बेलौरीको महाकाली बहुमुखी क्याम्पस नमूना क्याम्पस छनौट

कञ्चनपुर, १४ साउन ।
बेलौरीको महाकाली बहुमुखी क्याम्पस नमूना क्याम्पसका लागि छनौट भएको छ । मंगलबार सुदूरपश्चिम प्रदेश सरकारको सामाजिक विकास मन्त्रालय अन्तर्गतको उच्च शिक्षा महाशाखाले नमूना क्याम्पसका लागि छनौट भएका क्याम्पसहरुको सुचि प्रकाशन गरेको हो । प्रदेश सरकारको सामाजिक विकास मन्त्रालयले सुदूरपश्चिमका ९ वटा क्याम्पसहरुलाई नमूना क्याम्पसका लागि छनौट गरेको छ ।

नमुना क्याम्पसमा स्तरोन्नतिका लागि छनौट भएका क्याम्पसहरुमा कञ्चनपुरबाट बेलौरीस्थित महाकाली बहुमुखी क्याम्पस, कैलालीबाट सुख्खडस्थित घोडाघोडी बहुमुखी क्याम्पस, अछाम बहुमुखी क्याम्पस मंगलसेन अछाम, त्रिवेणी बहुमुखी क्याम्पस जोगबुडा डडेल्धुरा, केदारज्योतीकुञ्ज बहुमुखी क्याम्पस विपिनगर डोटी, दार्चुला बहुमुखी क्याम्पस महाकाली दार्चुला, सुनकुडा बहुमुखी क्याम्पस बित्थडचिर बझाङ, बाजुरा बहुमुखी क्याम्पस मार्तडी बाजुरा र जगन्नाथ बहुमुखी क्याम्पस बैतडी रहेका छन् ।

 मन्त्रालयको गतवर्ष पुस ४ गतेको सूचना अनुसार नमूना क्याम्पसमा स्तरोन्नतिका लागि मन्त्रालयमा प्रस्ताव पेश गर्ने जम्मा ४३ वटा क्याम्पसहरुमध्ये गत असार ३० गतेको मन्त्रीस्तरीय निर्णयबाट प्रदेशका नौ वटै जिल्लाका एकएक गरी ९ वटा क्याम्पसहरुलाई नमूना क्याम्पसमा स्तरोन्नति गरिएको बताइएको छ ।

 महाकाली बहुमुखी क्याम्पसका सञ्चालक समिति अध्यक्ष हरेन्द्र सिंह बिष्टले आफ्नो कार्यकालमा सो क्याम्पस नमूना क्याम्पसमा स्तरोन्नतिका लागि छनौट भएकामा गर्भान्वित भएको बताउँदै अब अन्तर्राष्ट्रिय स्तरको शिक्षा यहाँका विद्यार्थीहरुले यहीँबाट हाँसिल गर्न पाउने बताए । उनले विश्वविद्यालय अनुदान आयोगले क्याम्पसको स्तरोन्नतिका लागि पहिलो चरणमा भए गरेका कार्यको सफलता हेरी २ लाख रुपैयाँ अनुदान दिएको र यहाँसम्म आइपुग्न साथ दिने सम्पूर्णप्रति आभार व्यक्त गर्दै आगामी दिनहरुमा पनि सहयोगको अपेक्षा गरिएको जनाएका छन् ।

 यस्तै, सामाजिक सञ्जाल फेसबुकमा महाकाली बहुमुखी क्याम्पसका शिक्षक सुरज श्रेष्ठ लेख्नुहुन्छ - "यस क्याम्पसलाई नमुना क्याम्पसमा स्तरोन्नति गर्नका निमित्त छनौट गर्न र सफल बनाउन अथक प्रयास गर्नुहुने क्याम्पस  परिवार, क्याम्पस सञ्चालक समिति, जनप्रतिनिधि, वुद्धिजिवी, बेलौरी नगरवासी, सञ्चार माध्यम लगायत विशेष गरी सुदूरपश्चिम प्रदेश सामाजिक विकास मन्त्रालयका मन्त्री माननीय कृष्णराज सुवेदी प्रति हार्दिक आभार व्यक्त गर्दर्छौं।"