आज युवाकवि मोतीराम भट्टको १५५ औं जन्म जयन्ती

युवाकवि मोतीराम भट्टको १५५ औं जन्म जयन्ती विभिन्न कार्यक्रम आयोजना गरेर आज मनाइँदैछ । आज साहित्यकार तथा साहित्यिक प्रतिष्ठानहरूले उनको व्यक्तित्व तथा कृतित्वमाथि विश्लेषण गर्दै जन्मजयन्ती मनाउँदैछन् ।
राष्ट्रिय विभूतिसमेत रहेका भट्टको १ सय ५४ वर्ष पहिले वि.सं. १९२३ भाद्र कृष्ण औंसी अर्थात् कुशे औंसीकै दिन जन्म भएको थियो । नेपाली गजलका महानायक मानिएका भट्टको कथा, नाटक, निबन्धमा पनि कलम त्यत्तिकै बलियोरुपमा चलेको थियो । कुशेऔंसीका दिन जन्मेका उनको १९५३ सालको कुशेऔंसीकै दिन ३० वर्षको अल्पायुमै निधन भएको थियो । श्रृंगार रसलाई केन्द्रबिन्दुमा राखेर उनले गजल रचना गरेका थिए ।
युवाकवि भट्टले आदिकवि भानुभक्तको जीवनी पहिलोपटक प्रकाशनमा ल्याएका थिए । उनको साहित्य रचना मात्र नभई पत्रकारितामा पनि हात चलेको पुराना साहित्यकारहरू बताउँछन् । उनले नेपाली भाषाको पहिलो पत्रिका ‘गोर्खा भारत जीवन’ प्रकाशित गरेका थिए । तत्कालिन समयमा गरेको उनको योगदान नेपाली साहित्यमा अतुलनिय छ । यस वर्ष विगत जसरी उनको जन्मदिनमा कार्यक्रमहरु भने नहुने भएको छ । कोरोना संक्रमणको डरसँगै औपचारिक कार्यक्रम नहुने भए पनि उनको सम्झना गरिंदैछ ।