‘प्रवेश तामाङ हत्या काण्ड’ मा आरोपित ६ जनालाई नियन्त्रणमा लिइ अनुसन्धान सुरु, ८ जना विरुद्ध किटानी जाहेरी, ४ जना अझै फरार

हेमन्त न्यौपाने
पुनर्वास, जेठ १३

      पुनर्वास नगरपालिका वडा न. २ अरनिकोबस्ती निवासी उद्योगपति यम बहादुर तामाङका २२ बर्षिय छोरा प्रवेश तामाङ(काले)को बुधबार बीभत्स हत्या भएको प्रहरी मुचुल्काबाट खुल्न आएको छ । हत्यामा संलग्न रहेको आशंकामा प्रहरीले मृतकका बुवा, हजुरबुवा, हजुरआमा, सुबेदार तामाङ, मायावती तामाङ र राम बहादुर तामाङलाई नियन्त्रणमा लिएर प्रारम्भिक अनुसन्धान सुरु गरेको ईलाका प्रहरी कार्यालय त्रिभुवनबस्तीका प्रहरी प्रमुख प्रहरी निरीक्षक दलराम टमाटाले बताउनुभयो ।  

मृतक प्रवेश तामाङकी आमा बेतमाया कंडेलका मामा पुनर्वास नगरपालिका वडा नम्बर ४ निवासी राम बहादुर थापाले दिनुभएको किटानी जाहेरीमा अपराधमा संलग्न व्यक्तिहरु कञ्चनपुर जिल्ला पुनर्वास नगरपालिका वडा नम्बर २ अरनिकोबस्ती बस्ने सुब्बा तामाङको छोरा ५० बर्षिय राम बहादुर तामाङ, मृतकका बुवा यम बहादुर तामाङ, चेता तामाङको ३५ बर्षिय छोरा सुबेदार तामाङ, मृतकका बुवा यम बहादुर तामाङकी जेठी श्रीमती गीता तामाङ(उर्जु), विशाल तामाङको श्रीमती मायावती तामाङ, धेनलामा तामाङको २५ बर्षिय छोरा नोलामा तामाङ भन्ने दिपेश तामाङ, दिपेश तामाङको श्रीमती भाईली तामाङ भन्ने भमिता तामाङ, तर्लम तामाङको ३७ बर्षिय छोरा सागर तामाङ गरि पहिलो जाहेरीमा बुवा मात्र र शुक्रबार साँझ दिनुभएको पछिल्लो जाहेरीमा ७ जना थप गरि ८ जना विरुद्ध किटानी जाहेरी दिनुभएको छ ।

किटानी जाहेरीमा उल्लेख भएका ४ जना व्यक्तिहरु मृतककी सौतेनीआमा गीता तामाङ, भमिता तामाङ, दिपेश तामाङ र सागर तामाङ अहिलेसम्म फरार रहेको प्रहरीले बताएको छ । बुधबार मृतक प्रवेश तामाङलाई कटहरको रुखमा बाधेर निर्मम तरिकाले कुटपिट भएको स्थानीयहरुले बताए । शव परिक्षण गर्दा आँखा फुटेको, टाउकोमा ठुलाठुला चोट लागेको, छातीमा चोट, हात भाँचिएको र अण्डकोष फुटेको पाईएको मृतकका आफन्त राम बहादुर थापाले बताए ।

हत्याको जिम्मा अपांग समेत रहेका मृतकका हजुरबुवा कान्छा तामाङ एक्लैले लिएपछी घटना झनै शंकास्पद बनेको छ । प्रहरीले बुधबार प्रहरी सम्पर्कमा नआएका मृतकको बुवा यम बहादुर तामाङलाई विहिबार नियन्त्रणमा लिएर जिल्ला प्रहरी कार्यालय पठाएको छभने अन्य व्यक्तिहरुलाई शुक्रबार र शनिबार नियन्त्रणमा लिएको हो ।

पत्रकारसंगको कुराकानीमा मृतकका हजुरबुवा कान्छा तामाङले सुरुमा आफुले हत्या नगरेको बताएपनि पछि स्वीकार गरेका छन । उनले आफुले ईट्टा प्रयोग गरी आफ्नै नातिको हत्या गरेको बताए । धेरै झगडा गर्ने, निउ खोज्ने गरेपछि इट्टा हान्न आफू बाध्य भएको बताए । मृतककी आमा बेतमाया कंडेल यम बहादुर तामाङलाई छोडी अर्कै व्यक्तिसंग बिहेगरि हाल वैदेशिक रोजगारीमा हुनुहुन्छ  ।