पुनर्वासमा वन तथा वन्यजन्तु अपराध नियन्त्रण समिति गठन

हेमन्त न्यौपाने 
पुनर्वास, फागुन ०५
      कञ्चनपुरको पुनर्वास नगरपालिकामा आइतबार वन तथा वन्यजन्तु अपराध नियन्त्रण गर्न युवा समिति गठन भएको छ । पुनर्वास नगरपालिकाको सहयोग तथा डिभिजन वन कार्यालय पचकडियाको आयोजनामा सुनबहादुर तामाङको संयोजकत्वमा समिति गठन भएको हो । नगरपालिकाको सभाहलमा सम्पन्न कार्यक्रमको प्रमुख अतिथि नगरप्रमुख जिवनराज थापा रहनुभएको थियो ।

कार्यक्रमलाई सम्बोधन गर्दै नगरप्रमुख थापाले वन तथा वन्यजन्तु संरक्षणमा सबै जुट्नुपर्ने धारणा व्यक्त गर्नुभयो । उहाँले जलवायु परिवर्तनका असरहरुलाई कम गरेको वनले पुर्याएको फाइदाको चर्चा गर्दै वन तथा वन्यजन्तु अपराध नियन्त्रण गर्नुपर्ने बताउनुभयो । पुनर्वास नगरपालिका वन संरक्षण समितिका संयोजक तथा वडानम्बर ९ का अध्यक्ष नारायण जैशीले औद्योगिक विकाश तथा मानविय कृयाकलापको उपजस्वरुप सिर्जित जलवायु परिवर्तन वातावरणीय सन्तुलनमा मुख्य चुनौति बनिरहेको बताउदैँ वन र वन्यजन्तु संरक्षणमा सबैले भुमिका खेल्नुपर्ने बताउनुभयो । उहाँले जल प्रदुषण, वायु प्रदुषण, भू प्रदुषण, ध्वनी प्रदुषण तथा विकीरणजन्य प्रदुषणका कारण आवहवा प्रतिकुल बन्दै गएको बताउनुभयो । उहाँले वन जोगाउदैँ वातावरणलाई स्वच्छ राख्नुपर्नेमा जोड दिनुभयो ।

कार्यक्रमका उपस्थित प्रदेश वन कार्यालयका सहायक वन अधिकृत सत्य नारायण महतोले मानव जीवनमा आवश्यक पर्ने काठ, दाउरा, इन्धन तथा विभिन्न उद्योग व्यवसायको लागि आवश्यक पर्ने कच्चा पदार्थ पशुपालनको लागि चाहिने घाँसपात, चरण र पशुपंक्षी तथा जनावरको लागि बासस्थान नै बन सम्पदा अभिन्न अगंको बनेको बताउँदै वन र वन्यजन्तुको महत्त्वबारे प्रकाश पार्नुभएको थियो ।

डिभिजन वन कार्यालयका प्रमुख दिनेश कुमार यादवले वन्यजन्तु अपराध नियन्त्रण गर्न गठनभएको समितिलाई सहयोग गरि अपराध रोक्न तथा वन जोगाउनु पर्नेमा जोड दिनुभयो । उहाँले बढ्दो जनसंख्या, प्राकृतिक श्रोतको अत्यधिक दोहन, तिब्र औद्योगिक विकाश र प्रदुषणका कारण पृथ्वीको वातावरण दिनानुदिन खस्किँदै गएको बताउदैँ वन र वन्यजन्तुको संरक्षण गर्नु आजको आवश्यक भएको बताउनुभयो । कार्यक्रमको सञ्चालन फरेस्टर रेशमलाल शर्माले सञ्चालन गर्नुभएको थियो ।

 नेपालको वनसम्पदा राष्ट्रिय अर्थतन्त्रको महत्वपूर्ण साधनको रुपमा चिनिन्छ ।  वनजंगलवाट प्राप्त हुने जडीवुटी र काठको आपूर्तिले दैनिक आवश्यकता मात्र पुरा नगरी राष्ट्रिय आयमा समेत ठूलो योगदान दिएको छ । ११ वटा वडाबाट प्रतिनिधित्व हुनेगरि ११ जना सदस्यहरु समितिमा राखिएको छ । समितिले वन्यजन्तु अपराध नियन्त्रण गर्न भुमिका खेल्ने विश्वास लिइएको छ ।

सरकारले वन र वन्यजन्तु संरक्षणमा विभिन्न अभियान सञ्चालन गरेको छ । विकास क्रमले समेत वन तथा वन्यजन्तुमा प्रतिकुल असर गरेको छ ।
वन्यजन्तुबाट हुने क्षतिको सरकारले राहत उपलब्ध गराउन सुरु गरेको छ । वन्यजन्तुको आक्रमणबाट मृत्यु भएमा १० लाख सम्म क्षतिपुर्ती समेत उपलब्ध हुनेछ । त्यस्तै, पशुधनको क्षति, भण्डारण गरेको अन्नपातको क्षति, घरगोठको क्षति तथा खाद्यान्नवालीको क्षति भएका घटनाको प्रकृति हेरेर राहत उपलब्ध हुनेछ । सामान्य मानवीय क्षति भएमा १० हजार रुपैयाँ सम्म क्षतिपुर्ती उपलब्ध हुनेछ ।