बेलौरीमा भएको प्रथम नगरस्तरीय राष्ट्रपति रनिङ शिल्डको उपाधी शान्तिको पोल्टामा

हरिश चन्द्र बाग, कञ्चनपुर
       कञ्चनपुरको बेलौरीमा सम्पन्न प्रथम नगर स्तरीय एवं ११ राष्ट्रपति रनिङ्ग शिल्ड प्रतियोगितामा शान्ति मावि, शान्तिपुर प्रथम भएको छ । बेलौरी नगरपालिकाको आयोजनामा बिहिबार देखि शुरु भई सोमबार सम्पन्न बेलौरी नगरपालिका स्तरीय राष्ट्रपति रनिङ्ग शिल्ड प्रतियोगिता २०७५ मा शान्ति मावि, शान्तिपुर ७ स्वर्ण, ५ रजत र ४ कास्य पदक सहित प्रथम भएको हो । त्यस्तै, ६ स्वर्ण र १ कास्य पदक सहित भगवानपुर मावि, भुडा द्विीतीय भएको छ भने ५ स्वर्ण, ८ रजत र ३ कास्य पदक सहित लक्ष्मी मावि, जब्दिया तृतीय भएको मूल आयोजक समितिका सदस्य सचिव अशोक पाण्डेयले बताउनु भयो ।

बेलौरी नगरपालिका भित्रका सामुदायिक, संस्थागत र निजी गरी माध्यमिक तहका २३ विद्यालयहरुको सहभागिता रहेको प्रतियोगितामा ५ स्वर्ण, ५ रजत र ३ कास्य पदक सहित ब्राइट स्टार बोर्डिङ स्कुल शान्तिपुर चौथो र ५ स्वर्ण, ४ रजत र ५ कास्य पदक सहित जनज्योति मावि, कलकत्ता पाचौँ भएको मूल आयोजक समितिका संयोजक श्याम कुमार पाण्डेयले जानकारी दिनुभयो ।

बेलौरीको खुल्ला मञ्चमा सम्पन्न कार्यक्रमलाई सम्बोधन गर्दै प्रमुख अतिथि समेत रहनु भएका कञ्चनपुर क्षेत्र नं. १ प्रदेश सभा ख का सांसद कुलबीर चौधरीले चालु आर्थिक वर्षमा सुदूरपश्चिम प्रदेश सरकारले बेलौरी भित्र माग भए अनुसार रु. ५० लाख बराबरको बजेट विनियोजन गरेको तर स्थानको पहिचान नखुलेको हुँदा त्यसमा छलफल गर्नुपर्ने आवश्यकता औँल्याउनु भयो । उहाँले प्रथम नगर स्तरीय एवं ११ राष्ट्रपति रनिङ्ग शिल्ड प्रतियोगिताबाट छनौट भएका खेलाडीहरुलाई बधाई तथा शुभकामना दिनुभएको छ ।

प्रथम नगर स्तरीय एवं ११ राष्ट्रपति रनिङ्ग शिल्ड प्रतियोगिताको समापन कार्यक्रमका सभापति समेत रहनुभएका बेलौरी नगरपालिकाका नगर प्रमुख पोतिलाल चौधरीले स्थानीय, प्रदेश र संघीय गरी तीन तहका सरकार बनिसकेपछि पहिलो पटक स्थानीय सरकारलाई राष्ट्रपति रनिङ्ग शिल्ड प्रतियोगिता सञ्चालनको अधिकार प्राप्त भएको र यसलाई उपलब्धीका रुपमा लिनुपर्ने बताउनु भयो । ५ दिन सम्म सञ्चालित प्रथम नगर स्तरीय एवं ११ राष्ट्रपति रनिङ्ग शिल्ड प्रतियोगितामा उत्कृष्ठ खेलाडीहरुलाई बधाई दिँदै माथिल्लो तहका खेलका लागि पठाउँदा नगरपालिकाले पनि केहीनकेही सहयोग गर्ने समेत उहाँले बताउनु भएको छ । उहाँले कार्यक्रमलाई सहजताका साथ सम्पन्न गर्न गराउन सहयोग गर्ने सबैलाई धन्यवाद समेत दिनुभएको छ । समापन कार्यक्रमको सञ्चालन शिक्षक तेज बहादुर चन्दले गर्नुभएको थियो ।