बेलौरीमा तस्करको दादागिरी, गस्तीमा रहेको शसस्त्रको जवानमाथी ढुंगामुढा

 कञ्चनपुर। १८ भदौ ।
गस्तीमा रहेको सशस्त्र प्रहरीका जवानमाथि कञ्चनपुरको बेलौरी नगरपालिका–१ वैशाखीमा नेपाल–भारत सीमा स्तम्भ नम्बर २०२ नजिक तस्करहरूले ढुङ्गामुढा प्रहार गर्नुका साथै गालीगलौच गरेका छन्।
सशस्त्र प्रहरी बल नेपाल बोर्डर आउट पोष्ट थापाचोकबाट सशस्त्र प्रहरी निरीक्षक कृष्णराज अधिकारीको कमान्डमा खटी गएको १४ जनाको टोलीमाथि भारतबाट अवैधरुपमा समान नेपाल भित्राउँदै गरको अवस्थामा तस्करले ढुङ्गामुढा प्रहार गर्नुका साथै गालीगलौच गरेका हुन्।
भारतबाट ल्याउँदै गरेको माछाको भुरा नियन्त्रणमा लिने क्रममा तस्करले ढुङ्गा मुढा प्रहार गरेको सशस्त्र प्रहरी उपरीक्षक विरेन्द्र ऐरले बताए।
स्थानीय बासिन्दाको सहयोग पछि तस्करहरू भागेका थिए। तस्करहरूबाट १६ हजार रूपैयाँ मूल्य बराबरको माछाका भुरा बरामद गरिएको छ।
सोमबार समेत बेलडाँडी गाँउपालिका ३ कालोपुल नजिक पर्ने नेपाल–भारत सीमा स्तम्भ नम्बर ७८४/५ र ७८४/६ को बीचमा सशस्त्र प्रहरी बल, बिओपी झिलमिलाबाट सशस्त्र प्रहरी निरीक्षक योगेन्द्र भण्डारीको कमान्डमा गस्तीमा रहेको टोलीमाथि १०/१५ जना भारतीय तस्करले नेपालतर्फ सामान भित्राउन खोज्दा नियन्त्रणमा लिने क्रममासमेत सशस्त्र प्रहरी माथि ढुङ्गा प्रहार गरेका थिए।
सशस्त्र प्रहरी उपरीक्षक ऐरले भने, '१५ हजार ६ सय रूपैयाँ मूल्य बराबरको समान भारतीय तस्करले छाडेर गएका छन्।'
उनका अनुसार सामान नियन्त्रणमा लिइए पनि भारतीय तस्करहरू भने भाग्न सफल भएका छन्।
यस बारेमा भारतीय सीमा शुरक्षा बल विओपी टाटरगञ्जलाई समेत जानकारी गराईएको उनले बताए।
(रासस)