विखण्डनकारी सिकेको पछि लाग्ने सरकारले गोविन्द गौतमलाई बिर्सियो

हाम्रै साझा पत्रिका
पुनर्वास, फाल्गुन २६
           शहिद गोविन्द गौतमको दोस्रो स्मृति दिवसका अवसरमा नेपाली कांग्रेस नगर कमिटीले आनन्द बजारमा राखेको स्मृति सभा कार्यक्रमबाट बोल्दै संविधानसभा सदस्य सांसद दिवानसिंह बिष्टले दुईतिहाई लिएर अधि बढेको सरकारको उपलब्धि सिके राउतसंगको सम्झौतामा पुगेर अल्झिएको बताउनुभयो ।

उहाँले विखण्डनकारी सिके राउतलाई संरक्षण गर्ने सरकारले राष्ट्रभक्त वीर सपूत गोविन्द गौतमलाई बिर्सिएको बताउनुभयो । उहाँले सरकारले सीमाबासीका समस्या समाधानलाई कुनै प्राथमिकतामा नराखेको आरोप लगाउनुभयो । उहाँले भन्नुभयो “लामो समयदेखि विवाद चर्किदै गएपछि अन्ततः एकजना राष्ट्रभक्त युवाले छातिमा तातोगोली खानुपर्यो । यसलाई सरकारले गम्भीरतापूर्वक लिएको छैन । अझै अरु दुर्घटना नहोला भन्न सकिन्न । यस तर्फ सरकार गम्भीर हुनुपर्छ । शहिदका बुवाआमालाई निशुल्क स्वास्थ्य उपचारको प्रवन्ध मिलाउनु पर्ने, सुकुम्बासी समस्या समाधान गर्नुपर्ने, शहिद परिवारलाई रोजगारी दिनुपर्ने, सीमा समस्या तत्काल समाधान गर्नुपर्ने, लगायत तमाम समस्याहरुमा सरकार गम्भीर बनेको छैन ।” उहाँले भन्नुभयो ।

नेपाली कांग्रेस नगरकमिटी सभापति यम प्रसाद पौडेलले सरकारले शहिद गोविन्द गौतमलाई सम्मान गर्न नसकेको आरोप लगाउनुभयो । पुनर्वास नगरपालिकाले शहिद गोविन्द गौतमको सम्मान गर्न सकेन, उहाँले भन्नुभयो । विना कुनै तयारी हतारहतारमा झारा टार्ने किसिमले शहिद दिवस बनाए जस्तो गरेर नगरपालिकाले शहिदको सम्मान गर्न नसकेको उहाँको आरोप छ । कार्यक्रममा बोल्दै नगरसभापति पौडेलले शहिद परिवारलाई सरकारले सम्मान दिन नसक्ने लक्षण देखिएपछि नेपाली कांग्रेसले आन्नन्द बजारमा कार्यक्रम राखेको जानकारी गराउनुभयो । नगरपालिकाले धुमधामका साथ शहिदलाई सम्मान गर्ने कार्यक्रम राखेको भए हामीले छुट्टाछुट्टै कार्यक्रम गर्नुपर्ने थिएन । सत्तामा बसेर सरकारले शहिदलाई बिर्सिएपनी हामीले कहिल्यै बिर्सन सक्दैन । शहिद गौतमलाई हामीले उच्च स्थानमा राख्छौं । उहाँको योगदानलाई कहिल्यै भुल्ने छैनौं ।

नेपाली कांग्रेसको आयोजनामा सम्पन्न भएको कार्यक्रममा पार्टीका धेरै नेताहरुले आफ्नो बिचार राख्नुभएको थियो । प्रदेशसभा सदस्यका प्रत्यासी गोपाल गुरुङ देखि विभिन्न नेताहरुले सरकारको खुलेर आलोचना गरेका थिए । कार्यक्रम दिउँसो १२ बजे देखि सुरु भएर बेलुका ५ बजे सम्म सञ्चालन भएको थियो । कार्यक्रम कञ्चनपुरको पुनर्वास नगरपालिका शहिद गोविन्द गौतम बजार(आन्नन्द बजार)मा राखिएको थियो । २०७३ साल फाल्गुन २६ गते स्थानीय वडा नम्बर ४ का गोविन्द गौतमलाई सीमा क्षेत्रमा भएको भिडन्तमा भारतीय सीमा सुरक्षा बल एसएसबीले गोलि चलाएर हत्या गरेको थियो ।