विद्यालयमा ईन्सास राईफलको गोलि खेल्दै भेटिए विद्यार्थी, स्थानीय सशंकित

यम प्रसाद आचार्य 
कञ्चनपुर,२३ माघ
         भारतीय सीमा सुरक्षा बल एसएसबीले प्रयोग गर्ने ईन्सास राइफलमा प्रयोग हुने गोलि विद्यालयमा विद्यार्थीले खेलाउदै गरेको अवस्थामा भेटिएपछि विद्यालयमा खैलाबैला नै मच्चियो । बुधबार कञ्चनपुरको पुनर्वास ३ स्थित जनकल्याण माध्यमिक विद्यालयमा कक्षा चारमा अध्ययनरत विद्यार्थीहरु ईन्सास राइफलमा प्रयोग हुने गोलि खेलाउदैँ गरेको अवस्थामा भेटिए । यसरी बच्चाको हातमा गोलि भेटिँदा स्थानीय सशंकित बनेका छन ।

घरबाट स्कुल आउने क्रममा नालामा उक्त वस्तु फेला परेको विद्यार्थी बताउछन । गोलि भेटिए लगत्तै विद्यालयले प्रहरी बोलाएको थियो । प्रधानाध्यापक रामनारायण कंडेलले यस्ता वस्तु जहाँ पायो त्यही भेटिनु शंकास्पद भएको हुँदा सम्बन्धित निकायले सूक्ष्म अनुसन्धान गर्नुपर्ने बताउछन । उक्त गोली नेपाली सेनाले जनयुद्धकालमा प्रयोग गरेको ईन्सास राईफलको भएको अस्थायी प्रहरी पोस्टका असई दान बहादुर साउदले हाम्रै साझा पत्रिकासंग बताए । गोलिमा K F 03 5.56 लेखिएको छ ।

"सेना र प्रहरीको घरमा एकदुई वटा गोलि भेटिनु सामान्य कुरा हो । केटाकेटीलाई लकेट बनाईदिदा भूतप्रेत टाढा भाग्छ भन्ने जनविश्वासका कारण यस्ता गोलि सेनाहरुले घरमा ल्याउने गरेकाले गाउँघरमा भेटिएको हो र यो सामान्य कुरा हो ।" ईलाका प्रहरी कार्यालयका प्रहरी निरीक्षक कर्ण बहादुर बम बताउछन ।

गोलि भेटिएको सन्दर्भमा प्रतिक्रिया दिदै कञ्चनपुरका एसपी कुबेर कठायतले गोलि भेटिएका सन्दर्भमा गहिरो अनुसन्धान हुने बताए । "कहाँबाट, के प्रयोजनका लागि ल्याईएको हो ? कहाँ, कसरी र कुन अवस्थामा फेला परेको हो ? यस बारेमा अनुसन्धान गर्न मेरो मातहतका सबैलाई आदेश दिईसकेको छु ।" गाउँमा यसरी गोलि भेटिनुलाई विभिन्न कोणहरुबाट विश्लेषण गरिएको छ ।