देशभर कोरोना भाइरसबाट संक्रमितको संख्या १२ हजार नाघ्यो

काठमाडौं, १३ असार ।
देशभर कोरोना भाइरसबाट संक्रमितको संख्या १२ हजार नाघेको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले दिएको जानकारी अनुसार शनिबार मात्रै थप ५ सय ५४ जना नयाँ संक्रमित थपिएसँगै देशभर संक्रमितको संख्या १२ हजार नाघेको हो । नयाँ संक्रमितमा १ सय २० महिला र ४ सय ३४ जना पुरुष रहेका छन् । योसँगै देशभर कूल संक्रमितको संख्या १२ हजार ३ सय ९ पुगेको छ । कूल संक्रमितमध्ये १ हजार ३ सय ६९ महिला र १० हजार ९ सय ४० पुरुष रहेका छन् ।
त्यस्तै अहिलेसम्म देशभर २ लाख १० हजार ८ सय ७६ पीसीआर परीक्षण गरिएको छ भने २ लाख ९४ हजार ३४ आरडीटी परीक्षण गरिएको छ । पछिल्लो २४ घण्टामा ४ हजार ६ सय ६ पीसीआर र ३ हजार ६ सय ८५ आरडीटी परीक्षण गरिएको छ ।
त्यस्तैगरी अहिलेसम्म देशभर क्वारेन्टाइनमा हुनेको संख्या ६५ हजार ७ सय १२ रहेको छ भने ९ हजार ४ सय ४७ जना आइसोलेसनमा रहेका छन् । शनिबार १ सय ३६ जना डिस्चार्ज भएका छन् । योसँगै देशभर डिस्चार्ज हुनेको संख्या २ हजार ८ सय ३४ पुगेको छ । अहिलेसम्म देशभर कोरोना भाइरसको संक्रमणबाट ज्यान गुमाउनेहरुकोे संख्या २८ पुगेको छ । मन्त्रालयले शनिबार थप एक जनाको कोरोना भाइरसका कारण ज्यान गएको पुष्टि गरेको छ । शनिबार ज्यान गुमाउनेमा कैलालीको गोदावरी नगरपालिका–७ का ५० वर्षिय पुरुष रहेका छन् । उनको चितवन मेडिकल कलेजमा उपचारका क्रममा ज्यान गएको हो ।
फोक्सोको क्यान्सरका समेत बिरामी रहेका उनले भारतमा उपचार गराउँदै आएका थिए । भारतबाट फर्किएर चितवन मेडिकल कलेजमा उपचार गराउन आएका उनको आइसोलेसनमा उपचारकै क्रममा शनिबार बिहान मृत्यु भएको थियो । नेपाली सेनाको सहयोगमा शव व्यवस्थापन भइरहेको मन्त्रालयले जनाएको छ । आजदेखि कोरोना भाइरसको संक्रमण ७७ वटै जिल्लामा फैलिएको छ ।