प्रदेश सभा सदस्य तारालामा तामाङद्वारा दोदा नदि माथि निर्मित झोलुङ्गे पुलको उद्घाटन

 कञ्चनपुर, १७ पुस ।

प्रदेश सभा सदस्य तारालामा तामाङले कञ्चनपुरको दोदा नदि माथि निर्मित झोलुङ्गे पुलको उद्घाटन गर्नुभएको छ । लालझाडी गाँउपालिका वडानम्बर १ बिनवारी र पुनर्वास नगरपालिका वडा नम्बर २ अमरैया जोड्ने दोदा नदि माथि निर्मित झोलुङ्गे पुलको शुक्रबार उद्घाटन गरिएको हो । सुदूरपश्चिम प्रदेशको भौतिक पूर्वाधार विकास मन्त्रालय अन्तर्गत पुर्वाधार विकास कार्यालय कञ्चनपुर मार्फत झोलुङ्गे पुल निर्माण गरिएको हो । पुनर्वास नगरपालिकाका नगर प्रमुख जीवनराज थापा र लालझाडी गाउँपालिकाका अध्यक्ष मदनसेन बडायकको सो अवसरमा उपस्थिति रहेको थियोे ।

करीब १ करोड ९९ लाख लागत खर्चमा दुई सय मिटर भन्दाबढी लम्बाईको झोलुङ्गे पुल निर्माण भएको पुर्वाधार विकास कार्यालय कञ्चनपुरका सूचना अधिकारी खेमराज भट्टले बताउनु भयो ।

पुल निर्माणसँगै सामाजिक, आर्थिक एव सांस्कृतिक गतिविधिमा सहजता भएको स्थानीयको भनाइ छ । लालझाडी गाँउपालिकाका अध्यक्ष मदनसेन बडायकले दोदा नदि माथि तीन ओटा पुल निर्माणका लागि संघीय सरकार समक्ष माग गरेको बताउनु भयो । लालझाडीसँग जोडिएका पुनर्वास र बेलौरीका केही स्थानमा दोदा नदिमाथि स्थानीयले बाँसका अस्थायी पुल बनाएका छन् । जहाँबाट ओहोरदोहोर गरेको समेत केही शुल्क तिर्नुपर्ने बाध्यता रहेको छ ।

एनबी खबरबाट।