यम प्रसाद आचार्य
पुनर्वास, पुस २६
कञ्चनपुरको पुनर्वास नगरपालिकाको सबैभन्दा जेठो तथा सुदुरपश्चिम प्रदेशकै अग्रणी सहकारीका रुपले चिनिने पुनर्वास सहकारी संस्थाले विहिबार २६ औं बार्षिक साधारणसभा कार्यक्रम सम्पन्न गरेको छ । कार्यक्रमका अवसरमा संस्थाले यस हाम्रै साझा पत्रिकाका तीन पत्रकारहरुलाई सम्मान समेत गरेको छ । स्थानीय स्तरमा रहेर विभिन्न चुनौतीको सामना गर्दै पत्रकारीता क्षेत्रमा निरन्तर खटिएको यस हाम्रै साझा पत्रिकाका प्रकाशक सुनिल कुमार लो, सम्पादक हेमन्त न्यौपाने र कार्यकारी प्रवन्धक लाल बहादुर एसकेलाई सम्मान गरेको छ । दुधमा आत्मनिर्भर बनाउन स्थापनाकाल देखि प्रयासरत यस संस्थाले २०३० साल देखि निरन्तर सेवा दिँदै आईरहेको छ । २०२८ सालमा पुनर्वासको बसोबास सुरु भएसंगै यहाँका स्थानीय, पुनर्वास आवास कम्पनी तथा स्थानीय बुद्धिजीवीहरुको अथक प्रयास र सहभागीबाट यस संस्थाको स्थापना भएको थियो । संस्थाले २०७४/७५ मा पाँच करोड ६४ लाख चार हजार आठ सय पाँच रुपैयाँ कारोबार गरेको छभने मंसिर मसान्तसम्ममा एक करोड ६९ लाख २३ हजार ३० रुपैयाँ कारोबार गरेको छ ।
कार्यक्रमका प्रमुख अतिथि पुनर्वास नगरपालिकाका नगरप्रमुख जीवनराज थापाले एउटै उदेश्यसँग सम्बन्धित भएरपनि छरिएर रहेका पुनर्वासका सहकारीहरुलाई मर्ज गर्न सकिए सहकारीको विकासमा टेवा पुग्ने बताउनुभयो । उहाँले एक व्यक्ति एउटा सहकारी भन्दा अरुमा आवद्ध हुँदा खासै उपलब्धि नहुने तर्क राख्नुभयो । उहाँले सहकारीमा आवद्ध भएपछि लगनशील भएर आर्थिक उन्नती तर्फ उन्मुख हुनुपर्नेमा जोड दिनुभयो । उहाँले यस संस्थाले सुरुवाती दिन देखि दुग्ध विकासमा पुर्याएको योगदानको कदर गर्दै निकट भविष्यमा समेत यसै क्षेत्रमा लगनशील भएर अधि बढ्न शुभकामना दिनुभयो । उहाँले स्थानीय तहमा सहकारी ऐन बनिनसकेकाले अहिले प्रक्रियामा रहेका सहकारीलाई दर्ता नगरिएको बताउनुभयो ।
कार्यक्रमका बिशिस्ट अतिथि तथा नगरपालिकाका उपप्रमुख शारदा बिष्टले सहकारीले कुनै पनि एउटा कामलाई प्रथामिकतामा राखी त्यसैमा लगनशील भएर अघि बढ्न सकेमात्र सहकारीको विकास हुने धारण राख्नुभयो । उहाँले धेरै सहकारीमा शेयर सदस्य बन्नुभन्दा एउटैलाई निरन्तरता दिनसके लाभ लिन सकिने बताउनुभयो ।
कार्यक्रमका बिशिस्ट अतिथि दुग्ध विकास संस्था (डि.डी.सी.) अत्तरियाका गोविन्द लेखकले दुग्धमा आत्मनिर्भर बनाउन राज्यलाई पुर्याएको योगदानको कदर गर्दै संस्थाले आगामी दिनमा अझै प्रगतिको कमना गर्नुभयो ।
संस्थाका अध्यक्ष तथा कार्यक्रमका सभापति परशुराम विश्वकर्माले बार्षिक प्रतिवेदन प्रस्तुत गर्दै संस्थाले विभिन्न परिस्थितिलाई पार गर्दै २६ औं वार्षिक साधारणसभा सम्पन्न गर्न पाउँदा हर्षित भएको बताउनुभयो । उहाँले संस्थाको निक्षेप रकम ५५ लाख ५४ हजार दुई सय ५१ रुपैयाँ, कर्जा सापटी ९७ लाख ८९ हजार आठ सय ८६ रहेकोमा कुल कर्जा लगानी एक करोड ८४ लाख ७६ हजार एक सय ८२ रुपैयाँ रहेको जानकारी गराउनुभयो । संस्थाले शुद्ध नाफा दुई लाख ४७ हजार दुई सय ३४ रुपैयाँ कमाएको बताउनुभयो । उहाँले संस्थाले हालसम्म २६० पुरुष तथा १२६ महिला गरि कुल ४०९ जना सेयर सदस्यहरुद्वारा कुल शेयर पुँजी ३४ लाख ६० हजार सात सय १३ रुपैयाँ जम्मा भएको जानकारी गराउनुभयो ।
कार्यक्रममा धेरै शेयर खरिद गरि संस्थाको आन्तरिक पुँजी वृद्धि गरे अन्तर्गत १९ जना शेयर सदस्यहरुलाई सम्मान गरिएको थियो ।कार्यक्रममा स्थानीय बुद्धिजीवी, समाजसेवी, नेता, सहकारीकर्मी, जनप्रतिनिधि तथा शेयर सदस्यहरुको बाक्लो उपस्थिति रहेको थियो । कार्यक्रमको सञ्चालन एककुमार श्रेष्ठले गर्नुभएको थियो ।
No comments:
Post a Comment