एन आइ सी एसिया लघुवित्त वित्तीय संस्थाको केन्द्र प्रमुख गोष्ठी तथा वित्तीय साक्षरता कार्यक्रम सम्पन्न

बर्दिया, चैत्र १७ । एन आइ सी एसिया लघुवित्त वित्तीय संस्था शाखा कार्यालय मगरागडीको समुह प्रमुख  गोष्ठी तथा वित्तीय साक्षरता कार्यक्रम शनिवार बारबर्दिया नगरपालिका-५, मगरागडीमा सम्पन्न भएको छ ।

समुह प्रमुख चमेली चौधरी को  अध्यक्षता एवम् एन.आइ.सी. एसिया लघुवित्त वित्तीय संस्थाका प्रदेश प्रमुख प्रकाश पराजुलीको प्रमुख आतिथ्यता, अनुगमन अधिकृत मधुसुदन निरौला, बारबर्दिया नपा ५का वडा सदस्य श्री बिश्राम थारु ,शाखा प्रमुख शिव विक को उपथिती एवम समुह प्रमुखहरुको सहभागितामा कार्यक्रम सम्पन्न भएको हो । कार्यक्रममा वित्तीय संस्थाको परिचय, महत्त्व तथा आवश्यकता, बचत तथा ऋण प्रवाह, कर्जाको सहि सदुपयोग कसरी गर्ने लगायतका विषयमा जानकारी गराइएको थियो ।  वित्तीय संस्थाका विषयमा बाहिर आइरहेका नकारात्मक टिकाटिप्पणीको चिरफार गर्न तथा संस्थाले सेवा सुविधा र कर्जाको प्रयोग कसरी गर्ने भन्ने उद्देश बनाएर सदस्यहरूलाई सचेतना प्रदान गर्न कार्यक्रम आयोजना गरिएको एन.आइ.सी. एसिया लघु वित्त वित्तीय संस्थाका प्रदेश प्रमुख प्रकाश पराजुलीले बताएका छन् । साथै कार्यक्रममा शाखा कार्यालय मगरागडीका उत्कृष्ट समूह तथा सदस्यहरूलाई सम्मान समेत गरिएको थियो ।

कञ्चनपुर: पावरफुल नेताहरुकै क्षेत्रमा समस्यै समस्या/ नागरिकताबाट नागरिक वञ्चित

पुनर्वास/कञ्चनपुरको दक्षिणी क्षेत्रको सहजताका लागि राखिएको ईलाका प्रशासन कार्यालय त्रिभुुवनबस्तीमा महिना दिन देखि नागरिकता वितरण कार्य रोकिएको छ ।

कञ्चनपुरको “पावरफुल” नेताहरुको  क्षेत्रका रुपमा दक्षिणी क्षेत्रलाई मानिए पनि महिना दिन देखि नागरिकता प्राप्त गर्नबाट यस क्षेत्रका नागरिकहरु वञ्चित  हुँदा समेत समस्या समाधान हुन सकेको छैन् ।

महिना दिन देखि स्थानीय  नागरिकताबाट वञ्चित भएको विषयमा प्रतिनिधि सभा सदस्य तारालामा तामाङसँग बुझ्दा बारम्बार यस विषयमा पहल गरिरहेको, हिजो मात्रै  गृहसचिवको सरुवा भएको भन्ने सुने, भोली फेरी एक पटक मन्त्रालयमा जाने बताउनुभयो । प्रतिनिधि सभा सदस्य जिल्लाकै पावरफुल नेताका रुपमा मानिन्छन् । त्यसैगरी यसै क्षेत्रका पूर्व प्रतिनिधि सभा सदस्य, माओवादी नेतृ  पूर्व खानेपानी मन्त्री  बिना मगरलाई यस विषयमा कुरा गर्दा आफूले यथासिघ्र गृह मन्त्रालयमा कुरा गरि  समस्या समाधान गर्न पहल गर्ने बताउनुभयो ।

  यसै समस्याको बारेमा पुनर्वास नगरपालिकाका प्रमुख तोय प्रसाद शर्मासंग सम्पर्क गर्दा आफुले यस समस्यालाई गम्भीर रुपमा लिएको र सेवाग्राहीहरुलाई  सेवा दिन जिल्लाबाट अधिकृत बोलाएर अस्थायी रुपमा सेवा दिने व्यवस्था मिलाएको बताउनुभयो ।

   एक महिना सम्म प्रशासनिक सेवाबाट नागरिक वञ्चित हुनु निकै लज्जास्पद र ठुलो बिडम्बनाको विषय भएको स्थानीयहरुको भनाई छ । तर स्थानीयहरुको अर्को बुझाईमा भने समस्याका विषयमा कसै जनप्रतिनिधि र नेताहरुलाई चासो नभएको विश्लेषण छ ।

यसक्षेत्रमा रहेका अन्य प्रदेश तथा स्थानीय तहका जनप्रतिनिधिहरुको पनि पहुँच नभएको भने होईन तर एकले अर्कालाई पर्खेर नागरिकका पिडामाथी रमिता हेर्ने गरेको स्थानीयहरुको आरोप छ । 

–दुई वर्ष देखि कार्यालयमा विद्युतको वैकल्पिक व्यवस्था छैन ।

ईलाका प्रशासन कार्यालय त्रिभुवनबस्तीमा करिब दुई वर्ष भन्दा बढि देखि बिधुतको वैकल्पिक व्यवस्था नहुदा पनि यस क्षेत्रका नागरिकहरुले समस्या खेप्दै आउनु परेको छ । 

पुनर्वास नगरपालिका,बेलौरी नगरपालिका र लालझाडी गाउँपालिकाको नागरिकता बन्ने कार्यालयका रुपमा ईलाकालाई जिम्मेवारी भएपनि विद्युत अवरुद्ध हुँदा दैनिकै कामकाज ठप्प हुने गरेको छ । यस विषयमा तीनै पालिकाले उक्त समस्या समाधान गरिदिए नागरिकले विद्युत नहुदा पनि सरल रुपमा सेवा लिनसक्ने र कसैलाई पनि सास्ती नहुने स्थानीय युवा नन्दराज जोशीले भनाई छ । तर यसमा पनि कसैको चासो देखिन्न । 

दैनिकै फर्कन्छन् नागरिक 

नागरिकताका लागि ईलाका प्रशासन कार्यालय त्रिभुवनबस्तीमा तीनै पालिकाबाट आउने नागरिकहरु दैनिकै कार्यालयमा पुगेर फर्कने गरेका छन् । 

कार्यालयमा कार्यरत कर्मचारीलाई समेत कहिले नागरिकता बन्छ भन्ने विषयमा प्रष्ट जवाफ नहुँदा नागरिक दैनिकै फर्कने गरेका हुन् । 

जिम्मेवारीका विषयमा सिडियो नै अनभिज्ञ 

ईलाका प्रशासन कार्यालय त्रिभुवनबस्तीको प्रमुखको जिम्मेवारी पाएका नासु डम्बरसिह खड्काको समयावधी नथपेको एक महिना हुँदा पनि कहिेले जिम्मेवारी आउँछ भन्ने विषयमा कञ्चनपुरका  सिडियो गोपाल कुमार अधिकारी पनि अनभिज्ञ देखिन्छन् । 

सिडियो अधिकारी भन्नुहुन्छ,“बेलाबेलामा जिल्लाबाट पठाएर गराएका छौ । भोली देखि केहि दिन अझै जिल्लाबाटै पठाउँदै छौं । मन्त्रालयसँग बुझ्दा प्रक्रिया हुँदैछ भन्ने प्रतिक्रिया आएको छ ।”

रवि लामिछाने उपप्रधान तथा गृहमन्त्री बन्ने

काठमाडौ /२३  फागुन ।

रवि लामिछाने उपप्रधान तथा गृह मन्त्री बन्ने भएका छ्न ।

सत्ता गठबन्धनले मन्त्रालय भागबन्डामा लगभग सहमति गरेसंगै रास्वपा सभापति लामिछाने गृहमन्त्री  बन्ने पक्का भएको हो ।

बुधबार दिउँसो बालुवाटारमा बसेको गठबन्धन बैठकले दलहरूले लिने मन्त्रालय टुंगो लगाएका हुन्।

 सहमतिअनुसार नेकपा (माओवादी केन्द्र) बाट उपप्रधान तथा परराष्ट्र मन्त्री वरिष्ठ उपाध्यक्ष नारायणकाजी श्रेष्ठ हुनेछन्।

 अर्थमन्त्री पनि माओवादीले नै लिने सहमति भएको छ। उपमहासचिव वर्षमान पुनलाई अर्थमन्त्री बनाउने माओवादीको निर्णय छ।

नेकपा (एमाले) बाट सचिव रघुवीर महासेठ उपप्रधान तथा भौतिक पूर्वाधार मन्त्री बन्ने सहमति भएको हो ।

रास्वपाले लिने अन्य तीन  मन्त्रालयको पनि टुंगो लागेको छ । शिक्षा मन्त्रीमा सुमना श्रेष्ठ, युवा तथा खेलकुदमा विराजभक्त श्रेष्ठ, श्रममन्त्रीमा उपसभापति डोलप्रसाद अर्याल (डिपी) बन्ने भएका छन्।

एन.आर्ई.सि. एसिया लघुवित्तको समुह प्रमुख गोष्ठी तथा वित्तीय साक्षरता कार्यक्रम सम्पन्न

कञ्चनपुर/फाल्गुण २०

 एन.आर्ई.सि एसिया लघुवित्त वित्तीय संस्था लिमिटेडले  कञ्चनपुर जिल्लाको महेन्द्रनगरमा समूह प्रमुख गोष्ठी तथा वित्तीय साक्षरता कार्यक्रम सञ्चालन गरेको छ । संस्थाले मझगाँउ शाखा अन्तर्गतका ५४ जना समूह अध्यक्ष तथा भिमदत्त न.पाका नगर प्रवत्ता श्री पदम अवस्थी,भि.न.पा वडा नं. ४ का वडा अध्यक्ष श्री शुशिल कुमार भट्ट,जिल्ला प्रहरी कार्यालय महेन्द्रनगरका प्रहरि निरिक्षक श्री हर्ष बहादुर चन्द,भि.न.पा वडा नं.१८ का प्रतिनिधि श्री महेश बहादुर वस्नेत, भि.न.पा वडा नं.१७ कि वडा सदस्य श्री मञ्जु चन्द बम तथा समाजसेवि व्यक्तिहरुको  उपस्थितिमा कार्यक्रम गरेको हो ।  

कार्यक्रमको अध्यक्षता  यसै शाखाद्वारा संचालीत केन्द्र नं. १७८ कि प्रमुख श्री धना देवि कुवँरले गर्नु भएको थियो प्रमुख अतिथि कलुवापुर उप प्रदेश कार्यालयका अनुगमन अधिकृत श्री भुबन राज पाठकले वित्तीय साक्षरता सम्बन्धि शिक्षा,कर्जा,बचत बारे जानकारी विधमान लघुवित्तका समस्या,त्यसका समाधान र लघुवित्त किन आवश्यक छ भन्ने वारे जानकारी साथै  आधुनिक डिजिटल प्रविधि तथा मोबाइल बैंकिङसँग सम्बन्धित विषयमा प्रशिक्षण दिएको जनाइएको छ । शाखामा भएका कुल २५३ वटा समूहमध्येबाट ३ वटा समूह पुरस्कृत भएको तथा उत्कृष्ट ॠणीमा केन्द नं.२१६ कि सदस्य जानकी सार्की उत्कृष्ट बचतकर्तामा केन्द्र नं.०६० कि सदस्य श्री जानकी रावल उत्कृष्ट केन्द्र प्रमुखमा केन्द्र नं.०२० कि सदस्य श्री शारदा देवि पाठकलाई समेत सम्मान गरिएको अनुगमन अधिकृत पाठकले बताए । 

यस कार्याक्रमको संचालन यसै शाखाका शाखा प्रमुख धर्मानन्द जोशीले गर्नुभएको थियो भने स्वागत मन्तव्य तथा कार्यक्रमको संक्षीप्त परिचय शाखा कार्यालय चाँदनीदोधाराका शाखा प्रमुख हिरण्ड कुमार विष्टले जानकारी गराउनु भएको संस्थाले जनाएको छ । कार्यक्रममा शाखा कार्यालय मझगाँउका कर्मचारी साथै समाजसेवि व्यक्तिहरुको पनि सहभागीता रहेको थियो ।

कार्यक्रममा वित्तीय संस्थाले हाल समुदायमा देखिएका विविध समस्या समाधानका लागि सामूहिक सहयोग, सामूहिक प्रयासमा सदस्यहरुको अहम भुमिका रहेको तथा यस्ता वित्तीय कार्यक्रम बाट त्यसका लागी सहयोग पुग्ने अपेक्षा समेत लिएको जनाइएको छ ।

बेलौरीको महाकाली बहुमुखी क्याम्पसको बार्षिकोत्सव, दक्षिणी क्षेत्रको उच्च शिक्षाकै हब बनाउने प्रतिबद्धता

लाल ब.एसके फागुन १५

कञ्चनपुरको दक्षिणी क्षेत्रमा रहेको महाकाली बहुमुखी क्याम्पसको बार्षिकोत्सव तथा अभिभावक दिवस सम्पन्न भएको छ । बेलौरी नगरपालिकामा रहेको महाकाली बहुमुखी क्याम्पसको ३२औँ बार्षिकोत्सव तथा अभिभावक दिवस सम्पन्न भएको हो । मंगलबार एक कार्यक्रमका विच त्रिविको सम्बन्धन प्राप्त क्याम्पसको बार्षिकोत्सव समारोहमा क्याम्पस संचालक समितिका अध्यक्ष हरेन्द्र विष्ट(होसियार)ले र्दिक्षणी क्षेत्रकै  उच्च शिक्षाको हब बनाउने प्रतिबद्धता जाहेर गरेका छन । 

अध्यक्ष विष्टले त्रिविको सम्बन्धन क्याम्पस भएपनि सुप विश्वविद्यालयको आंगिक क्याम्पस बनाउने विषयमा पहल भईरहेको बताए । पछिल्ला दिनहरुमा बेलौरीमा जंगली जनावर बाघ, चितुवा सहितको आतङ्क भएकाले स्कुल बसको प्रबन्धमा जोडदिए । अध्यक्ष विष्टले क्याम्पसमा कम्प्युटर ल्याब सहितका प्राविधिक उपकरण आवश्यक रहेको औल्याए । उनले दक्षिणी क्षेत्रको उच्च शिक्षा सुधारका लागि राज्यका निकायबाट सहयोग आवश्यक रहेको बताए । 

कार्यक्रमका प्रमुख अथिति सुप प्रदेश सरकारका भौतिक पूर्वाधार विकासमन्त्री प्रकास देउवाले प्रदेशकै सामुदायिक क्याम्पसको स्तरबृद्धि भएको बताए । मन्त्री देउवाले त्रिवि, सुप विश्वविद्यालय सहितका विभिन्न सरकारी क्याम्पसको अवस्था नाजुक भएपनि महाकालीको सुधार भएको बताए । मन्त्री देउवाले प्रदेश सरकारबाट क्याम्पस सुधारका लागि आवश्यक पहल गर्ने बताए । 

अर्का बिशिष्ठ अथिति सुप प्रदेश सभा सदस्य दिवान सिह विष्टले क्याम्पसको स्तरबृद्धिका लागि आफ्नो तर्फबाट पहल गर्ने आश्वासन दिए । शिक्षा क्षेत्रमा लामो अनुभव भएका समाजसेवी प्रेमसिह बोहराले राज्यले बेलौरीकोे महाकाली क्याम्पसको स्तरबृद्धिका लागि सहयोग अपरिहार्य रहेको बताए । 

क्याम्पस प्रमुख धर्मराज जोशीले बार्षिक प्रगति प्रतिवेदन प्रस्तुत गर्दै दक्षिणी क्षेत्रमा रहेको महाकाली क्याम्पसमा थुप्रै अभावका विच गुणस्तरिय शिक्षा प्रदान गरिरहेको बताए । कार्यक्रममा उत्कृष्ठ विद्यार्थीलाई पुरस्कारका साथै विवित साँस्कृतिक कार्यक्रम प्रस्तुत गरिएको थियो । कार्यक्रममा शिक्षक, विद्यार्थी, अभिभावक सहितका सरोकारवालाको सहभागिता रहेको थियो ।

आर्थिक अभावले उपचारमा समस्या , सहयोगका लागि अपिल

लाल बहादुर एसके

पुनर्वास,  १२ फागुन ।

आर्थिक अभावका कारण पुनर्वास नगरपालिका –६ निवासी  धनी लावडको उपचारमा समस्या भएको छ ।   सुगर रोगबाट पीडित लावड हाल  प्यारालाइस र किड्नी रोगबाट ग्रसित छन । रोगबाट पीडित लावड आर्थिक अभावका कारण उपचार गर्न अस्पताल जान नसकेपछि घरमै थला पर्नुभएको छ । लामो समय देखी सुगर रोग भएको थाहा नपाएपछि चिकित्सकले उपचारका क्रममा प्यारालाईसिस र किड्नी फेल भएको बताएका छ्न । उपचारका लागि पैसा नहुँदा अस्पतालसम्म पुरयाउन समेत  आर्थिक कठिनाइ  भएको परिवारले बताएका छन । यस्तो कठिन परिस्थितिमा मानवता लाई मध्यनजर गर्दै नरेन्द्र बहादुर शाहीले आवश्यक सहयोगका लागि समन्वयकारी भुमिका निर्वाह गर्दै सहयोगका लागि  आग्रह गर्नुभएको छ । सहयोगका लागि मनमती लावडको नाममा रहेको प्रभु  बैंक पुनर्वास शाखामा संचालित खाता नम्बर २२२२०८००१४६७७६२९ मा रकम जम्मा गराइ सहयोग गर्न सकिने शाहीले  बताउनुभयो  । लावडको उपचारका लागी आर्थिक सहयोग गर्न चाहने  महानुभावहरुले शाहीको मोबाईल नम्बर  ९८४३७१३५८३  मा सम्पर्क गरी आवश्यक सहयोग तथा  परामर्श प्रदान गर्न सकिने बताउनुभयो ।

कञ्चनपुर उच्च जोखिममा,४६ जनामा सिकलसेल एनिमिया पाइयो

कञ्चनपुर/ कञ्चनपुर  सिकलसेल एनिमिया तथा थालेसिमिया रोगको जोखिममा रहेको छ।

रानाथारु समुदायमा यो रोगको जोखिम देखिएपछि जिल्ला स्वास्थ्य कार्यालयले निःशुल्क स्वास्थ्य शिविरबाट १ हजार ५५० जनाको रगत परीक्षण गरेको थियो। त्यसमा ४६ जनामा सिकलसेल एनिमिया रोग देखिएको छ।

स्वास्थ्य कार्यालयका सिकलसेल एनिमिया तथा थालेसिमिया रोगसम्बन्धी स्रोत व्यक्ति सिद्धराज भट्टका अनुसार कञ्चनपुरको शुक्लाफाँटा नगरपालिका, बेदकोट नगरपालिका र भीमदत्त नगरपालिकामा परीक्षण गरिएकामध्ये १९९ मा वाहक (ट्रेट) देखा परेको थियो। 

‘बाहक (ट्रेट) देखापरेका १९९ जनाको रगतको अन्तिम जाँच गर्दा ४६ जनामा सिकलसेल एनिमिया भएको पुष्टि भएको छ,’ भट्टले भने, ‘त्यसमध्ये १२ जनामा गम्भीर खालको रोग देखिएको छ।’

उनका अनुसार वाहक देखिएका १९९ मध्ये २२ जना महिला र २४ जना पुरुषमा सिकलसेल एनिमिया रोग देखिएको हो। उनले वाहक (ट्रेट) देखा परेका महिला तथा पुरुषले विवाह गर्दा रगत परीक्षण गरेर मात्रै गर्नुपर्ने बताए।

‘बाहक (ट्रेट) देखा परेका महिला र पुरुषले विवाह गरे उहाँहरुबाट जन्मिने व्यक्ति पनि रोगी जन्मन्छ,’ उनले भने, ‘त्यसैले विवाह गर्नुभन्दा पहिले रगत परीक्षण गरेर मात्रै विवाह गर्नु उपयुक्त हुन्छ।’

हेमोग्लोबिनसँग सम्बन्धित खराबीका कारणले हुने समस्या विश्वमा ५ प्रतिशतभन्दा बढी भएको तथ्यांक छ। तीमध्ये सबैभन्दा बढी देखापरेको समस्या सिकलसेल एनिमिया र थालेसिमिया हो।

नेपालमा पनि खासगरी चौधरी थारु समुदायमा यो रोगको प्रकोप उच्च रहेको स्वास्थ्य कार्यालयले जनाएको छ।

केही समयअघि स्वास्थ्य अनुसन्धान परिषद्सँग त्रिभुवन विश्वविद्यालय ट्रफल अनुसन्धान प्रयोगशालाले गरेको अनुसन्धानमा पश्चिम नेपालका अविवाहित थारु समुदायका महिलाको डीएनए परीक्षण गर्दा १८ प्रतिशत व्यक्तिमा सिकलसेल हेटरोजाइग्स ट्रेट रहेको पाइएको उनले बताए।

नेपालका चौधरी थारु समुदायमा यो रोग एउटा प्रमुख जनस्वास्थ्य समस्याका रुपमा रहेको र समयमै यसको रोकथामका उपाय अवलम्बन गर्न नसकिए अवस्था अझ भयावह हुनसक्ने भएकाले कञ्चनपुरका चौधरी थारु समुदायको बसोबास उच्च रहेका पालिकामा यो रोगको पहिचान तथा निदानका लागि स्वास्थ्य कार्यालयले रगत परीक्षण गरेको जनाएको छ।

‘सिकलसेल एनिमिया र थालेसिमिया व्यक्तिको जिनसम्बन्धी खराबीका कारणले हुन्छ, रोगसँग सम्बन्धित सानो खराबी भएको अवस्थालाई ट्रेट भनिन्छ,‘ भट्टले भने, ‘केटा मान्छेमा ट्रेट छ र उसको विवाह ट्रेट भएको केटी मान्छेसँग भयो भने त्यसबाट जन्मने २५ प्रतिशत बच्चा सिकलसेल रोग भएर जन्मने गर्छन्।’ 

ट्रेट भएको व्यक्तिलाई शारीरिक रुपमा खासै समस्या नदेखिने र समस्या देखिए पनि सामान्य खालको हुने उनले बताए।

सिकलसेल भएमा थकाइ लाग्ने, श्वास फेर्न गाह्रो हुने, छाती, पेट, हातखुट्टाको कुर्कुच्चा दुख्ने, आँखामा समस्या देखा पर्ने, ज्वरो आउने, बान्ता हुने, खोकी लाग्ने लक्षण देखा पर्छन्।

 

२३ औँ सशस्त्र प्रहरी दिवस,उत्कृष्ट काम गर्ने कञ्चनपुरका सशस्त्र प्रहरी पुरस्कृत

लाल बहादुर एस के 

कञ्चनपुर, १० माघ 

२३औँ सशस्त्र प्रहरी दिवसको अवसरमा कञ्चनपुरका उत्कृष्ठ काम गर्ने सशस्त्र प्रहरीलाई पुरस्कृत गरिएको छ । सशस्त्र प्रहरी बल नेपाल नम्बर ३५ गण हेक्वा शैलेश्वरीले उत्कृष्ठ काम गर्ने चौबिस सशस्त्र प्रहरी अधिकृत एव जवानलाई पुरस्कृत गरेको हो । 

मंगलबार सशस्त्र प्रहरीको शैलेश्वरी गणका गणपति सशस्त्र प्रहरी उपरीक्षक प्रेम बहादुर रावलले जिल्लाभरीका विभिन्न यूनिटमा रहेर उत्कृष्ठ काम गर्ने सशस्त्र प्रहरी अधिकृतदेखि जवानसम्म पुरस्कृत गरिएको बताए । 

सशस्त्र प्रहरी बल शैलेश्वरी गणका अनुसार सशस्त्र प्रहरी नायब उपरीक्षक (डिएसपी) ईश्वरी दत्त भट्ट, पुरन प्रशाद न्यौपाने, सुदन आचार्य, दिपक बहादुर कुँवर, भारत बहादुर कुँवरलाई सम्मान गरिएको छ । 

सशस्त्र प्रहरी नायब उपरीक्षक(डिएसपी) सुदन आचार्यलाई शैलेश्वरी गण र बैद्यनाथ बाहनी प्रदेशले समेत सम्मान पुरस्कुत गरेको छ । 

प्रस्तावित सीमा सुरक्षा गुल्म गड्डाचौकीका इन्चार्ज समेत रहेका सशस्त्र प्रहरीका डिएसपी आचार्यलाई सीमा चोरी तस्करी नियन्त्रण गर्दै राजस्व जुहावट नियन्त्रणमा अतुलनिय भूमिका निर्वाह गरेको भन्दै सम्मान गरिएको हो । 

सशस्त्र प्रहरीका डिएसपी आचार्यलाई मुख्यमन्त्री कमल बहादुर शाह र सशस्त्र प्रहरी बल सुप प्रदेशका प्रमुख सशस्त्र प्रहरी नायब महानिरीक्षक(डिआईजी) कुमार न्यौपानेले सम्मान एव पुरस्कार हस्तान्तरण गरेका थिए । 

सशस्त्र प्रहरी बरिष्ठ नायक निरीक्षक टेक बहादुर सिह, सशस्त्र प्रहरी सहायक निरीक्षक नवराज भट्ट, सशस्त्र प्रहरी बरिष्ठ हबल्दार महेश बहादुर सिह, डम्बर बहादुर महरा, दिपक बोहारा, प्रमानन्द नाथ, सशस्त्र प्रहरी हवल्दार नरेन्द्र सिह कार्की, शम्भेर धानुक, लाल ब. ऐर, दल ब. विष्ट, रामसिह विष्ट, जयन्त बहादुर चन्द, महामल सिह घटाल, सशस्त्र प्रहरी सहायक हबल्दार सञ्जु प्रशाद उपाध्याय, शंकर सिह धामी, गोपाल राई, सशस्त्र प्रहरी जवान उर्मिला देउवा, जानु ओली र खजनराम दमाईलाई प्रमाण पत्रका साथै पुरस्कृत गरिएको छ । सशस्त्र प्रहरी शैलेश्वरी गणका गणपति प्रेम बहादुर रावलले कार्य सम्पादनमा थप उत्साहका लागि सम्मान एव पुरस्कृत गरिएको बताए । यसका साथै सशस्त्र प्रहरीका अमर परिवारलाई समेत सम्मान गरिएको छ । यस्तै दिवसको अवसरमा आयोजित विवित खेलकुद प्रतियोगितामा प्रथम हुने सशस्त्र प्रहरी अधिकृत एव जवानलाई समेत पुरस्कृत गरिएको छ । 

शैलेश्वरी गणका गणपति समेत रहेका सशस्त्र प्रहरी उपरीक्षक प्रेम बहादुर रावल, सशस्त्र प्रहरी निरीक्षक रमेश कुमार पाण्डेय ब्याडमिन्टन डबल, सशस्त्र प्रहरी बरिष्ठ हबल्दार राजु सिह कुँवर, सप्रह हेमराज उपाध्याय, सप्रबह राम सिह ऐर टिटी सिङ्गल, सप्रज हरि प्रशाद ओझा २माईल दौड र सप्रज तारा जोशी सयमिटर दौड महिला तर्फ पुरस्कृत गरिएको छ । 

कार्यक्रममा कञ्चनपुरका निमित्त प्रमुख जिल्ला अधिकारी धर्मराज जोशीले सशस्त्र प्रहरीको कामकर्तव्यको प्रसंसा गर्दै भावि दिनमा थप काम गर्न निर्देशन दिएका छन । शुक्लाफाँटा नगरका मेयर रण बहादुर महराले देशको परिस्थिित र सशस्त्र प्रहरीको भूमिका फेरिएकाले आगामी दिनमा थप प्रभावकारी कार्य सम्पादनमा जोडदिएका छन ।

चिसो बढेपछि पुनर्वासका विद्यालयहरु थप दुई दिन विदा

कञ्चनपुर, ८ माघ 

चिसो बढेपछि पुनर्वासका विद्यालयहरु थप दुई दिन विदा हुने भएको छ ।

सोमबार सामुदायिक तथा संस्थागत विद्यालयका प्रधानाध्यापक, शिक्षक, ट्रेड युनियन र संस्थागत विद्यालय प्याब्सनका पदाधिकारीहरुको संयुक्त बैठक बसी सो निर्णय गरेको हो ।

बैठकको निर्णयानुसार मिति २०८०।१०।०९ र १० गते पुनर्वास  नगरपालिका अन्तरगत सञ्चालित सम्पुर्ण विद्यालयहरुले अनिवार्य रुपमा विद्यालय बिदा गर्ने गरी जाडो बिदा थप गरिएको  उल्लेख गरिएको छ ।

सूचनामा अत्यधिक चिसो तथा शीतलहरका कारणले विद्यार्थीको स्वास्थ्यमा प्रतिकुल असर पर्नुका साथै नियमित पठनपाठन कार्य प्रभावित हुने देखिएकाले विदा गरिएको जनाईएको छ ।

यस अघि नै छिमेकी पालिकाहरु बेलौरी र बेलडाँडीले पनि जाडो विदा थप गरीसकेका छ्न ।

ढुंगा प्रहार गरि छोराले गरे बुवाको हत्या

 कैलाली/कैलालीमा ढुंगा प्रहार गरि एक जना छोराले बुवाको हत्या गरेका छन् । जानकी गाउँपालिका वडा नम्बर ३ लाइकपुर बस्ने २५ वर्षीय गणेश चौधरीले बुवा ४५ वर्षीय हिरासिंह चौधरीको हत्या गरेको प्रहरीले बताएका छन।

जिल्ला प्रहरी कार्यालय कैलालीका अनुसार चौधरीले घरायसी विवादको क्रममा ढुङ्गा प्रहार गर्दा हिराको घरकै आँगनमा मृत्यु भएको हो ।

उनलाई पक्राउ गरेर थप अनुसन्धान भइरहेको प्रहरीको भनाई छ ।

पुनर्वासबाट अफिम सहित पक्राउ परेका जोगा सिंह को हुन?

कञ्चनपुर/३० असोज ।

पुनर्वासबाट अफिमसहित  पक्राउ परेका जोगा सिंह भारतीय नागरिक भएको खुलेको छ । भारतको उत्तर प्रदेश गोला घर भएका ५२ वर्षीय जोगा सिंहलाई शनिबार इलाका प्रहरी कार्यालय त्रिभुवनबस्ती मातहतको खड्डा प्रहरी चौकीले पुनर्वास नगरपालिका–९ बिचफाँटाबाट पक्राउ गरेको थियो ।

अफिम जस्तो देखिने कालो पदार्थ  सहित पक्राउ परेको प्रहरीले जनाएको छ।

 प्रहरीले उनलाई हिरासतमै राखी अनुसन्धान गरिरहेको जनाएको छ।

पक्राउ परेका भारतीय नागरिकले आफू सुगरको बिमारी भएका कारण बिचफाँटाबाटै सो पदार्थ खरिद गरेको बयान दिएको प्रहरीको भनाई छ।

‘अफिम भन्ने खुलेको छ। हामी परीक्षणका लागि पनि पठाउँछौ,’ ईलाका प्रहरी कार्यालयका प्रहरी निरीक्षक हेमराज भट्टले भने, ‘अहिले अनुसन्धानमै छौं। अफिम भएको पुष्टि भएमा त्यही अनुसार कारबाही गछौं।’

 

बेलौरीमा निल गाई मृत अवस्थामा फेला पर्‍यो

कञ्चनपुर/बेलौरीमा निल गाई मृत अवस्थामा फेला परेको छ। बेलौरी नगरपालिका-१ मटैयामा आज आइतवार बिहान ८ बजे निल गाई मृत अवस्थामा फेला परेको हो। उक्त भाले निल गाई मृत अवस्थामा फेला परेको कुण्डा सव डिभिजन वन कार्यालय कञ्चनपुरका प्रमुख दिनेश कुमार यादवले बताए।

उक्त मृत निल गाईलाई स्थानीय जनप्रतिनिधि,सुरक्षाकर्मि लगायत स्थानीयको रोहवरमा खाल्डोमा गाडिएको हो। अनुसन्धान जारी राख्दै उक्त मृत निल गाईलाई स्थानीय जनप्रतिनिधि,सुरक्षाकर्मि,स्थानीय लगाएतको रोहवरमा खाल्डो खनेर गाडिएको कुण्डा सब डिभिजन वन कार्यालय कञ्चनपुरका प्रमुख दिनेश कुमार यादवले बताएका छन्।

बझाङ पुन: भुकम्प आयो

 बझाङ/२५ असोज ।

बझाङमा फेरि भूकम्पको धक्का महसुस गरिएको छ। गएराति चैनपुर आसपास केन्द्रबिन्दु भएर ५.२ म्याग्निच्युडको भूकम्प गएको राष्ट्रिय भूकम्प मापन तथा अनुसन्धान केन्द्रले जनाएको छ।

मध्ये राति १२ बजेर १२ मिनेटमा भूकम्पको धक्का महसुस गरिएको हो। भूकम्पबाट भएको कुनै क्षतिको विवरण प्राप्त भएको छैन।

बझाङको चैनपुर केन्द्रबिन्दु भएर गत मंगलवार ६.३ म्याग्निट्यूडको भूकम्प गएको थियो। त्यसपछि बझाङमा बारम्बार पराकम्पहरू गइरहेका छन्।