आजै राजधानीका केही तारे होटलसहित साना तथा मझौला होटल तथा रेष्टुरेन्टहरु सञ्चालन आउने भएका छन् । काठमाडौँस्थित साङ्ग्रीला, ¥याडिसन, होटल मल्ललगायत तारे होटलहरुले व्यवसाय सञ्चालनको पूर्ण तयारी गरेका छन् । त्यस्तै अन्य साना तथा पर्यटकमैत्री डिलक्स होटल, रिसोर्ट तथा रेष्टुरेन्टहरुले समेत यतिखेर व्यवसायमा फर्किने तयारी गरिरहेका छन् ।
तर यता होटल व्यवसायीहरुको छाता संगठन होटल एशोसिएशन नेपाल(हान)ले भने सरकारले व्यवसायमा फर्कन आह्वान गरेपनि वातावरण सहज भइनसकेकाले आफुहरु पर्ख र हेरको अवस्थामा रहेको बताएको छ ।
एशोसिएशनको तर्फबाट रातोपाटीसँग कुरा गर्दै अध्यक्ष सिर्जना राणाले कोभिड–१९ को संक्रमण र सन्त्रास रहेकै बेला व्यवसायमा फर्किनु पर्दा बजारको अवस्थालाई हेरेर व्यवसाय सञ्चालन गर्ने बताइन् ।
‘अहिले वातावरण सहज भइसकेको अवस्था होइन । अहिले पनि कोभिड–१९ को संक्रमण र सन्त्रास उत्तिकै छ । कोरोनाको भयकै बीच सरकारले होटल व्यवसाय खोल्नु भनेकाले हामी व्यवसायमा फर्किदै छौँ । तर पूर्णरुपमा व्यवसाय खोल्ने अवस्था अझै बनिसकेको छैन ।’
अध्यक्ष राणाले भनिन्, ‘सरकारले राष्ट्रिय तथा अन्तर्राष्ट्रिय हवाई उडान समेत खोल्ने निर्णय गरेकाले होटलको आवश्यकता र सम्भावनालाई मध्यनजर गर्दै हामी व्यवसायमा फर्किन तयार भएका छौँ, तर आंशिक मात्रै ।’
अध्यक्ष राणाका अनुसार पहिलो चरणमा २० प्रतिशत होटल सञ्चालन ल्याइने तयारी भएको छ । त्यसपछि भने बजार र व्यवसायीक अवस्थालाई हेरेर बाँकी होटलहरु पनि सञ्चालनमा ल्याइनेछ । तर, व्यवसाय संचालन गर्ने÷नगर्ने निर्णय भने स्वःनिर्णयका आधारमा स्वयम् व्यवसायीलाई नै सुम्पिएको अध्यक्ष राणाले बताइन् ।
यता, साना तथा मझौला होटल तथा पर्यटन व्यवसायीहरुले पनि व्यवसाय पुनः सञ्चालनको तीब्र तयारी थालेका छन् । सरकारी निर्णयबमोजिम नै श्रावण १५ गतेदेखि नै व्यवसाय सञ्चालन गर्न विभिन्न संघ संगठनहरुले आफु मातहतमा व्यवसायीहरुलाई आह्वान गरिसकेका छन् ।
यस्तैमा होटल तथा पर्यटन व्यवसायी महासंघले सातै प्रदेश र ७७ वटै जिल्लामा रहेका आफ्ना सदस्य होटल व्यवसायीहरुलाई व्यवसायमा फर्कन आह्वान गरिसकेको छ ।
कोभिड–१९ का कारण व्यवसायमा परेको प्रभाव तथा समस्याका बारेमा सोमबार र मंगलबार राजधानीमा समीक्षा गर्दै महासंघले भावी रणनीतिसहित देशैभरीका होटल व्यवसायीहरुलाई व्यवसायमा फर्कन आह्वान गरेको हो ।
भावी रणनीतिबारे जानकारी दिँदै होटल तथा पर्यटन व्यवसायी संघ बागमती प्रदेशका अध्यक्ष सन्तोष उप्रेतीले अहिलेको विषम परिस्थितिमा होटल व्यवसायमा यावत समस्या भएपनि उक्त समस्यासँग जुधेर भएपनि अघि बढ्ने निर्णय भएको बताए ।
‘अहिले हामी व्यवसायीहरुसँग समस्याका चाङ छन् । कोभिड–१९ सँगै व्यवसाय बन्द हुँदा, सो समयको घर भाडा, कर्मचारी खर्च तथा व्यवसायका लागि गरिएको बैंकिङ्ग लगानीको मुद्दाहरु समस्याका रुपमा छन् । यी विषयहरुलाई व्यवस्थापन गर्न निकै गाह्रो परिरहेको अवस्था छ । र पनि हामीले हरेस मानेका छैनौँ ।’
अध्यक्ष उप्रतीले भने, यी यावत् समस्याहरुलाई फेस गरेर भनेपनि हामी पुनः व्यवसायमा फर्किन्छौँ । अहिले हामी व्यवसायीहरु बीच यसै खालको सहमति भएको छ । बाँकी समस्याहरु विस्तारै सल्टाउँदै जाने छौँ,’ उप्रेतीले भने ।
आन्तरिक पर्यटक लक्षित समूह
लामो समयको बन्द पश्चात हालै मात्र सञ्चालनमा आउन लागेका होटल व्यवसायहरु तत्कालका लागि आन्तरिक पर्यटक केन्द्रित हुने भएका छन् । कोभिड–१९ को संक्रमण र सन्त्रास कायमै रहेका बेला अन्तर्राष्ट्रिय पर्यटकहरु आउने कमै सम्भावना रहेकाले यस्तो रणनीति अपनाइएको हानको भनाइ छ ।
त्यसो त अहिलेको कोभिड–१९ को महामारी कायम रहेकै बेला अन्तर्राष्ट्रिय बजारमा समेत आन्तरिक पर्यटनलाई प्रबद्र्धन गर्ने नीति अङ्गिकार गरिरहेका बेला नेपालमा समेत आन्तरिक पर्यटकहरुले उत्साह देखाएकाले यस्तो रणनीति बनाइएको अध्यक्ष राणाले बताइन् ।
‘अहिलेको परिस्थितिमा बाह्य पर्यटकहरुको आगमन हुने सम्भावना अत्यन्त न्यून छ । यस्तो अवस्थामा मुलुकको पर्यटन क्षेत्र चलायमान राख्न पनि आन्तरिक पर्यटकलाई प्रोत्साहन गर्नुपर्नेछ । त्यसैले अहिले हामीले हाम्रो टार्गेट ग्रुप नै डोमेष्टिक पर्यटकलाई बनाएका छौँ ।
अध्यक्ष राणाले भनिन्, ‘यसै बाध्यात्मक परिस्थितिलाई नै मध्यनजर गर्दै हामीले हाम्रा सबै सदस्य होटल व्यवसायीहरुलाई आन्तरिक पर्यटक लक्षित कार्यक्रमहरु ल्याउनसमेत भनिसकेका छौँ । आन्तरिक पर्यटक लक्षित कार्यक्रम तथा प्याकेजले केही हदसम्म व्यवसायमा ताजापन ल्याउनेछ भन्ने हाम्रो अपेक्षा हो,’ अध्यक्ष राणाले भनिन् ।
सुविधाभन्दा सुरक्षामा ध्यान दिने
कोरोनाको सन्त्रास कायमै रहेका बेला व्यवसाय सञ्चालन गर्न लागेका व्यवसायीहरुले होटलको सुविधामा भन्दा पनि सुरक्षामा बढी ध्यान केन्द्रित गर्ने बताएका छन् । महामारीको बेला होटलमा आउने पाहुनालाई ‘लग्जरियस्’ सेवा सुविधाको साटो स्वास्थ्य सुरक्षाको प्रत्याभूति गराइने होटल एशोसिएशन नेपाल(हान)का अध्यक्ष सिर्जना राणाले बताइन् ।
विश्व स्वास्थ्य संगठन(डब्लुएचओ)ले निर्धारण गरेको स्वास्थ्य सुरक्षासम्बन्धी जुन प्रोटोकल छ, त्यसै प्रोटोकललाई आधार बनाएर नेपाल सरकारले कोभिड सुरक्षा प्रोटोकल बनाएको छ । यो नै अहिलेको सुरक्षाको उपयुक्त विकल्प हो । ‘हामी पनि यसलाई आधार मानेर जान्छौँ । हाम्रा सबै सदस्य होटलहरुले यो प्रोटोकललाई पालन गर्ने छन्,’ अध्यक्ष राणाले भनिन् ।
अध्यक्ष राणाका अनुसार सुरक्षा संवेदनशीलतालाई नै ध्यानमा राख्दै होटल व्यवस्थापकहरुले कर्मचारीहरुलाई आवश्यक सुरक्षा तालिमको प्रवन्ध समेत गरिएको छ । यता, व्यवसायीहरु जेजस्तो भएपनि अब भने व्यवसायमा फर्कने ईच्छा देखाएका छन् ।
सरकारले गत श्रावण ५ गते लकडाउन सम्बन्धि निर्णय गर्दै श्रावण १५ गते देखि सबै खाले होटल, पर्यटन तथा ट्रेकिङ व्यवसायहरु खोल्न दिने निर्णय गरेको थियो ।
साथै भाद्र १ गते देखि लामो दुरीका सबै खाले सार्वजनिक यातायातका साधन र आन्तरिक र बाह्य सबै व्यवसायीक हवाई उडानसमेत खुल्ला गर्ने सरकारले निर्णय गरेको छ ।
No comments:
Post a Comment