शिरीष र परिको आधुनिक गीतको म्युजिक भिडियो सार्वजनिक हुँदै

काठमाडौं ।
     द भोइस अफ नेपाल टेलिभिजन गायन प्रतिस्पर्धामा उत्कृष्ट प्रदर्शन गरिरहेका नव गायक दिनेश न्यौपानेको स्वरमा सजिएको ‘छट्पटी’ बोलको गीतको म्युजिक भिडियोमा शिरीष र परिको रोमान्स देख्न पाइने भएको छ ।

मोडल तथा नृत्यकार शिरीष गौतम अनि उदयमान मोडल परि जोशीद्वारा अभिनित त्रिकोणात्मक प्रेम कथामा बनेको यस म्युजिक भिडियोको सुटिङ सुदुरपश्चिम प्रदेशका विभिन्न रमणीय ठाँउहरुमा खिचिएको छ ।

सिनेमेटोग्राफर तथा इडिटर रणधिर श्रेष्ठले छायांकन गरेको यस म्युजिक भिडियोमा ड्रोन क्यामेराको समेत प्रयोग गरिएको छ । अत्याधुनिक प्रविधिलाई प्रयोग गरि धेरै मेहनतका साथ बनाईएको म्युजिक भिडियो अत्यन्तै गुणस्तर बनेको मोडल गौतमले दाबी गरेका छन ।

यस म्युजिक भिडियोलाई चलचित्र निर्देशक जि.बि. आग्रीले निर्देशन गरेका हुन ।  पछिल्लो समय श्रीमतीले प्रेमीसंग मिलेर श्रीमानको हत्या गरेको घटनाहरु एक पछि अर्को गर्दै सार्वजनिक भइरहेका बेला निर्देशक आग्रीले यस्तै प्रकारको घटनालाई ५ मिनेटको त्रिकोणात्मक प्रेम कथामा समेटेका छन ।

खराब श्रीमतीले चाहेमा प्रेमीसंग मिलेर श्रीमानको हत्या सम्म गर्न पछि पर्दैनन् भन्ने सन्देश यस म्युजिक भिडियोले दिने निर्देशक आग्रीले बताए ।

निर्देशक आग्री पछिल्लो समय काठमाडौ देखि भारत हुँदै सुदुरपश्चिममा आफ्नो पकड जमाएका निर्देशक मानिन्छन् । सिनेमेटोग्राफर तथा इडिटर रणधिर श्रेष्ठले गीत दसैंको अवसर पारेर सार्वजनिक हुने बताए ।