नेपाल शिक्षक महासंघ र सरकारबीच निर्णायक वार्ता सुरु

 काठमाडौं/१६ बैशाख ।

  शिक्षक महासंघ र सरकारबीच वार्ता सुरु भएको छ ।

शिक्षक महासंघको टोली सिंहदरबारस्थित शिक्षा, विज्ञान तथा प्रविधि मन्त्रालयमा पुगेका छन् ।

महासंघका महासचिव तुलाबहादुर थापाका अनुसार वार्ताका लागि शिक्षक नेता शिक्षा मन्त्रालय पुगेका हुन् ।

जनतासंग माओवादी कार्यक्रम अन्तरगत प्रचण्ड आज र भोली कञ्चनपुरमा

कञ्चनपुर, १६ बैशाख

जनतासंग माओवादी कार्यक्रम अन्तरगत प्रचण्ड आज र भोली कञ्चनपुरमा रहने कार्यक्रम रहको छ ।

सोमबारदेखि नेकपा माओवादी केन्द्रले सुदूरपश्चिम प्रदेशमा अभियान संचालन गरेको छ । हुलाकी राजमार्ग केन्द्रीत माओवादीले "जनतासंग माओवादी तराई–मधेश जनजागरण अभियान" अन्तर्गत सुदूरपश्चिम प्रदेश (कैलाली–कञ्चनपुर)मा अभियान संचालन गर्न लागेको हो । कैलालीको टीकापुरदेखि शुरु गरिएको अभियान धनगढीसम्म विविध कार्यक्रम गरेर आज(मंगलबार)साँझ डोकेबजार हुदै कञ्चनपुर प्रवेस गर्ने माओवादी केन्द्रले जनाएको छ ।

मंगलबार साँझ ५ बजे डोकेबजारमा पार्टि अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ लाई स्वागत गर्ने कार्यक्रम तय भएको नेपाल कम्युनिष्ट पार्टी (माओवादी केन्द्र) पुनर्वासका अध्यक्ष कञ्चन गीरीले जानकारी दिनुभयो । ५ः१५ बजे डोकेबजार स्थित बौद्ध गुम्बाको अवलोकन गर्ने कार्यक्रम रहेको उहाँले जानकारी दिनुभयो । त्यसपश्चात साँझ ६ बजे पुनर्वास नगरपालिकाको आयोजनामा स्वागत कार्यक्रम रहेको जानकारी दिदै ७ बजे आइबिआरडी बजारमा रहेको शहिद स्मारक पुग्ने कार्यक्रम तय भएको छ । सो कार्यक्रम संगै पुनर्वास २ मा उहाँको रात्रि बसाइ हुने छ । बुधबार भोलीपल्ट बिहान ५ बजे देखी प्रचण्डसंगको मर्नीङवाक कार्यक्रम तय भएको गिरीले जानकारी दिनुभयो । मर्नीङवाक सकेपछी पुनः पुनर्वास २ मा रहेको शहिद भवनमा द्वन्दकालीन शहिद परिवार, बेपत्ता परिवार र घाइतेका परिवारहरुसंग भेटघाट र सम्मान गर्ने कार्यतालीका रहेको छ ।

त्यसपछि बेलौरीको रामनगर खानेपानी उद्घाटन, सहिदको सालिकमा माल्यार्पण, शोभाताल अवलोकन, बेलडाँडीमा स्वागत भेटघाट, वेदकोटमा स्वागत भेटघाट र भीमदत्त नगरपालिका ४ महेन्द्रनगर संविधान चोकमा सभा गरेर अभियानको समापन गरिने छ ।

सुदूर तराईका जिल्ला कैलाली कञ्चनपुरमा माओवादी केन्द्रका अध्यक्ष सहितका शिर्ष नेता अभियान समापनका लागि आउने भएपछि नेता कार्यकर्ताहरु खटिएका छन । नेकपा माओवादी केन्द्र कञ्चनपुरका संयोजक खेमराज पाण्डेयले पार्टीको हुलाकी राजमार्ग केन्द्रीय अभियानको समापन कञ्चनपुरमै हुने भएकाले अभियान सफल पार्नका लागि नेता कार्यकर्ताहरुलाई लिएको जिम्मेवारी अनुरुप खटिएको बताए ।

‘पार्टीले संचालन गरेको अभियान हामीले पनि हाम्रो जिल्लामा सफल गर्नका लागि खटिएका छौँ, ‘उनले भने, ‘चरण चरणमा बैठकदेखि जिम्मेवारी लिए अनुरुप सबै नेता कार्यकर्ता खटिएका छौँ ।’ पार्टी अध्यक्ष प्रचण्ड नेतृत्वमै हुने अभियान सफल पार्नका लागि नेकपा माओवादी केन्द्र सुदूरपश्चिम प्रदेशका इन्चार्ज गिरीराजमणी पोखरेल सहितका दुुवै जिल्ला सहित प्रदेशकै नेता कार्यकर्ताहरु खटिएका छन ।

  अभियानले पार्टी र जनताको हित गर्ने भन्दै नेता कार्यकर्ताहरु आफुलाई पाएको जिम्मेवार युद्धस्तरमा निर्वाह गरिरहेका छन । हुलाकी राजमार्ग केन्द्रीत अभियान सकेपछि मध्यपहाडी मार्गमा समेत संचालन गरिनेछ ।

 

सरकार र शिक्षकबीच भएको वार्तामा कुनै निष्कर्ष निस्केन

काठमाडौं/१३ बैशाख ।

आज सरकार र नेपाल शिक्षक महासंघका प्रतिनिधिहरूबीचको वार्ता कुनै निष्कर्ष विना सकिएको  छ । शिक्षा विज्ञान तथा प्रविधि मन्त्रालयमा आज बिहान भएको बैठकमा सरकारको तर्फबाट नवनियुक्त  शिक्षा विज्ञान तथा प्रविधि मन्त्री रघुजी पन्त, शिक्षा सचिव दिपक काफ्ले, नेपाल शिक्षक महासंघको तर्फबाट अध्यक्ष लक्ष्मी किशोर सुवेदीको नेतृत्वमा पदाधिकारी र आन्दोलन शिक्षकहरू सहभागी थिए। 

बैठकपश्चात अध्यक्ष सुवेदीले पुन: छलफल र वार्ता गर्ने सहमति भएको बताए। उनले वार्ता र आन्दोलन सँगसँगै जाने बताए।

सुवेदीले भने, ‘अहिले नेपाल शिक्षक महासंघ अहिले आन्दोलनमा छ। आन्दोलनका क्रममा हामीले उठाएका विषयवस्तुको बारेमा शिक्षा मन्त्रीको उपस्थितिमा छलफल भयो। छलफल र संवादलाई निरन्तरता दिने निर्णय भयो।’ दुई पक्षीय सहमतिमा फेरि बैठक बस्छ।’  उनले अब बैठक कहिले बस्छ भन्ने टुंगो लाग्न बाँकी रहेको बताए।

यसैगरी विद्यालय कर्मचारी परिषद् अध्यक्ष गंगाराम तिवारीले सरकारले वार्तामा बोलाएकाले आज मन्त्रालयमा छलफल गर्न आएको बताए। उनले सम्झौता यस अगाडि पनि गरेकाले सरकारसँग सम्झौता नहुने शिक्षा ऐनकै माग गरिएको बताए। उनले विद्यालय शिक्षा विधेयक संसद्मा आएपछि मात्र के गर्ने सोच्ने उल्लेख गरे। उनले भने, ‘शिक्षक र कर्मचारीको सेवा सुविधाका लागि मात्र होइन। शिक्षा सुधारका लागि ऐनको माग गर्दै आन्दोलन जारी राखेका हौं। केहि समयमा निकास दिनेछौं। निकास दिने निकाय शिक्षा मन्त्रालय र सरकार हो।’

सरकारले वार्ताका लागि आह्वान गरेसँगै आन्दोलनरत शिक्षकहरू सिंहदरबार गएका हुन्। शुक्रबार शिक्षा विज्ञान तथा प्रविधि मन्त्री पन्तले शिक्षकहरूलाई मागमा लचिलो भएर वार्तामा बस्न र समस्या समाधानको उपाय खोज्न आग्रह गरेका थिए। संसद् भवन परिसरमा मन्त्री पन्तले भने, ‘सरकार शिक्षकहरूसँग वार्ता र संवादको माध्यमबाट समस्या समाधान गर्न प्रतिबद्ध छ। शिक्षक साथीहरूलाई लचिलो भएर वार्तामा आउन आग्रह गर्दछु ।’ मन्त्री पन्तको भनाईसँगै आज बिहान उनीहरु छलफलमा गएका हुन्।

शिक्षकहरुले सरकारसमक्ष आफूहरूले जायज माग राखेकाले सबै माग पूरा हुनुपर्ने अडान राखेका छन्।

गत चैत २० गतेदेखि विद्यालय शिक्षा ऐनको माग गर्दै शिक्षकहरु काठमाडौंमा आन्दोलनमा रहेका छन्। 

सरकार र शिक्षक महासंघ बीच वार्ता हुँदै

काठमाडौं/१२ बैशाख ।

सरकार र आन्दोलनरत शिक्षकहरूबीच वार्ता हुने भएको छ। वार्ताको लागि टोली गठन गरि सिंहरदबारमा उक्त टोली गएको नेपाल शिक्षक महासंघका अध्यक्ष लक्ष्मीकिशोर सुवेदीले जानकारी दिए।

उनले भने,‘सरकारले वार्ताको लागि आव्हान गरेपछि हामीले टोली गठन गरेका छौँ,सो टोली वार्ताको लागि गइसक्नु भयो।’

सरकारको तर्फबाट शिक्षा, विज्ञान तथा प्रविधि मन्त्री रघुजी पन्त र मन्त्रालयको तर्फबाट शिक्षा सचिव दीपक काफ्लेसँग उक्त टोलीबीच वार्तामा बस्ने छ। चैत २० गतेदेखि शिक्षक/कर्मचारीहरू शिक्षा विधेयक तत्काल जारी गर्नुपर्ने माग राख्दै काठमाडौं केन्द्रित आन्दोलन जारी राखेका छन्।

  

मोटरसाइकल सहित जलाईएका रानाको मृत्यु घटनाको सत्यतथ्य छानबिन गर्न माग

कञ्चनपुर/११ बैशाख ।

 गत मंगलबार विहानै मोटरसाइकल सहित जलाईएको अवस्था फेला परेका बेलडाँडी ३ खैरिघाटका हरिकिसन रानाको मृत्यु घटनाको सत्यतथ्य छानबिन गर्न माग गरिएको छ ।

नेपाल आदिवासी जनजाति महासंघ जिल्ला समन्वय परिषद कञ्चनपुरका जातिय संघ संस्थाहरुले रानाको मृत्यु प्रकरणको सत्यतथ्य छानबिनको माग अघि सारेका हुन । नेपाल आदिवासी जनजाति महासंघ जिल्ला समन्वय परिषद कञ्चनपुरका अध्यक्ष विकास श्रेष्ठले महासंघका घटक जातिय संघ संस्थाहरुले संयुक्त रुपमा हरिकिसन रानाको मृत्यु प्रकरण सत्यतथ्य छानबिनको माग अघि सारेको बताए ।

   जातिय घटकहरुले बुधबार एक विज्ञप्ती जारी गर्दै बैलौरी नगरपालिका वडा नं. १० मसान घाट कलकत्ता नजिकै सड़कमा मृत फेला परेको र घटना शंकास्पद तथा रहस्यमय रुपमा रहेकोले उक्त घटनाको सत्यतथ्य छानविन गरी दोषी माथि कड़ा कारवाही गरी पिडित परिवारलाई उचित किसिमको न्याय दिलाउन माग गरेको नेपाल आदिवासी जनजाति महासंघ जिल्ला समन्वय परिषद कञ्चनपुरका अध्यक्ष विकास श्रेष्ठले बताए ।

 नेपाल आदिवासी जनजाति महासंघ जिल्ला समन्वय परिषद कञ्चनपुर लगायत सम्पूर्ण जातिय घटकहरुको तर्फबाट जिल्ला प्रशासन कार्यालय कञ्चनपुर, प्रहरी प्रशासन सहित सम्बन्धित सरोकारवाला निकायहरुलाई ध्यानाकर्षण गराएका हुन । त्यसैगरी सुदूरपश्चिम प्रदेश सरकारका मुख्यमन्त्री कमल बहादुर शाहलाई समेत दोषीलाई कारवाहीको मागका लागि ज्ञापनपत्र बुझाएका छन् ।

नेपाल आदिवासी जनजाति महासंघ जिल्ला समन्वय परिषद कञ्चनपुरका अध्यक्ष, विकास श्रेष्ठ, नेपाल रानाथारु समाज कञ्चनपुरका अध्यक्ष प्रेमवती राना, नेपाल उरांव समाज कञ्चनपुरका अध्यक्ष अनिल उरांव, थारु कल्याण कारीणी सभा कञ्चनपुरका अध्यक्ष सानु चौधरी, नेपाल मगर संघ कञ्चनपुर का.वा. अध्यक्ष केशव राना मगर, नेपाल आदिवासी जनजाति महिला महासंघ कञ्चनपुरका अध्यक्ष भारती चौधरी सहितले सत्य तथ्य छानविन गरी दोषीमाथि कारवाहीको माग गरेका छन । घर परिवारले भने नियन्त्रणमा लिएर बन्दी बनाएर हत्या गरेको छानबिनको माग अघि सारेका छन ।

डाक्टरहरुको आन्दोलन कडा हुँदै, १२ गतेदेखि स्वास्थ्यसेवा ठप्प पार्ने घोषणा

काठमाडौँ / बैशाख ११

नेपाल चिकित्सक संघले २४ घण्टाभित्र माग सम्बोधन नभए स्वास्थ्यसेवा ठप्प पार्ने घोषणा गरेको छ ।

     हिजो बुधबार एक विज्ञप्ति जारी गर्दै संघले चिकित्सा शिक्षा आयोगको १६ औँ पूर्ण बैठकको निर्णय कार्यान्वयन र शैक्षिक कार्यक्रम अनुसार निजी र सरकारी प्रतिष्ठानहरुमा एकै पटक म्याचिङ प्रक्रिया गरिनुपर्ने लगायतका माग सहित २८ दिनदेखि चिकित्सकहरु सडक आन्दोलनमा छन् । 

    तर,सरकारले हालसम्म पनि माग सम्बोधनका लागि तदारुकता नदेखाएपछि संघले २४ घण्टाभित्र माग पुरा गर्न भनेको हो ।  माग पुरा नभए देशभरिका आकस्मिक तथा सघन उपचार सेवा बाहेकका सम्पूर्ण स्वास्थ्य सेवा ठप्प पार्ने चिकित्सक संघले घोषणा गरेको छ । 

    चिकित्सक संघले आत्मसम्मानको आन्दोलनलाई सफल पार्न सम्पूर्णमा आग्रह समेत गरेको छ । चिकित्सक संघले यसअघि पनि माग सम्बोधनका लागि गत चैत्र ३१ मा ७२ घण्टे अल्टिमेटम दिएको थियो ।  

प्रधानमन्त्रीसँगको वार्ताले निस्केन निकास,आन्दोलन लम्बिने संकेत

काठमाडौँ/६ बैशाख 

हिजो शुक्रबार प्रधानमन्त्री र आन्दोलनरत शिक्षक प्रतिनिधिबिच भएको वार्ता निष्कर्षविहिन भएको छ ।

प्रधानमन्त्री निवास बालुवाटारमा हिजो बेलुकी भएको छलफलमा शिक्षक आन्दोलन र समस्या समाधानका विषयमा कुराकानी भएको प्रधानमन्त्रीको सचिवालयले जनाएको छ ।

छलफलमा प्रधानमन्त्री ओलीले शिक्षा ऐन चाँडै आउने प्रतिबद्धता जनाए पनि शिक्षकहरु आश्वस्त हुन सकेका छैनन् । उनीहरुले आन्दोलनलाई निरन्तरता दिने अडान लिएका छन् ।

छलफलमा महासङ्घका तर्फबाट अध्यक्ष लक्ष्मीकिशोर सुवेदी, सहअध्यक्ष नानुमाया पराजुली, महासचिव तुलाबहादुर थापा र उपमहाचिव मदनराज जोशी सहभागी थिए ।

विद्यालय शिक्षा विधेयक २०८१ छिटो पारित हुनुपर्नेलगायत माग राखेर शिक्षकहरुले चैत २० गतेदेखि काठमाण्डौ केन्द्रित आन्दोलन गर्दै आएका छन् ।

शैक्षिक हडतालसहित आन्दोलित शिक्षकहरुले शिक्षा मन्त्रालयले आह्वान गरेको वार्तामा बस्न अस्वीकार गर्दै आएका छन् ।

शिक्षकहरुको आन्दोलनले सामुदायिक विद्यालयमा विद्यार्थी भर्ना अभियान प्रभावित भएको छ भने कक्षा १२ को परीक्षा र एसईईको उत्तरपुस्तिका परीक्षण अनिश्चित बन्दै गएको छ ।

सरकारले संसदको शिक्षा, स्वास्थ्य समितिमा विचाराधीन विद्यालय शिक्षा विधेयक छिटो पारित गर्ने समेतका प्रयोजनका लागि यही वैशाख १२ गते सङ्घीय संसदको अधिवेशन आह्वान गरेको छ ।

सरकारले संसदको यही अधिवेशनबाट शिक्षा विधेयक पारित हुने भन्दै विद्यालय भर्ना अभियान, एसईईको उत्तरपुस्तिका परीक्षण र कक्षा १२ को परीक्षालाई ध्यान दिई आन्दोलन फिर्ता गरी विद्यालय फर्कन आह्वान गर्दै आएको छ । तर शिक्षकहरुले विगतमा भएका सहमतिअनुसार विधेयक पारित भएपछि मात्र विद्यालय फर्कने अडान लिएका छन् ।

 

आन्दोलनरत शिक्षक र प्रधानमन्त्री बिच छलफल, के भयो छ्लफलमा?

काठमाडौं/५ बैशाख ।

प्रधानमन्त्री केपी शर्मा ओलीसँग नेपाल शिक्षक महासङ्घका पदाधिकारीले आज जारी शिक्षक आन्दोलन र समस्या समाधानका विकल्पका विषयमा छलफल गरेका छन् ।

विद्यालय शिक्षा विधेयक, २०८१ छिटो पारित हुनुुपर्ने लगायत माग राखेर महासङ्घको आव्हानमा यही चैत २० गतेदेखि शिक्षकहरुले काठमाडौँकेन्द्रित आन्दोलन जारी राखेका छन् ।

प्रधानमन्त्री ओलीले आन्दोलनमा उठाइएका जायज मागका सम्बन्धमा गृहकार्य गरी वार्ता र संवादबाट समस्याको समाधान गर्न गत चैत २५ गते उपप्रधानमन्त्री एवं अर्थमन्त्री विष्णुुप्रसाद पौडेल, गृहमन्त्री रमेश लेखक, शिक्षा, विज्ञान तथा प्रविधि मन्त्री विद्या भट्टराईसहितलाई निर्देशन दिएका थिए ।

मन्त्रिपरिषद्को यही वैशाख २ गतेको बैठकले संघीय संसदमा विचचाराधीन रहेको विद्यालय शिक्षा विधेयक यथासक्य पारित गर्ने समेतका प्रयोजनका लागि संघीय संसदको अधिवेशन आह्वान गरी सरकारको तर्फबाट सो विधेयक पारित गर्न आवश्यक समन्वय र सहजीकरण गर्ने र यसका लागि वैशाख १२ गते शुक्रबार दिउँसो १ बजे संघीय संसद बैठकको आह्वान गर्ने निर्णय गरेको थियो ।

मन्त्रिपरिषद्को सोही बैठकले महासंघले उठाएका मागहरुको यथोचित सम्बोधन गर्ने सम्बन्धमा संवाद निरन्तर रहेको र अझै संवाद गर्न सरकार संवेदनशील र गम्भीर रहेकाले विद्यालय भर्ना अभियान, एसइइको उत्तरपुस्तिका परीक्षण र कक्षा १२ को परीक्षालाई ध्यान दिइ आन्दोलन फिर्ता गरी विद्यालय फर्कन शिक्षकहरुलाई आव्हान गरेको थियो ।

  प्रधानमन्त्री निवास बालुुवाटारमा भएको छलफलमा महासङ्घका अध्यक्ष लक्ष्मीकिशोर सुवेदी, सहअध्यक्ष नानुमाया पराजुली, महासचिव तुलाबहादुर थापा र उपमहाचिव मदनराज जोशी सहभागी रहेका छन् ।

टाउन बजारमा आगामी बुधबारदेखि हाटबजार लाग्ने

कञ्चनपुर, ३१ बैशाख ।

टाउन बजारमा आगामी बुधबारदेखि हाटबजार लाग्ने भएको छ । 

पुनर्वास नगरपालिका वडानम्बर ६ स्थित प्रतिभानगर टाउन वजारकाे खुल्ला मञ्चमा  नयाँ वर्ष २०८२ सालकाे पहिलो बुधबारदेखी प्रत्येक बुधबार  साप्ताहिक रुपले  हाटबजार लाग्ने भएको हो ।

 टाउन बजारका व्यवसायी र कृषकहरुकाे  माग बमोजिम पुनर्वास उद्याेग वाणिज्य संघले अनुमती मागेपछि  पुनर्वास नगरपालिका वडानम्बर ६  को वडा कार्यालयले हाटबजारको लागि अनुमती दिएको थियो ।

 पुनर्वास उद्योग वाणिज्य संघका अध्यक्ष राजकुमार रायमाझीले फेसबुक मार्फत यस सम्बन्धमा जानकारी दिनुभएको छ र समयमै अनुमती प्रदान गर्नुभएकोमा पुनर्वास ६ का वडाध्यक्ष मित्रसिंह लामालाई धन्यवाद दिनुभएको छ ।

  साथै उहाँले उक्त हाटवजारमा आफ्नाे कृषिजन्य उत्पादन ल्याएर बिक्रि, वितरण गर्न सम्पुर्ण व्यवसायी तथा कृषकहरुलाई अनुराेध गर्नुभएको छ ।

अब एसईई नहुने,कक्षा दशको परीक्षा स्कूलले गर्ने

 काठमाडौँ, ३० चैत ।

माध्यमिक शिक्षा परीक्षा (एसईई)नगर्ने सहमति जुटेको छ । विद्यालय शिक्षा विधेयक माथिको दफावार छलफलमा संसदको शिक्षा, स्वास्थ्य तथा प्रविधि समितिको उपसमितिमा एसईई नगर्ने सहमति जुटेको हो ।

‘आधारभूत त माध्यमिक गरी दुई तह छ । १ देखि ८ सम्म स्थानीय तहले गर्ने । माध्यमिक तहको राष्ट्रिय परीक्षा बोर्डले गर्ने सहमति जुटेको छ । एसईई नगर्ने पनि सहमति भएको छ’, शिक्षा समिति स्रोतले भन्यो ।

विद्यालय तहको अन्तिम परीक्षा १२ कक्षाको हुने भएकाले १० को परीक्षा स्कुलस्तरमै गर्न सहमति जुटेको हो ।

  विधेयकमाथि कतिपय सांसदले एसईई प्रदेशमा हस्तान्तरण गर्न संशोधन हालेका थिए । प्रदेशलाई दिने विषयमा पनि उपसमितिमा छलफल भएको थियो । तर, एसईई नराख्न उपसमितिमा सहमति जुटेको हो ।

त्यसैगरी जिल्ला शिक्षा कार्यालय र शिक्षा विभाग नराख्ने पनि सहमति जुटेको छ । उपसमिति सदस्यका अनुसार ईसीडीलाई २ वर्षको बनाउने पनि सहमति जुटेको छ । तर, उपसमितिमा सहमति भएका विषय सार्वजनिक गरिएको छैन । सबै विषयमा टुंगो लगाएर फुल समितिमा पेस गर्ने उपसमितिको तयारी छ ।

विधेयकमाथि उपसमितिमा लगातार छलफल भइरहेको छ । प्रदेश प्रदेशबाट आएको सुझाव, सांसदको संशोधन,विज्ञका सुझाव सबैलाई एकीकृत गरेर दफावार छलफल भइरहेको उपसमितिले जनाएको छ । आज शनिबार पनि उपसमितिको बैठक बस्दै छ । शिक्षकहरूले ऐन जारी गर्न माग गरेपछि उपसमितिले द्रुत गतिमा छलफल गरिरहेको हो । उपसमिति सदस्यका अनुसार शिक्षकका विषयमा छलफल गर्न बाँकी छ ।

‘सरकार र शिक्षकबीच वार्ता जारी छ । पोहोर भएका सहमति पनि छन् । फेरि केही नयाँ कुरा थप घट होला भनेर सरकार र शिक्षकको सहमति कुरिरहेका छौं’, उपसमितिका एक सदस्यले भने ।

   सरकार र शिक्षक महासंघबीच वार्ता भए पनि सहमति जुटेको छैन । गत २० चैतदेखि शिक्षकहरूले सडक आन्दोलन गरिरहेका छन् ।

तन्ना र चटपटे बेचिरहेका नेपाली सुरक्षाकर्मीले ट्र्याक गरी समाते दुर्गा प्रसाईंलाई

  

काठमाडौ /२९ चैत ।

काठमाडौंमा हिंसा मच्चाएर फरार राजावादी आन्दोलनका कमाण्डर दूर्गा प्रसाईंलाई आजै काठमाडौं ल्याउने तयारी भएको छ। भारतीय प्रहरीले आसामको गुवाटीबाट विहिवार नियन्त्रणमा लिएर नेपालको सीमा क्षेत्रमा छाडेपछि नेपाल प्रहरीले पक्राउ गरी काठमाडौं ल्याउने तयारी भएको हो। उनी भारतको आसाम राज्यमा फेला परेका थिए।  

विगत एक सातादेखि प्रसाईंको खोजीमा भारतको आसामस्थित गुवाटीमा तन्ना र चटपटे बेचिरहेका नेपाली सुरक्षाकर्मीले लोकेशन ट्र्याक गरेर भारतीय प्रहरीलाई सूचना दिएपछि बिहीबार उनलाई नियन्त्रण लिइएको थियो। उनलाई बिहीबार साँझ आसामबाट नेपालतर्फ हिँडाइएको थियो।

‘दुर्गा प्रसाईंको खोजीमा गएका नेपाल प्रहरीले भारतीय प्रहरीसँग समन्वय गरेका थिए, भारतीय प्रहरीकै सहयोगमा उनलाई नियन्त्रणमा लिन सफल भएको हो,’ नेपाल प्रहरीका उच्च अधिकारीले भने। प्रसाईं पक्राउ परेपछि गृहमन्त्री रमेश लेखक, गृहसचिव गोकर्णमणी दुवाडी, प्रहरी महानिरीक्षक दीपक थापा, विशेष व्यूरो प्रमुख डिआइजी सिद्धिविक्रम शाहबिच आकस्मिक बैठक बसेको थियो।  

उनलाई नेपाल ल्याएर आजै काठमाडौं जिल्ला अदालतमा पेस गरी अनुसन्धानका लागि समय लिने तयारी भइरहेको छ। काठमाडौं ल्याएपछि जिल्ला प्रहरी परिसर काठमाडौंले अदालतमा पेस गर्नेछ।

उनीमाथि तीनकुनेमा भएका हिंसात्मक घटनाको बारेमा अनुसन्धान हुने प्रहरीले जनाएको छ। उनीमाथी ज्यान मुद्दा, चोरी तथा डकैती, निजी सम्पत्तिको तोडफोड तथा आगजनी, सार्वजनिक सम्पत्तिको हानीनोक्सानी, ड्यूटीमा रहेका प्रहरीमाथि आक्रमण, संगठित अपराधमा अनुसन्धान हुने भएको छ। नेपाल ल्याएपछि प्रसाईंलाई झापास्थित भद्रपुर विमानस्थलबाट काठमाडौं ल्याउने तयारी भइरहेको छ।  

राजसंस्था पुनःस्थापनाका लागि भन्दै नवराज सुवेदीको संयोजकत्वमा गठित संयुक्त जनआन्दोलन समितिले यही चैत १५ गते काठमाडौंको तीनकुनेमा हिंसात्मक प्रदर्शन गर्दा रिपोर्टिङ गरिरहेका पत्रकारसहित २ युवक मारिएका थिए। अर्बौँको सम्पत्ति तोडफोड, आगजनी र लुटपाटबाट भएको थियो।  

राजावादीको हिंसात्मक प्रदर्शनमा प्रसाईंले प्रहरीलाई कुल्चने गरी गाडी कुदाएका थिए भने उनका समर्थकहरूले विभिन्न सार्वजनिक तथा निजी भवन, सञ्चारगृह र व्यापारिक केन्द्र गरी कुल ४० संरचनामा ढुंगामुढा, तोडफोड, आगजनी र लुटपाट गरेका थिए। त्यस्तै सार्वजनिक तथा निजी गरी ६९ वटा गाडीमा क्षति पुर्याएका थिए।

घटनामा पत्रकार सुरेश रजक र प्रदशर्नकारी सविन महर्जनको ज्यान गएको थियो भने १२९ जना घाइते भएका थिए, पाँच जना अझै अस्पतालमा छन्। कमाण्डर घोषित प्रसाईं भागे पनि प्रहरीले राप्रपाका वरिष्ठ उपाध्यक्ष रवीन्द्र मिश्र र महमन्त्री धवलशमशेर राणासहित ७९ जनालाई पक्राउ गरेको छ। प्रहरीले मिश्र र राणालाई राजद्रोह, संगठित अपराध र सार्वजनिक उपद्रवसहितका मुद्दामा अदालतबाट म्याद लिएर अनुसन्धान गरिरहेको छ।