पुनर्वास नगरपालिकाको चौंथो नगरसभा सम्पन्न

हेमन्त न्यौपाने 
पुनर्वास, चैत १६ 
      पुनर्वास नगरपालिकाले शनिबार चौंथो नगरसभा सम्पन्न गरेको छ । नगरपालिकाको सभाहलमा सम्पन्न कार्यक्रममा नगरप्रमुख जीवनराज थापाले चौंथो नगरसभा कार्यक्रमलाई सफल बनाउन शुभकामना व्यक्त गर्नुभयो । नगरप्रमुख थापाले पुनर्वास नगरपालिकाले चालू आर्थिक बर्ष २०७५/७६ को बजेटबाट फाल्गुन मसान्तसम्ममा ५३.३२ प्रतिशत मात्र खर्च भएको बताउनुभयो । २९ करोड ७४ लाख चालु बार्षिक बजेटबाट १५ करोड ५० लाख सात हजार दुई सय ८८ रुपैयाँ २६ पैसा खर्च भएको छभने १३ करोड ५७ लाख ३२ हजार ७ सय एघार रुपैयाँ ७४ पैसा बाकी रहेको छ ।

त्यस्तै, पुँजिगत तर्फ २७ करोड १० लाख ९५ हजार छ सय ३७ रुपैया बार्षिक बजेट रहेकोमा ५ करोड ६२ लाख ७९ हजार छ सय २७ रुपैया ३९ पैसा खर्च भएको छभने २१ करोड ४८ लाख १६ हजार नौ रुपैयाँ ६१ पैसा बाकी बजेट रहेको छ । जुन २०.७६ प्रतिशत रहेको छ ।

कुल ५६ करोड १८ लाख ३५ हजार छ सय ३७ रुपैया बजेटमा २१ करोड १२ लाख ८६ हजार नौ सय १५ रुपैयाँ ६५ पैसा खर्च भएको छ । यस आर्थिक बर्षको बाकी बजेट ३५ करोड पाँच लाख ४८ हजार सात सय २१ रुपैया ३५ पैसा रहेको छ । जुन ३७.०३ प्रतिशत हुन्छ ।

५७ जना नगर कार्यपालिका सदस्यहरु मध्य १४ जना नगर कार्यपालिका सदस्यहरुले नगरसभा बहिष्कार गरेका थिए । वडाहरुका लागि टुक्रे तथा साना योजनाहरुमा सबै वडालाई बराबर बजेट दिनुपर्ने माग राख्दै उनीहरुले नगरसभा बहिस्कार गरेको बताउनुभयो ।

पुनर्वास नगरपालिका वडा नम्बर ११ का अध्यक्ष तुलसी अर्यालले भन्नुभयो “टुक्रे बजेट दिँदा सबै वडाहरुलाई बराबर दिन नसक्ने भन्दै पेलेर लगेपछि हामी बाहिर आएका हौं । ” वडा नम्बर ८ का वडाअध्यक्ष राना श्रावणले पनि समानरुपमा बजेट विनियोजन नभएकाले आफुहरु बाहिर निस्किएको बताउनुभयो । वडा नम्बर ११ का वडासदस्य रामचन्द्र भट्टराईले नगरसभा समयमा सञ्चालन हुन नसक्नु, बजेट बाडफाँडमा विभेद हुनु जस्ता क्रियाकलापले गर्दा नगरसभा बहिस्कार गर्नुपरेको बताउनुभयो । नगरसभा बहिस्कार गर्ने कार्यपालिका सदस्यहरुमा वडा नम्बर ४ का वडाअध्यक्ष प्रेम बहादुर बस्नेतले वडामा बजेट कम भएको भनि नगरसभा बहिस्कार गर्दा तीन जना वडासदस्य भने सन्तुष्ट देखिए । त्यस्तै, वडा नम्बर ६ का वडाअध्यक्ष मन बहादुर गुरुङ बजेट विनियोजनमा सन्तुष्ट देखिनुभयोभने उहाँ नगरसभामा सहभागी भईरहदा सोही वडाका केहि वडासदस्यहरुभने असन्तुष्टि व्यक्त गर्दै नगरसभा बहिस्कार गरेका थिए ।

नगरसभा उद्घाटन सत्र कार्यक्रममा उपस्थित हुनुभएका नेकपा सुदुरपश्चिम प्रदेश कमिटि संसदीय दलका प्रमुख सचेतक तथा कञ्चनपुर क्षेत्र नम्बर १ (क) बाट निर्वाचित सांसद तारालामा तामाङले प्रदेश सरकार र आफ्नो तर्फबाट धेरै भन्दा धेरै काम गर्न प्रयासरत रहेको बताउनुभयो । उहाँले नगरसभाको सफलताको कामना गर्दै पुनर्वास नगरपालिकाको चौतर्फी विकास हुनुपर्ने धारणा राख्नुभएको थियो । नगरप्रमुख जीवनराज थापाले यस नगरको नगरप्रमुख अहिले आफु भएतापनी भावी नगरप्रमुख तपाईंहरु नै हो भन्दै नगरको विकासमा सवैले आफ्नोआफ्नो तर्फबाट सहयोग गर्न आग्रह गर्नुभयो । उहाँले समेट्न बाकी रहेका कुराहरुसमेत छलफलमा ल्याएर समेट्न सकिने हुँदा प्रष्ट छलफल गरि अधि बढ्नुपर्ने बताउनुभयो । उहाँले संघीय सरकार र प्रदेश सरकारबाट पनि धेरै भन्दा धेरै योजनाहरु ल्याउन पहलकदमी भईरहेको जानकारी गराउनुभयो । उहाँले भन्नुभयो “पटकपटक डेलिगेसन गएर भनेका छौं । भन्न छोडेका छैनौं, अझ धेरै विकास गर्न हामी लागिरहेका छौं । ” भन्दै आफ्नो शुभकामना मन्तव्य राख्नुभएको थियो ।