बेलडांडी गाउँपालिकामा आधारभूत तह स्तरीय अध्यक्ष कप शुरू

हरिश चन्द्र बाग
कञ्चनपुर, ०५ माघ
    कञ्चनपुरको बेलडांडी गाउँपालिकामा आधारभूत तह स्तरीय अध्यक्ष कप शुरू भएको छ । एन्. प्याब्सन बेलडांडी युनिटको आयोजना तथा बेलडांडी गाउँपालिकाको विशेष सहयोगमा शनिबारदेखि  आधारभुत  तह स्तरीय अध्यक्ष कप सुरु भएको हो । 

गाउँपालिका क्षेत्र भित्र रहेका विभिन्न विद्यालयहरूको सहभागितामा सञ्चालित कार्यक्रमलाई सम्बोधन गर्दै प्रमुख अतिथि समेत रहनुभएका बेलडांडी गाउँपालिकाका अध्यक्ष धन बहादुर थापा क्षेत्रीले उक्त कार्यक्रममा सहकार्य गर्न पाउँदा खुसी व्यक्त गर्दै प्रतियोगिता सभ्य र भव्य रुपमा सफल होस् भनी शुभकामना प्रदान गर्नुभयो । उहाँले आगामी दिनमा अन्य क्षेत्रबाट पनि यस्ता किसिमका कार्यक्रम आउन जरुरी रहेको उल्लेख गर्नुभएको छ । 

त्यस्तै, वडा नं. २ का वडाध्यक्ष प्रेम राज खातीले एन्. प्याब्सन द्वारा सुरुवात गरिएको अध्यक्ष कपमा सबैले साथ र सहयोग गर्नुपर्ने धारणा राख्नुभएको थियो । एन्. प्याब्सन कञ्चनपुरका कोषाध्यक्ष दीपक चन्दले पनि एन्. प्याब्सन बेलडांडी युनिटले सुरुवात गरेको प्रतियोगिताको खुलेरै प्रसंशा गर्नुभयो ।एन्. प्याब्सन बेलडांडीका संयोजक गोरख बहादुर चन्दको अध्यक्षतामा सञ्चालित उद्घाटन कार्यक्रममा प्रमुख अतिथि बेलडांडी गाउँपालिकाका अध्यक्ष धन बहादुर थापा क्षेत्री, विशिष्ट अतिथी बेलडांडी गाउँपालिकाका उपाध्यक्ष कमला कार्की सहित वडा नं. १ र २ का वडा अध्यक्षहरू, एन्.प्याब्सन कञ्चनपुरका कोषाध्यक्ष दीपक चन्द, वडा सदस्य शंकर भट्ट सहित प्रतियोगितामा सहभागी ८ वटा विद्यालयका शिक्षक, विद्यार्थीहरुको उपस्थिति रहेको थियो ।