सुर्खेतमा ट्रयाक्टर दुर्घटना हुँदा तीन जनाको ज्यान गयो

सुर्खेत, फागुन १५ – सुर्खेतको गुर्वाकोट नगरपालिका–२ मालारानीमा ट्रयाक्टर दुर्घटना हुँदा एउटै वडाका तीनजनाको ज्यान गएको छ । 

रड बोकेको भे १ त ६१८६ नम्बरको ट्याक्टर दुर्घटना हुँदा ट्रयाक्टर चालक फत्तबहादुर विक तथा मजदुरहरु शशीराम विक र नारायण खत्रीको ज्यान गएको सुर्खेतका प्रहरी नायब उपरीक्षक श्यामसिंह चौधरीले जानकारी दिनुभयो । उनीहरु तीनै जना गूर्वाकोट नगरपालिका – ८ का बासिन्दा हुन् । 

दुर्घटनामा घाइते भएका सुर्खेतको मेहेलकुनाका टेकबहादुर धौलाकोटी र अमर विकलाई थप उपचारका लागि कोहलपुर लगिएको छ ।  मालारानीको देवकीडाँडा गौरीबजारबाट रड बोकेर मेहेलकुनाका लागि छुटेको ट्रयाक्टरबाट उकालो बाटोमा रड खस्न थालेसँगै पछाडि सर्दा सडकबाट पल्टिएर दुर्घटना भएको हो ।