भारत बाट कंचनपुरमा हात्तीको झुन्ड प्रवेश, सतर्कता अपनाउन सबैलाई अपिल ।

कञ्चनपुर, साउन ६ - 

 कञ्चनपुरमा १० देखि १५ वटा जंगली हात्तीको झुण्ड प्रवेश गरेको छ।

 भारतको दुधवा नेशनल पार्क लगायतका स्थानबाट लालझाडी संरक्षित वन भएर शुक्लाफाँटा राष्ट्रिय निकुञ्ज र सोको मध्यवर्ती क्षेत्रमा हात्तीको झुण्ड प्रवेश गरेको जिल्ला प्रशासन कार्यालय कञ्चनपुरले जनाएको छ । 

 मगलबार एक सूचना जारी गर्दै प्रशासनले जंगली हात्तीको झुण्ड दिउँसो जंगलमा बस्ने र साँझ तथा रातिको समयमा मध्यवर्ती क्षेत्रका गाउँबस्ती तथा खेतबारीमा आउने गरेको जनाएको छ। प्रशासन कार्यालयले जंगली हात्ती गाउँबस्तीमा आएको थाहा पाउनासाथ उच्च सतर्कता अपनाउन स्थानीयलाई अनुरोध गरेको छ। 

 यस्तै, हात्ती आएको जानकारी पाउनासाथ नजिकको निकुञ्ज पोष्ट, सुरक्षा पोष्ट, सुरक्षा निकायमा जानकारी गराउने तथा सुरक्षित भएर जंगली हात्तीलाई धपाउने लगायतका कार्य गर्न सूचनामा भनीएको छ।