कञ्चनपुर,१९, असार ।
पुनर्वास नगरपालिका वडा नं १० मा रहेको कुण्डा सव-डिभिजन वन कार्यालय पचगडियाले निशुल्क बिरुवा वितरण गरेको छ । पुनर्वास नगरपालिका र डिभिजन वन कार्यालय कञ्चनपुरको आर्थिक सहयोग र कुण्डा सव-डिभिजन वन कार्यालय पचकडियाको सहकार्यमा उत्पादन भएका विरुवाहरू आज निशुल्क वितरण गरिएको हो।
कुण्डा सव-डिभिजन वन कार्यालयका प्रमुख दिनेश कुमार यादवको अध्यक्षतामा आयोजित निशुल्क बिरुवा वितरण कार्यक्रममा पुनर्वास नगरपालिकाका नगर प्रमुख तोयप्रसाद शर्माको प्रमुख आतिथ्य र उपप्रमुख भुलिया कुमारी रानाको विशिष्ट आथित्य रहेको थियो।
अतिथिमा रुपमा वडा नं ६ का वडाध्यक्ष मित्रसिंह लामा,वडानम्बर १० का वडाध्यक्ष सुकदेव राना , ईलाका प्रहरी कार्यालय त्रिभुवन बस्तीका ईञ्चार्ज प्रहरी निरीक्षक नरेशराज मल्ल ,स्थानिय वडा सदस्यहरु, समाजसेवी , बुद्धिजीवी र कृषकहरूको उपस्थिति रहेको थियो। नगरपालिकालाई हरियाली र सुन्दर बनाउने उद्धेश्यले "सन्ततिका लागि सोचौ, समृद्धि र हरियाली को लागि वृक्षारोपण गरौ" भन्ने मुल नाराका साथ नगर र वन कार्यालयको वार्षिक कार्यक्रम अन्तर्गत १ लाख विरूवा उत्पादन गरि निशुल्क रूपमा वितरण गर्न लागेको कुण्डा सव वन डिभिजन कार्यालय पचगडियाका प्रमुख यादवले जानकारी दिनुभयो ।
प्रमुख अतिथिको रूपमा रहेका नगर प्रमुख तोय प्रसाद शर्माले "हरियो वन नेपालको धन” भन्ने मूल मन्त्र लाई अंगीकार गर्दे वृक्षरोपण फेसनका लागि होइन रोपेको बिरुवा जोगाउन जरुरी भएको बताउनुभयो ।
यसैगरी बिरूवा वितरण कार्यक्रममा नगर उपप्रमुख भुलिया कुमारी रानाले नर्सरी उत्पादन निकैनै राम्रो भएको र यस कार्यमा अहोरात्र खटिएका वन कार्यालय परिवार र कुण्डा सव डिभिजन वन कार्यालय प्रमुख दिनेश कुमार यादवलाई धन्यवाद ज्ञापन गर्नुभएको थियो।
कार्यालयद्बारा उत्पादन गरिएका बिरुवाहरूमा टिक,अमला,मसला, बकाइनो, जामुन,टाकी, निम, पारिजात प्रजातिको रहेको छ। बिरूवा वितरण गर्दा सहज बनाउन बिरूवा लिन आउने सेवाग्राहीले ५० गोटा बिरुवा को लागि नेपाली नागरिकताको प्रतिलिपि, ५१ गोटा देखि २९९ गोटा सम्म जग्गाधनी प्रमाण पत्र को प्रतिलिपि,३०० गोटा देखि माथि सम्बन्धित वडा कार्यालयको सिफारिस पेश गर्नुपर्ने र संघसस्थाको लागि प्रावधान रहेको कुण्डा सव-डिभिजन कार्यालय पचगडियाका प्रमुख यादवले बताए। वन कार्यालयले हरेक वर्ष विभिन्न प्रजातिका बिरुवा उत्पादन गरेर विभिन्न क्षेत्रमा निःशुल्करूपमा वितरण तथा बन जङ्गल क्षेत्रमा वृक्षारोपण गर्दै आइरहेको छ ।
No comments:
Post a Comment