सुदूरपश्चिममा मन्त्रालय फुटाएर विना विभागीय मन्त्रीलाई जिम्मेवारी

धनगढी/१६ असार 

 सुदूरपश्चिममा मन्त्रालय फुटाएर विना विभागीय मन्त्रीलाई जिम्मेवारी दिईएको छ । सुदूरपश्चिम प्रदेश सरकारले चार मन्त्रालय फुटाएर विना विभागीय मन्त्रीलाई जिम्मेवारी दिएको छ । मुख्यमन्त्री दीर्घ बहादुर सोडारीले भौतिक पूर्वाधार विकास मन्त्रालय, सामाजिक विकास मन्त्रालय, भूमि व्यवस्था कृषि तथा सहकारी मन्त्रालय र उद्योग पर्यटन वन तथा वातावरण मन्त्रालय फुटाएर विना विभागीय ५ मन्त्रीलाई जिम्मेवारी दिएका हुन् ।

आन्तरिक मामिला तथा कानुन मन्त्रालय र आर्थिक मामिला मन्त्रालय भने यथावत् राखिएको छ । भौतिक पूर्वाधारलाई फुटाएर जलस्रोत तथा सहरी विकास मन्त्रालय र भौतिक पूर्वाधार तथा यातायात विकास मन्त्रालय बनाइएको छ भने सामाजिक विकास मन्त्रालय फुटाएर शिक्षा युवा तथा खेलकुद र स्वास्थ्य महिला तथा बालबालिका मन्त्रालय बनाइएको प्रदेश प्रमुख कार्यालयका निमित्त सचिव शैलेशराज ढुंगानाले बताए ।

त्यस्तै, उद्योग पर्यटन वन तथा वातावरण मन्त्रालय र भूमि व्यवस्था कृषि तथा सहकारी मन्त्रालयका महाशाखा एक अर्कामा गाभ्दै नयाँ मन्त्रालय बनाइएको छ। जसमा वन वातावरण तथा सहकारी मन्त्रालय, कृषि तथा भूमि सुधार मन्त्रालय, उद्योग वाणिज्य पर्यटन तथा संस्कृति मन्त्रालय बनाइएको छ ।

मुख्यमन्त्री सोडारीले अक्कल बहादुर रावललाई जलस्रोत तथा सहरी विकास मन्त्रालय र लक्ष्मी विकलाई शिक्षा युवा तथा खेलकुद मन्त्रालयको जिम्मेवारी दिएका छन्। एमालेका वीरबहादुर थापाले वन वातावरण तथा सहकारी मन्त्रालय र हिरा सार्कीलाई आन्तरिक मामिला तथा कानुन मन्त्रालयको जिम्मेवारी दिइएको छ ।

एसईईमा अनुत्तीर्ण सबै विद्यार्थीले ग्रेडवृद्धि अर्थात् मौका परीक्षा दिन पाउने

  

काठमाडौं/१५ असार 

 माध्यमिक शिक्षा परीक्षा एसईईमा अनुत्तीर्ण भएका अर्थात् ननग्रेडिङ (एनजी) ल्याएका सबै विद्यार्थीले मौका परीक्षा दिन पाउने भएका छन् । शिक्षा, विज्ञान तथा प्रविधि मन्त्रालयले एसईईमा 'एनजी' ल्याएका सबै दुई लाख ४२ हजार तीन सय १३ जना विद्यार्थीले ग्रेडवृद्धि अर्थात् मौका परीक्षामा सहभागी हुन पाउने निर्णय गरेको हो ।

यसअघि दुई विषयसम्म ननग्रेडिङ भएका विद्यार्थीले मात्र ग्रेडवृद्धि परीक्षामा सहभागी हुन पाउने भनिएको थियो । यसअनुसार एक लाख १५ हजार आठ सय ३४ जना मात्रै ग्रेडवृद्धि परीक्षाका लागि योग्य भएका थिए । तर शिक्षामन्त्री सुमना श्रेष्ठले मन्त्रीस्तरीय निर्णय गर्दै सबै ननग्रेडिङ विद्यार्थीलाई ग्रेडवृद्धि परीक्षामा सहभागी गराउने व्यवस्था गरिएको मन्त्रालयले जनाएको छ ।

मन्त्रालयका अनुसार राष्ट्रिय परीक्षा बोर्ड र पाठ्यक्रम विकास केन्द्रलाई यसअनुसार व्यवस्था गर्न भनिएको छ । केन्द्रले लागू गरेको निर्देशिकामा दुई विषयसम्म ननग्रेडिङ ल्याएका विद्यार्थीले मात्र ग्रेडवृद्धि परीक्षा दिन पाउने र दुई विषयभन्दा बढीमा ननग्रेडिङमा परे चैतमा सञ्चालन हुने वार्षिक परीक्षामा मात्र सहभागी हुन पाउने व्यवस्था रहेकोमा यो व्यवस्थासमेत संशोधन हुने मन्त्रालयले जनाएको छ ।

परीक्षा बोर्डले साउन १८ र १९ गते ग्रेडवृद्धि परीक्षा सञ्चालन गर्ने समयतालिका प्रकाशित गरिसकेको छ । मन्त्रायलको यो निर्णयपछि परीक्षाको समय तालिकामासमेत संशोधन गर्ने तयारी छ ।

ग्रेडवृद्धिमा सहभागी हुने विद्यार्थीलाई परीक्षाको तयारी र आवश्यक कक्षा सञ्चालन तथा सिकाइ सहजीकरण गर्न शिक्षा तथा मानवस्रोत विकास केन्द्रमार्फत देशभरका विद्यालयलाईसमेत निर्देशन दिने निर्णय भएको मन्त्रालयले जनाएको छ । यस वर्षको एसईईमा सबैभन्दा बढी गणित, विज्ञान र अंग्रेजी विषयमा विद्यार्थीको एनजी आएको छ ।  

बेलौरीको विज्डम एकेडेमीमा नेपाली सेनाको राष्ट्रिय सेवा दल (एनसीसी) तालिम सुरु

 कञ्चनपुर, १५ असार । 

 बेलौरीस्थित विज्डम एकेडेमीमा शुक्रबारबाट औपचारिक रूपमा नेपाली सेनाले दिने राष्ट्रिय सेवा दल (एनसीसी) तालिम सुरु भएको छ । रुद्रध्वज गणका सेनानी (मेजर) नवीन सिंह बोहराको उपस्थितिमा शुक्रबारबाट विज्डम एकेडेमीमा एनसीसी तालिम प्रशिक्षणको औपचारिक रूपमा सुरुवात गरिएको विज्डम एकेडेमीका प्रिन्सिपल गोविन्द सिंह थाहाले जानकारी दिनुभयो । तालिममा विद्यालयका १८ छात्र र १८ छात्रा गरी ३६ जनाको सहभागिता रहेको छ । 

विद्यालयमा चल्ने तालिममा सैद्धान्तिक सैन्य ज्ञानका साथै एरोविक्स, मास पिटी, तेक्वान्दो पिटी, खुकुरी ड्रिल र नक्सा अध्ययन सिकाइने छ । सिनियर डिभिजनले हतियार तालिम अर्थात् फाइरिङ पनि सिक्दछन् । ७९ दिनको तालिमपछि २१ दिनको क्याम्प तालिम हुन्छ । क्याम्पका लागि बाँकेको कोहलपुरमा लगिने बताइएको छ । २१ दिन चल्ने क्याम्प तालिममा खोज, उद्धारदेखि मास पिटी, भिडमा बोल्ने तरिका र नेतृत्व विकाससम्मको तालिम लिन सकिने छ । सिनियर डिभिजन तालिममा घोडचढी, स्विमिङ, हाइकिङ र क्लाईम्बिङसम्म सिकाइन्छ । ७९ दिनसम्म विद्यालयमा सञ्चालन हुने तालिमलाई ४० दिन र २१ दिनको क्याम्प तालिमलाई १६ दिनको राखिएको छ ।

सुदूरका अठार स्कुलमा सेनाको सेवा दल तालिम सुरु ।।

सुदूरपश्चिम प्रदेशका नौ वटा जिल्लाका अठार सामुदायिक तथा संस्थागत विद्यालय छनौट गरी नेपाली सेनाले राष्ट्रिय सेवा दल जुनियर डिभिजन तालिम सुरु गरेको छ । सुदूरपश्चिम पृतना अत्तरिया तेघरीले दिएको जानकारी अनुसार सिसम् ५० राष्ट्रिय सेवा दल जुनियर डिभिजन तालिम सुरु गरिएको हो । सेनाको सुदूरपश्चिम पृतनाले दिएको जानकारी अनुसार यहाँबाट सिफारिस भई छनौट भएका विद्यालयहरूमा सेनाका बाहिनी, गण तथा गुल्मपतिले सुरुवात गरेका हुन् । कञ्चनपुरका ६, कैलालीमा ३, डडेलधुरा र दार्चुलामा दुई दुई  डोटी, अछाम, बाजुरा, बझाङ र बैतडीमा एक एक विद्यालयमा सो तालिम सुरु भएको पृतनाले जनाएको छ ।

युवा वर्गलाई अनुशासित, वफादारिता तथा इमानदारिता, राष्ट्रिय एकताको भावना र नेतृत्व क्षमताको विकास गराउने उद्देश्यले नेपाली सेनाले हरेक वर्ष राष्ट्रिय सेवा दलको जुनियर र सिनियरतर्फको तालिम विद्यालयहरूमा सञ्चालन गर्दै आएको छ । जुनियर डिभिजन तालिममा छनौट भएका हरेक विद्यालयका मावि तहमा अध्ययनरत १८ छात्रा र १८ छात्र गरी ३६ जना सहभागी रहने सेनाले जनाएको छ । श्रीदल गुल्मका गुल्मपति सेनानी राजीव जङ्ग ठकुरीले कञ्चनपुरका पाँच विद्यालयका तालिम सञ्चालन भइसकेको र छनौटमा रहेको थप एक विद्यालयको तालिम केही दिनमा सुरु हुने जानकारी दिनुभयो । सेनाले दिएको जानकारी अनुसार २०२२ सालदेखि मुलुकमा नेपाली सेनाले विद्यार्थीहरूलाई सो तालिम दिँदै आएको र हालसम्म ७४ हजार भन्दा बढी विद्यार्थीले तालिम लिइसकेको जनाएको छ ।

-नेपाल बोधबाट साभार

महेन्द्रनगरबाट बैतडी जाँदै गरेको बसमा एक यात्रुको मृत्यु

कञ्चनपुर/१४ असार ।

महेन्द्रनगरबाट बैतडी जाँदै गरेको बसमा सवार एक यात्रुको मृत्यु भएको छ ।

भारतबाट घर फर्किदै गरेका बैतडीका दशरथचन्द नगरपालिका–९ तिचौराका ४२ वर्षीय कृष्णानन्द जोशीको बसमै मृत्यु भएको हो । उनी रोजगारी गरेर भारतबाट घर फर्कदै थिए ।

महेन्द्रनगरबाट बैतडीका लागि छुटेको महाकाली यातायातको ना ४ ख ६३८४ नम्बरको बसमा जोशी अत्तरियाबाट चढेका थिए ।

जोशी पाटन आइपुग्दा बेहोस भएपछि उपचारका लागि जिल्ला अस्पताल बैतडी लगिएको थियो । अस्पतालका चिकित्सकले जोशीलाई मृत घोषणा गरेको जिल्ला प्रहरी कार्यालय बैतडीले जनाएको छ ।

जोशीको मृत्युको कारण खुलेको छैन । बस चालक जगदीश अवस्थी र सहचालक चन्द्रदेव पाण्डेलाई प्रहरीले नियन्त्रणमा लिएको छ ।

रासस

एसईईको नतिजा सार्वजनिक

 

काठमाडौ/१३ असार ।
माध्यमिक शिक्षा परीक्षा (एसईई) को नतिजा सार्वजनिक भएको छ । परीक्षामा सहभागी भएका कुल विद्यार्थीमध्ये ४७ दशमलव ८६ प्रतिशत विद्यार्थीले ग्रेड प्राप्त गरेका छन् । उनीहरुले कक्षा ११ पढ्न पाउनेछन् ।  दुई लाख ४२ हजार ९२ जना विद्यार्थी अर्थात ५२ दशमलव १४ प्रतिशतको ननग्रेड अर्थात् एनजी आएको छ । एक सय ८६ जनाले चार जिपीए प्राप्त गरेका छन् । दुई सय २१ जनाको परीक्षा रद्द भएको परीक्षा बोर्डले जनाएको छ ।
नतिजा वेबसाइट, एसएमएस र आइभीआरबाट थाहा पाउन सकिने राष्ट्रिय परीक्षा बोर्डले जनाएको छ । मोबाइलको एसएमएसमा SEE लेखेर एक स्पेस दिइ आफ्नो सिम्बोल नम्बर लेखेर १६०० मा पठाएर नतिजा थाहा पाउन सकिन्छ । यस्तै आईभीआरको माध्यमबाट पनि नतिजा हेर्न सकिन्छ । १६०० डायल गरी प्राप्त निर्देशन अनुसार नतिजा सुन्न सकिन्छ ।

राष्ट्रिय परिक्षा बोर्डको वेबसाईट result.see.gov.np/result मा गएर आफ्नो सिम्बोल नम्बर र जन्ममिति राखि मार्कसिटसहितको नतिजा हेर्न सकिन्छ । यस्तै नेपाल टेलिकमको वेबसाईट www.see.ntc.nt.np मा गएर आफ्नो सिम्बोल नम्बर र जन्ममिति राखेर मार्कसिटसहितको नतिजा हेर्न सकिन्छ ।

बोर्डले यस वर्षदेखि लेटर ग्रेडिङ निर्देशिका, २०७८ अनुसार नतिजा सार्वजनिक गरेको छ । विद्यार्थीले सैद्धान्तिकतर्फ हरेक विषयमा न्यूनतम ३५ प्रतिशत अङ्क ल्याउनुपर्छ । ७५ अङ्कको सैद्धान्तिक परीक्षा हुने विषयमा न्यूनतम २६ दशमलव २५ अङ्क ल्याउनुपर्छ । त्यसमा आन्तरिकतर्फ २५ पूर्णाङ्कको परीक्षामा भने ४० प्रतिशत अर्थात् १० अङ्क ल्याउनुपर्छ । कुनै एक विषयमा आन्तरिकतर्फ १० र सैद्धान्तिकतर्फ न्यूनतम २६ दशमलव २५ अङ्क नल्याउने विद्यार्थीले मूल प्रमाणपत्र नपाउने बोर्डले जनाएको छ ।

विद्यार्थीले दुई विषयसम्म ग्रेड वृद्धि परीक्षा दिन पाउने छन् । जुन विषयमा एनजी भएको हो त्यही विषयमा मात्र परीक्षा दिए हुन्छ । दुई विषयभन्दा बढीमा एनजी आए अर्को वर्ष सम्बन्धित विषयको मात्र परीक्षा दिन पाइने व्यवस्था निर्देशिकामा गरिएको छ । यस्ता विद्यार्थीले तीन वर्षसम्म वार्षिक परीक्षामा सहभागी हुन पाउने बोर्डले जनाएको छ । ग्रेडिङमा परेका विद्यार्थी मात्रै माथिल्लो कक्षामा भर्ना र पठनपाठन गर्न योग्य ठहरिन्छन् । 

राष्ट्रिय परिचयपत्र विवरण अब सम्बन्धित वडाबाटै

काठमाडौं/स्थानीय तहसँग समन्वय गरेर राष्ट्रिय परिचयपत्र सम्बन्धी आवश्यक विवरण संकलन गर्नका लागि गृह मन्त्रालयले निर्देशन दिएको छ।

पञ्जिकरण विभागले आज एक सूचना जारी गर्दै २४ जेठको मन्त्रिपरिषद्को निर्णयअनुसार समाजिक सुरक्षा भत्ता प्राप्त गर्न राष्ट्रिय परिचयपत्र अनिवार्य बनाएको हुनुपर्ने भएपछि नागरिको सेवा र सहजतालाई मध्यनजर गर्दै सम्बन्धीत स्थानीयतहसँग समन्वय गर्न निर्देशन गरेको हो ।

सेवाग्राहीहरूको भीड जिल्ला प्रशासन कार्यालयमा बढेपछि मन्त्रालयले २८ जिल्लाका प्रमुख जिल्ला अधिकारीहरुलाई यस्तो निर्देशन दिएको हो ।

पुनर्वासका वीर बहादुर थापा बने मन्त्री

धनगढी/पुनर्वास निवासी वीर बहादुर थापा "पातल" मन्त्री बन्न सफल भएका छ्न । सुदुरपश्चिम प्रदेशका मुख्यमन्त्री दीर्घ बहादुर सोडारीले तेस्रोपटक मन्त्रीमण्डल विस्तार गर्दा थापा मन्त्री बन्न सफल भएका हुन ।

 किशोरावस्थादेखि  माओवादीमा आबद्ध मन्त्री थापाले माओवादी जनयुद्धमा कठिन संघर्षपूर्ण अवस्थामा  ज्यानको पर्वाह नगरी योगदान दिएका थिए ।  सशस्त्र द्वन्द्वको समयमा  ७ वर्ष जेल बसेका थापा तत्कालीन शाही सेनाको चरम यातनाका कारण अझै शारीरिक रुपमा कमजोर छ्न ।  तत्कालीन माओवादी र एमाले एकीकरण भएर नेपाल कम्युनिष्ट पार्टी (नेकपा) बनेका बेला उनी कञ्चनपुर जिल्ला कमिटी संयोजक बनेका थिए । पछी  नेकपा फुटदा  उनी एमाले तर्फ लागेका थिए । 

 माओवादीमै हुँदा उनी पुनर्वास नगरपालिकाको नगर प्रमुख (मेयर) पदमा चुनाव लड्दा नेकपा एमालेसँग पराजित भएका थिए ।

एमालेमा लागेपछि उनी कञ्चनपुरको प्रदेशसभा निर्वाचन क्षेत्र १(१) बाट प्रदेशसभा सदस्य निर्वाचित भएका थिए । एमालेले उनलाई सार्वजनिक लेखा समितिको सभापति समेत बनाएको थियो । सोमबार भएको मन्त्रिपरिषद् विस्तारमा कञ्चनपुर जिल्लाबाट ४ मन्त्री नियुक्त भएका छन् । थापासहित एमालेका हिरा सार्की, माओवादीका ओमविक्रम भाट ‘सरल’ र एकीकृत समाजवादीका माया पन्त मन्त्री बनेका छन् । सोडारीले एमालेका सुरेन्द्रबहादुर पाल, माओवादीका अक्कलबहादुर रावल र लक्ष्मी विकलाई समेत मन्त्री बनाएका छन् । यसअघि मुख्यमन्त्री सोडारीले नागरिक उन्मुक्ति पार्टीका कैलाश चौधरीलाई भौतिक पूर्वाधार विकास र टीका थापालाई भूमि व्यवस्था, कृषि तथा सहकारी मन्त्री नियुक्त गरेका थिए ।

तीन दिन अगाडि भित्रियो मनसुन

  

काठमाडौं/ यस वर्ष मनसुन सरदर मितिभन्दा तीन अगाडि नै नेपाल भित्रिएको छ । नेपालमा मनसुन भित्रिने सरदर मिति जुन १३ तारिख भए पनि तीन दिन अगाडि अर्थात् आज जुन १० तारिखमै भित्रिएको मौसम पूर्वानुमान महाशाखाले जनाएको छ ।

कोशी प्रदेशबाट नेपाल भित्रिएको मनसुन क्रमिक रूपमा केही दिनभित्र देशभर फैलने महाशाखाले जनाएको छ । अघिल्ला वर्षहरूको अनुभवअनुसार पूर्वबाट देशमा मनसुन भित्रिएपछि पश्चिमसम्म पुग्न एक हप्ता समय लाग्छ ।

यस वर्षको मनसुनमा नेपालमा औसतभन्दा धेरै पानी पर्ने जल तथा मौसम विज्ञान विभागले अनुमान गरेको छ । विभागकाअनुसार यस वर्ष सरदरभन्दा ३५ प्रतिशतदेखि ५५ प्रतिशतसम्म बढी पानी पर्ने अनुमान छ ।

सुदूरपश्चिम प्रदेशको उत्तर–पश्चिमी भू–भाग, बाग्मती प्रदेशको दक्षिण–पूर्वी भू–भाग, मधेश प्रदेशको मध्य भू–भाग र कोशी प्रदेशको मध्य तथा मध्य–पश्चिमी भू–भागमा सरदर वर्षा हुने छ ।