कञ्चनपुरको दक्षिणी क्षेत्र डुबानमा

कञ्चनपुर/दोदानदीमा आएको बाढीले कञ्चनपुरका दर्जनौँ गाउँबस्ती डुबानमा परेका छन्। चार दिनदेखि अविरल परिरहेको भीषण वर्षाले दोदानदीमा बाढी आएपछि बस्ती डुबानमा परेका हुन्।

गएरातिदेखि दोदानदीले लालझाडी, बेलौरी र पुनर्वास नगरका दर्जनौँ गाउँबस्ती डुबानमा परेका छन्। दोदानदी गाउँ पस्दा लालझाडीको कञ्ज, बेलौरीको भकुण्डा, पुनर्वास– ५ सिमरी, रातोपुल, पुनर्वास– २ मोतीबस्तीका सयौँ घर डुबानमा परेका छन्।

दोदानदी गाउँ पस्दा पूर्व–पश्चिम र हुलाकी राजमार्गसमेत अवरुद्ध भएको छ।

दोदाबाट विस्थापित भएका घरपरिवारलाई पुनर्वास– ५ चन्द्रवाला आधारभूत विद्यालयमा राखिएको छ। पुनर्वास नगरपालिका विपत् व्यवस्थापन संयोजक होमनाथ ढकालले बाढीबाट विस्थापितलाई सुरक्षित स्थानमा सारिएको बताए।