सभासद तारालामा तामाङद्वारा पुनर्वास ४ स्थित दुर्गा माविको नवनिर्मित भवन उदघाटन

-यम प्रसाद आचार्य
कञ्चनपुर, ६ भदौ ।
प्रदेश सभासद तथा नेकपा सु.प.सचेतक तारालामा तामाङले पुनर्वास ४, जनकबस्ती स्थित दुर्गा माध्यमिक विद्यालयको नवनिर्मित चारकोठे पक्की भवनको शुक्रबार एक कार्यक्रम बिच उदघाटन गर्नुभयो । सभासद तामाङको पहलमा सुदुरपश्चिम प्रदेश सामाजिक विकास मन्त्रालयको क्षेत्रीय शिक्षा विकास निर्देशनालय मार्फत प्राप्त हुन आएको ३६ लाख लागतमा सो भवन बनेको हो ।

विद्यालयका प्रधानाध्यापक बिनोद चन्दले उपस्थित सबैलाई स्वागत गर्नुहुँदै विद्यालयको नयाँ भवनको लागि बजेट पार्न सकृय भूमिका निभाउनु भएकोमा प्रदेश सभासद तारालामा तामाङलाई विद्यालय परीवारका तर्फबाट धन्यवाद ज्ञापन गर्नुभयो ।

जेठ मसान्तसम्म बन्ने योजना रहेपनी कोरोना महामारीका कारण भवन निर्माणमा निकै समस्या भएको र समस्याका बावजुद पनि भवन निर्माणमा सक्रियता देखाई समयमै सम्पन्न गरेकोमा निर्माण पक्षलाई विद्यालय व्यवस्थापन समितिका अध्यक्ष पुर्णा कुमारी गुरुङले धन्यवाद दिनुभयो ।

जिल्ला समन्वय समिति कञ्चनपुरका अध्यक्ष फैरु तामाङले विद्यालयलाई वर्तमान अवस्थासम्म ल्याइपुरयाउन सक्रिय भूमिका निभाउने सबैलाई धन्यवाद दिदै आफ्नो तर्फबाट हुने सहयोगका लागि आफू सदा तयार रहेको बताउनुभयो ।

प्रदेश सभासद तारालामा तामाङले दुर्गा मा.वि.को स्टाफलाई विद्यार्थीको पढाईको गुणस्तर सुधार्नतिर केन्द्रित हुन आग्रह गर्नुभयो । उहाँले समयमै विद्यालय भवन निर्माण सम्पन्न गरेर सहयोग गर्नुभएका निर्माण पक्षलाई विशेष धन्यवाद समेत दिनुभएको थियोे ।