पुनर्वासका विपन्न महिलाहरू घरेलु प्याड र सुधारिएको चुलो बनाउने तालिम लिदै

 -धन बहादुर विक कञ्चनपुरको पुनर्वास नगरपालिका वडा नम्बर ५ का विपन्न महिलाहरूका लागि घरेलु प्याड र सुधारिएको चुलो बनाउने तालिम सञ्चालन गरिएको छ । वडा कार्यालयको आयोजना र सुआहारा कञ्चनपुरको प्रविधिक सहयोगमा उक्त कार्यक्रम संचालन गरिएको हो । ग्रामीण भेगमा रहेका अतिविपन्न तथा सामाजिक रूपमा पछाडि पारिएका महिलाहरूको स्वास्थ्यमा सहयोग पुगोस् भन्ने उद्देश्यका साथ आयोजना गरिएको उक्त तालिममा वडाका करिब ८ सय महिलाले प्रत्यक्ष रूपमा लाभ लिने पुनर्वास नगरपालिका वडा नम्बर ५ का वडा अध्यक्ष वीर बहादुर बोगटीले बताउनु भयो । प्रति एक टोलका करिब ४० जना महिला गरी वडा भरीका जम्मा २० ओटा टोली बनाई उक्त तालिम सञ्चालन गरिएको छ । तालिम निकै उपयोगी भएको सहभागी तारा बोगटीले बताउनु भयो । तालिममा घरेलु प्याड बनाउन सिकेपछि आफुले पनि प्रयोग गर्ने र गाउँका अरूहरुलाई पनि यो विधि सिकाउने अर्का सहभागी बेलु देउवाले बताउनु भयो । चेतनाको अभावमा ग्रामीण भेगका विपन्न महिलाहरूले स्वास्थ्य सरसफाईमा ध्यान पुर्याउन नसक्दा विभिन्न रोगको सामना गर्नुपर्ने भएको हुँदा यस तालिमको आयोजना गरिएको पुनर्वास नगर कार्यपालिकाका सदस्य एवं सामाजिक विकास समितिका संयोजक सुरेश गजुरेलले जानकारी दिनुभयो । महिलाहरूले महिनावारी हुँदा स्वच्छता सम्बन्धी जानकारीको अभावमा अनेकौँ रोगको सामना गर्नुपरेको र वडा कार्यालयले आयोजना गरेको यस किसिमको रचनात्मक कार्यक्रममा सहयोग गर्न पाउँदा आफुहरु उत्साहित भएको सुआहारा नेपाल वास अधिकृत सरस्वती पुरी बमले बताउनु भयो । पुनर्वास नगरपालिकाका महिलाहरुको सामाजिक, आर्थिक, स्वास्थ्य जस्ता आधारभूत क्षेत्रमा विकास गर्न नगरले पुरा सहयोग गर्ने, यस्ता रचनात्मक कार्यक्रम प्रत्येक वडाका विपन्न महिला दिदिबहिनीहरुलाई अति आवश्यक भएको नगर प्रमुख जिवनराज थापाले बताउनु भयो । वडाको प्रत्येक टोलमा २० दिनसम्म सञ्चालन गरिने तालिमको उद्घाटन सोमबारका दिन नगर प्रमुख जिवनराज थापाले गर्नुभएको थियोे । कार्यक्रममा नगर उपप्रमुख शारदा बिष्ट शर्मा, वडाध्यक्ष बीर बहादुर बोगटी, वडा सदस्यहरु, सुआहारा कञ्चनपुरका कार्यक्रम संयोजक विकास रोकाया, सुआहारा वास अधिकृत सरस्वती पुरी बम लगायतको उपस्थिति रहेको थियोे । कार्यक्रमको सञ्चालन कार्यपालिका सदस्य शकुन्तला क्षेत्रीले गर्नुभएको थियोे ।