन्द्रले यो अभियानलाई जनतासँग प्रत्यक्ष संवाद, समस्याको पहिचान र संगठन सुदृढीकरणको अवसरको रूपमा लिएको जनाएको छ।

शहीद दशरथ चन्द स्वास्थ्य विज्ञान विश्वविद्यालय विधेयक प्रस्तुत गर्न सांसद तारालामा तामाङको आग्रह

काठमाडौं, बैशाख २४ – प्रतिनिधि सभाको आजको बैठकको शून्य समयमा बोल्दै सांसद तारालामा तामाङले शहीद दशरथ चन्द स्वास्थ्य विज्ञान विश्वविद्यालय विधेयक, २०८० लाई सदनमा यथाशीघ्र प्रस्तुत गर्न माग गर्नुभएको छ।

सांसद तामाङका अनुसार उक्त विधेयक राष्ट्रिय सभाबाट पारित भई शिक्षा, स्वास्थ्य तथा सूचना प्रविधि समितिको प्रतिवेदनसहित संसद सचिवालयमा पेश भइसकेको छ। हिउँदे अधिवेशनको अन्तिम दिन र चालु अधिवेशनको बैशाख १५ गतेको सम्भावित कार्यसूचीअनुसार शिक्षा, विज्ञान तथा प्रविधि मन्त्री रघुजी पन्तले विधेयक प्रस्तुत गर्ने तयारी भइसकेको भए पनि विद्यालय शिक्षक–कर्मचारीसँगको वार्ताका कारण प्रस्तुत हुन नसकेको उल्लेख गर्नुभयो।

"सुदूरपश्चिमवासीको भावना र चासोलाई ध्यानमा राख्दै उक्त विधेयकलाई यही अधिवेशनमा छलफलका लागि टेबुल गरिनुपर्छ," सांसद तामाङले भन्नुभयो।

त्यसैगरी, उहाँले कञ्चनपुर जिल्लाको दुई फरक घटनाप्रति पनि गम्भीर ध्यानाकर्षण गराउनु भयो। बैशाख ९ गते बेल्डाडी गाउँपालिका–३, कमरीका हरिकिशन रानाको बेलौरी नगरपालिका–१० स्थित सडक छेउमा मोटरसाइकलसहित जलाइएको अवस्थामा हत्या भएको घटना र बैशाख १७ गते लालझाडी गाउँपालिका–४, जाईं मोटरघाटमा भएको शंकास्पद मृत्युको विषयमा सांसद तामाङले गहिरो अनुसन्धानको माग गर्नुभएको छ।

"यी दुबै घटनाको सत्य तथ्य सार्वजनिक गर्न नेपाल सरकारले निष्पक्ष र सूक्ष्म अनुसन्धान गर्नुपर्छ," उहाँको जोड थियो।

शौचालयमा लडेर घाइते भए प्रचण्ड, टाउकोमा टाँका

काठमाडौं/२४ बैशाख ।

माओवादी केन्द्रका अध्यक्ष पुष्पकमल दाहाल ‘प्रचण्ड’ शौचालयमा लडेर घाइते भएका छन्। खुमलटारस्थित निवासमा गएराति बाथरुम प्रयोग गर्ने क्रममा लड्दा उनको टाउको र निधारमा चोट लागेको हो।

घटनापछि उनलाई उपचारका लागि ललितपुरको मेडिसिटी अस्पताल लगिएको थियो। अस्पताल स्रोतका अनुसार घाउमा टाँका लगाइएको छ। हाल उनको अवस्था सामान्य रहेको बताइएको छ।

चट्याङ लाग्दा महिलाको मृत्यु, श्रीमान् घाइते

कञ्चनपुर, २१ वैशाख ।

 कञ्चनपुरको शुक्लाफाँटा नगरपालिका–१२ तिल्कीमा चट्याङ लागेर  एक महिलाको ज्यान गएको छ भने उनका श्रीमान् घाइते भएका छन्।

जिल्ला प्रहरी कार्यालय कञ्चनपुरका प्रवक्ता प्रहरी नायव उपरीक्षक (डीएसपी) सागर बोहराका अनुसार शनिबार बिहान घर नजिकैको तरकारी बारीबाट तरकारी लिएर फर्किँदै गर्दा २४ वर्षीया लालमती रानामाथि चट्याङ खसेको हो। चट्याङ लागेर उनको घटनास्थलमै मृत्यु भएको प्रहरीले जनाएको छ।

घटनामा घाइते भएकी लालमतीका श्रीमान् २८ वर्षीय रतन सिंह रानालाई उपचारका लागि निसर्ग अस्पताल, धनगढी लगिएको छ। प्रहरीले घटनाको थप अनुसन्धान भइरहेको जानकारी दिएको छ।