राष्ट्रिय परीक्षा बोर्डले १२ कक्षाको नतिजा सार्वजनिक गरेको छ। सोमबार साँझ बसेको बोर्ड बैठकपछि नतिजा प्रकाशित गरिएको हो।
नतिजा प्रकाशित गर्नुअघि, बोर्डले आइतबार नतिजाको डेमो (पूर्वावलोकन) प्रदर्शन गरेको थियो। बोर्डको वार्षिक कार्यतालिका अनुसार १५ साउनभित्र नतिजा सार्वजनिक हुने कार्यक्रम थियो। तर, शिक्षकहरूको आन्दोलनका कारण यसमा ढिलाइ भएको हो।
गत २० चैतदेखि सुरु भएको आन्दोलन २९ दिनसम्म चलेको थियो, जसका कारण नतिजा प्रकाशन प्रक्रियामा प्रभाव परेको हो। यसै आन्दोलनको कारण ११ वैशाखका लागि तय भएको परीक्षा पनि ढिलिएर २१ वैशाखदेखि सुरु गरिएको थियो।
यस वर्षको परीक्षामा देशभरबाट ५ लाख ११ हजार ५ सय २५ विद्यार्थी सहभागी भएका थिए।
बोर्डका अनुसार, कक्षा १२ को नतिजा सुधारोन्मुख देखिएको छ। दुई लाख ८२ हजार ४६५ जना उत्तीर्ण भएका छन् । १३,५०२ जना विद्यार्थीले ३.६१ देखि ४ जिपिएसम्म प्राप्त गरेका छन्। गत वर्षको तुलनामा ९ प्रतिशतले नतिजामा सुधार आएको बोर्डका अध्यक्ष महाश्रम शर्माले जानकारी दिए ।
